Музъем улын улон

Удмурт Дунне
By Удмурт Дунне Июнь 21, 2016 13:12

Реклама тырмымтэен, туж трос умой киноос учкытэк кылё. «Контроль»  венгер кино но син шорам ӧй сюрысалыз, та «Ингож» номер Венгриен герӟаськемын ӧй луысалыз ке.

контроль

Метро — со ворсам дунне, выжыкыл. Отын вань Билл Мюррейлы кельшись кивалтӥсь. Машинист — кылчин, кудӥз сигаретсэ ӝуатыкуз, синкашсэ ӵушка. Билетъёсты эскерисьёс — клоун, шуак умме усись пияш, граф Дракулалы тупась валтӥсь герой. Эшшо льӧль плюшлэсь вурем гондыр дӥсен ветлӥсь нылаш.

Та метроын ик йыртэма маньяк: рельса вылэ донгыса, адямиосты виылэ. Калык тае адӟе но… уг паймы, уг кайгыры, сугон сиён сярысь вераське. Ваньмыз воштӥське Дракулалы кельшись Бульцу льӧль гондырез — Жофи нылэз — пумитам бере.

Камера огпол но уг возьматы инбамез, шундыез, кырез. Шуныт буёлъёс тырмымтэен, дыр, геройёс вирен наштаськыса ветло — огшоры кетчуп но татын вирлы тупа.

Та кино — аспӧртэмлыко «Бойцовский клуб»: билетъёсты эскерисьёс ог-огенызы но, пассажиръёсын но жугисько. Кыӵе гинэ пассажиръёс уг сюро! Огшоры калык пӧлын —  китай туристъёс, бадӟым пуныосын воргоронъёс, асьсэды вузась нылкышноос, зарни жильыосын мафиозиос но мусо песятайёс.
Паймоно кадь: та рос-прос кино — Нимрод Антал егит режиссёрлэн нырысетӥ ужез, кудӥз солы Канныысь приз но вайиз, Голливудэ но сюрес усьтӥз — «Контроль» бӧрсьы Нимрод Антал пуктӥз дуннеын тодмо луэм «Хищники», «Металлика: сквозь невозможное» киноосты. Возьманы гинэ кылиз, кыӵе эшшо ужъёс кылдытоз, венгер синмын учкыса, та ӟеч режиссёр.

Вера Штыкова

Суред: «Контроль» кино

Удмурт Дунне
By Удмурт Дунне Июнь 21, 2016 13:12