Малы купырске кияр?

Удмурт Дунне
By Удмурт Дунне Июнь 22, 2016 09:35

бакча ужКу но маин сюдоно будосъёсты

Котькуд сад-бакча во-зись умой тодэ: ӟеч урожай басьтон понна будосъёс вылэ дыраз ву кисьтано, удобрение тыроно.

 Вераськись модосъёс

Берло дыре паськыт вӧлмемын минерал удобрениос. Соос вакчи дыр куспын юрттыны быгато шугектэм будосъёслы. Выронэз но трос ӧвӧл: вуын суралты но соку ик кисьта. Эсэпсэ гинэ валано. Нош мар уг тырмы, будосъёс асьсэос вераны быгато.

Азот тырмымтэ дыръя будосъёслэн куаръёссы векчиесь, кӧсытэсь луо. Дырызлэсь вазь сяськаяськыны быгатозы, но сяськаоссы векчиесь, ӧжыт. Азот тырмымтэ дыръя, кылсярысь, туж ӝог ӵужектыны кутске чеснок. Кубисталэн улӥ куаръёсыз лемлеталэс, ӵужалэс луо, кочонэз кузь будэ. Кияр модосъёс но ӵужпыръем адӟисько, емышъёссы йылсо луыны, кокырскыны кутско.

Будосъёсты улӟытоз мочевина: 10 литрын 1 бадӟым пуньыен суралтоно. Та суретэн будосъёсты вылтӥзы пазьгыны но, выжыязы кисьтыны но яра. 3-4 нунал куспын будосъёс тазагес адӟиськыны кутско ни. Нош пайдаез уката бадњым мед луоз шуыса, ву кисьтан азьын убоос вылэ пазьгыны луоз аммиачной селитра: 1 квадрат метрлы 50 граммен тырмоз.

Калийлы ёрмыкузы, куаръёслэн дуръёссы нырысь тӧдьыӟектыны кутско, собере куренялэс луо но куасьмо.

Будосъёслэн модосъёссы лябӟыны ӧдъяло, шуям кадь луо. Таӵе учыръёсы тупалоз хлористый калий (10 литр вулы 50 грамм). Та суретэн будосъёсты пазяно, нош выжыязы пазьгоно на котькуд квадрат метрлы 50-70 грамм сернокислой калий но умой-умой вуэн кисьтоно.

 Фосфор уг тырмы ке, куаръёслэн улзы лызпыръем-вож луэ. Нош помидоръёслэн модосъёссы но бусӥр луыны кутско. Куд-ог дыръя пеймыт-горд виштыос кылдо на. Будосъёс туж каллен будо. Соосты йӧнатыны юрттоз суперфосфат (котькуд квадрат метрлы 30 грамм).

Зэм, куддыр, музъемын фосфорез вань ке но, будосэ со уг тубы кезьыт возиськемен йырин. Озьы помидоръёссэс теплицае вазь поттӥсьёс ӵемысь адӟо лызэктэм удъёсты.

089921,огород

Фосфор уг тырмы ке, помидор уд бусӥр луыны кутске.

Бор тырмымтэ дыръя удъёс будыны уг вормо — куаръёс но модосъёс кырыжтӥсько. Огреч конгро луэ, каун (тыква), кабачокъёс вогыриё-вогыриё будо, кубисталэн кочоназ вамен гожъёс кылдо, гордкушман убо вылын ик сисьмыны ӧдъя, ӵужкушман сьӧд виштыё луэ. Ваньзэ тае вормыны луэ, котькуд квадрат метре 3 грамм борной кислота пазьгыса.

Котьмалэн аслаз кулэлыкез

Данакез сад-бакча во-зисьёс химия суретъёсты кутыны пумит луо. Соосты вошто кыедэн, пенен, сисьтэм турын-куарен но мукетыныз. Туж умой! Но татын но мае но сое тодыны-валаны кулэ.

Скал кыедэз гажало тужгес тросэз сад-бакча возисьёс, угось со музъемез небӟытэ. Одӥг пол кыед понэмлэн пайдаез 7 арозь шӧдӥське на. Но таин ӵош тросэз уг тодо: сое музъеме пононо 4 арлы 1 пол гинэ. Эшшо ке котькуд квадрат метрлы 4 килограммлэсь трос медаз луы со. Угось кыедо музъемын жаг турынъёслэн бервылъёссы туж ӝог сисьмо, таин сэрен отын азотэз мултэс луэ. Нош азот мултэс ке, бакча емышъёсын нитратъёс люкаськыны кутско.

