Мон вуылӥ Псков улосэ

Удмурт Дунне
By Удмурт Дунне Июнь 20, 2016 15:35

Мон вуылӥ Псков улосэ

2014-11-24 01-42-46

Псковысь крепость.

Кытчы мыноно шутэтскыны, чебер интыосын тодматскыны? Россиын сыӵе учкымон интыос уно: Байкал, Сьӧд зарезь, Алтай, Москва, Санкт-Петербург… Мон вуылӥ Псков улосэ. Синмаськи.

Мынон азьын картаез учки. Кин отысь каръёслы нимъёс малпам? Гдов, Дно, Опочка, Остров, Пустошка, Пыталово… Соосыз лыдӟыса, син азе курадӟон, секыт улон пуксе.

Удмуртиысь Псков улосэ поездъёс уг мыно. Мон нырысь Санкт-Петербурге вуи, отысен ини Пскове автобусэн ог 5 час мынӥ. Ленинград но Псков улосъёсыз ортчыку, уно каръёс но пичи гуртъёс сюризы, котькудаз Быдӟым ожлы сӥзем синпелетъёс вань. Сюрес дурын пуктылэмын кыӵе ке но обелиск яке мемориал доры кожон пусъёс. Кылсярысь, Луга городозь (Ленинград улос) кӧня ке иськем вуытэк, «Партизанская слава» мемориал доры нуись пус сылэ. Нялтас вераса, фашистъёслы пумит партизан огазеяськонъёсын ӵош юн ожмаськемез понна 1967-тӥ арын Псков улос Ленин орденэн пусъемын.

Та пусъёсъя но синпелетъёсъя, историез чик тодытэк но, валано, татын кӧшкемыт ожъёс ортчиллям шуыса. Псков «Воинской славалэн городэз» нимын пусъемын. Отын но уно синпелетъёс сыло, вынлыко шайгуос но вань. Ватэмъёс пӧлын Удмуртиысь оже кошкемъёс но ӧжыт ӧвӧл, дыр. Тросэз соос ожмаськизы Псковын кылдытэм 76-тӥ десантно-штурмовой дивизиын. Кылсярысь, 2011-тӥ арын Комиысь поисковикъёс одӥгысьтыз ожмаськон интыысь шедьтӥллям бырем солдатъёслэсь лысьӧмъёссэс. Пӧлысьтызы куатезлэсь нимзэс шараяны быгатӥзы. Одӥгез вылэм Удмуртиысь Александр Рябов. Ӵыжы-выжыоссэ утчан сямен тодмо луиз: правнукез Александр Рябов ӵапак со вакытэ службазэ ортчытэ вылэм ВДВ-лэн 76-тӥ гвардейской десантно-штурмовой дивизияз. Со пыриськиз пересь песятайзэ Невельской ёросысь Турки-Перевоз гуртысь вынлыко шайвылэ ватонэ.

Псков улосэ вуыса, озьы ик трос выльзэ тодыны луэ Нырысетӥ дунневыл но Граждан ожъёс сярысь, та ожъёслы но уно синпелетъёс сӥземын. Кунгожлы матэ интыяськеменыз, та музъем вылын уно вир кисьтӥськемын (бускельёсыз Эстония, Латвия, Белоруссия). Трос мукет музъемъёсты но тушмонъёс лёгазы-саптазы, но Псковын историзэс мур утё но гажало, быремъёсыз буре ваё: синпелетлы быдэ сямен сяська тугокоос тыремын.

Псков сылэ Великая но Пскова шуръёс вожын. Пскова шурлэн нимыз сярысь трос веранъёс вань, но тужгес паськыт вӧлмемын таиз: «пскова» фин-угор «пихкава» кыллэсь кылдэмын — «сир ву» шуэмез возьматэ. Та шур бордысь ик карлэн нимыз кылдэм.

Псков тужгес но данъяське пумтэм-йылтэм черкъёсыныз, часовняосыныз. Тодмо ӧвӧл, ку кылдӥз кар, ку пуктэмын вал крепость, но 903-тӥ арысен утиськись гожъямъёсын солэн нимыз пумиськылэ ни. Озьы ик пусъеме потэ: азьвыл со музъемъёсын славян калыкъёс гинэ ӧвӧл, фин-угоръёс но улӥллям — та сярысь Псков улослэн историысьтыз трос тунсыкозэ лыдӟыны луэ.

Малпады ке Псков улосэ вуылыны, сьӧрады котьку мед луозы документъёсты: 3 кунъёсын артэ интыяськемын бере, котькыӵе вакытэ соосты юаны быгатозы.

 

 

 

 

Удмурт Дунне
By Удмурт Дунне Июнь 20, 2016 15:35