Эшшо ыль кыедын трос пӧртэм инфекциез, жаг турынъёслэн кидысъёссы. Нош со бордысь потӥсь шунытлы, газъёслы, азотлы луыса емышъёс мултэс ӝог будыны кутско — соос озьы ик ӝог сисьмо но кема возьыны ярантэм луо. Зэм, кыед будослэн выжыез бордын ик луэ ке, со сутӥське, будыны уг вормы ни.

Умой луоз, кыедэз убоос вылэ 2-3 ар кыллемез бере поттыса.

Курег кыедын, азотэз, калиез, магниез, фосфорез сяна, вань бактериофагъёсыз но. Озьы со музъемез но узырмытэ, трос висёнъёссэ но быдтэ.

Нырысь ик сое 10 нунал ке но вуын котыса возёно. Кисьтамлэсь азьло музъемез  умой-умой коттоно. Пайдаез шӧдӥськыны кутскоз, ог арня ортчыса. Тулыс, гужем куспын пичиен-пичиен 3 пол кисьтаны луоз.

Чырсатэм жаг турын — сад-бакча возисьёс понна туж пайдаё маке, со кыедэз воштыны быгатэ. Дасяны но секыт ӧвӧл. Турын сяна, кулэ луозы на ву но азот удобрение. Берлоез турынэз ӝоггес сисьтоз. Озьы гужем ӵоже дасяны луэ 200 литр пала туж ӟеч удобрение, тырмоз со кӧня ке сотка музъемлы.

Зэм, суретэз дасяны уг яра корт вышкые. Мед луоз со пластиклэсь, яралозы 10 литрлэсь бадӟымесьгес ведраос но. Отчы тыроно жаг турын, ватсано кӧня ке гуматной удобрение яке 1 бадӟым пуньыен карбамид. Собере вылозяз ик кисьтоно ву но пытсано полиэтиленэн. Удобрение дась луоз, ог 2 арня ортчыса. Соку гидысь кадь зын потыны ӧдъя, сурет пеймыт-вож буёло луэ. Удъёс вылэ кисьтон азьын сое эшшо вуэн суралтоно (1:1), озьы 200 литр суретысь будосъёслы 400-500 литр «ческыт юон» потэ. Август толэзе котькуд кубиста но кияр уд выжые быдэс ведраен кисьтыны луоз. Мукетъёсыз будосъёс вылэ — ӧжытэнгес, кылсярысь, викторилы тырмоз 1-2 литрен.

Компост озьы ик лэсьтӥське жаг турынлэсь. Но таизлы кисьман вылысь дыр тросгес кулэ луэ. Со понна отын вань  азотэз, кальциез, фосфорез но пӧртэм микроэлементъёсыз.

Уг яра убоос вылэ ӝыныё кисьмам компостэз пазяны: отын кыльыны быгатозы на турынъёслэн кидысъёссы  но висён алятӥсь бактериос.

Кисьмамез бере нырысетӥ араз та удобрениын трос азотэз. Соин ик сое убоосы тырем  бере ог кык арзэ отчы мерттыны уг яра нитратъёсты пушказы капчиен люкась   гордкушманэз, салатэз, редисэз.

Эшшо компостын уг тырмы магниез но кальциез, соин таоссэ убоосы нимысьтыз ватсаны кулэ.

Пеньлэн пайдаез сярысь сад-бакча возисьёс пӧлын тодӥсьтэмез ӧвӧл. Озьы ке но куд-огез уг тодо: сое валатэк кутыку, умой карем интые, музъемез сӧрыны кема ӧвӧл.   Пеньын трос калиез, магниез, фосфорез, железоез, борез, марганецез, молибденэз. Но отын чик ӧвӧл азотэз. Соин ик азотэз нимаз ватсано луэ. Но огдыре соосты тырыны уг яра! Угось таин сэрен музъемын аммиак люкаськыны быгатоз.

Туспуктӥз А. Горбунов

 

Удмурт Дунне
By Удмурт Дунне Июнь 22, 2016 09:35