Мадьяр литература: Калык быре, кылзэ ыштыкуз

Удмурт Дунне
By Удмурт Дунне Июнь 16, 2016 08:18

Мадьяр литература: Калык быре, кылзэ ыштыкуз

арекеева

педагогика наукаосъя кандидат

Мадьяр литература котьку возьматылӥз кунэзлэсь улэм-вылэмзэ

Венгер литературалэн историез кӧня ке даур ӵоже кыстӥське ни. Солы кутскон сётӥз 13-тӥ даурын кылдытэм «Инмар Анайлэн бӧрдэмез» кылбур.

 Калыкез сайкатӥсьёс

Мадьяр литература юн герӟаськемын Венгрилэн историеныз, со пыр умой адӟиське, кыӵе вакытъёсты чидамын отын улӥсь калык. Венгрия котьку но лыдъяськылӥз Австрия империлэн оглюкетэныз, соин ик калык ялан нюръяськиз эрикез понна. Та умой шӧдӥське литератураын но. Та ласянь венгер литература матын луэ ӟуч литературалы. Мадьяр литературая специалист Ю. Гусев, кылсярысь, пусъе: «венгер но, ӟуч но гожъяськисьёс калыксылэн возьытлыкез но, сайкатӥсьёсыз но, со понна кыл верасьёсыз но вал, соос гижысь-пиньысь пыриськизы политикае, улон-вылонэн герӟаськем ужпумъёсы».

Шандор Петёфи кылбурчилэн (1823-1849) творчествояз революция но эрик валтӥсь инты басьто. Озьы «Эрик но гажан!» кылбураз со гожтэ:

Эрик но гажанэ —

Мынам сюлмаськонэ!

Гажан понна сёто курбон

Ас улонме,

Эрик понна уг жаля мон

Яратонме.

Берыктӥз А. Уваров.

Петёфи — революционер, ожгарчи, нюръяськись но… яратон сярысь паймымон чебер кылбуръёс гожъясь. Троссэ кылбуръёссэ со сӥзиз кузпалызлы Юлия Сендрелы. Гожъямъёсыз солэн котьку висъяськылӥзы калыклы матын луэменызы. «Мон сямен, поэзия — узыръёслы гинэ кунокуа ӧвӧл, кудаз пырыны луэ, ӟеч дӥсяськыса но пыдкукъёсты чилясь луытозязы сузяса. Поэзия — дун-чылкыт черк кадь, отчы пырыны луэ кутэн но, гольык пыд но», — тазьы шуылӥз Ш. Петёфи. Тодмо венгер гожъяськисьлэн улонэз куспетӥ луиз 1849-тӥ арын 31-тӥ июле Шегешвар дорын ожмаськонъёс дыръя. Мадьяр калык кема куректӥз на таӵе ыштонэз пумысен.

венгер кылбурчиос

 Венгрилэсь выльдӥськемзэ возьман

Кылбуранын озьы ик асьсэлэсь интызэс шедьтӥзы Эндре Адӥ (1877 — 1919) но Аттӥла Йожеф (1905 — 1937). Таослэн трос одӥг кадез. Кыксы но вакытэз азьпалтыса кадь вамышъязы. Критикъёс соослы йӧттылӥзы калыклэсь мудрон луэмзы, сям-йылолъёсты чакламтэзы понна — кылбуръёсазы авангардизм зол шӧдӥськылӥз. Эндре Адӥ тышкаськылӥз бере кылись страназэ,  адӟем кароно шуылӥз Западлэсь. Солэн кылбуръёсаз ваче пумит султо Шундыӝужан но Шундыпуксён, город но гурт. Адӥлэн туж адӟемез потылӥз выльдӥськем Венгриез. Ваньмыз-ӧвӧлэз солэн ог 15 книгаез потэмын.

Аттӥла Йожефлэн данэз сярысь вера со но: та кылбурчилэн вордскем нуналаз, 11-тӥ апреле, Венгриын пусъё поэзилэсь нуналзэ. А. Йожефлэн тросэз кылбуръёсыз пыӵамын вӧсь луонэн, басьтыны луоз «Чеберлыклэн кураськисез» (1922), «Анае но ӧвӧл, атае но» (1929), «Погырты капиталэз, эн бӧрд» (1930), «Туж вӧсь (1936) сборникъёссэс ик. Но таин ӵош ик солэн кылбуръёсаз вань югытэз, ненегез. Тодамы ваём, кылсярысь, нуны веттан чуръёссэ:

Чагыр синъёссэ кыне ин,

корка но кыниз чимызэ,

шобрет улын возь но чалмиз,

я, баб ни, пичи Балаже…

Шулан но, тупед но кӧло,

кампет вӧтаса ик изе,

нюлэс, емышъёс ныруло,

я, баб ни, пичи Балаже.

Берыктӥз А. Родионова.

Поэт, поезд улэ сюрыса, быриз. Шудтэм учыр-а вал со яке ассэ ачиз быдтӥз-а — тодмо ӧвӧл. А. Йожефез берпум сюрес вылаз 100 сюрслэсь ятыр адями келям.

 «Нюгат»

«Нюгат» («Запад») журнал потӥз 1908-тӥ-1941-тӥ аръёсы, редакторъёсыз вал тодмо писательёс Михай Бабич, Жигмонд Мориц, Ийеш Дюла. Татын ужасьёс ас азязы ужпум пуктӥзы: венгер литератураез выльдэм сяна, мадьяр лыдӟисьлы возьматоно шундыпуксёнпал литератураез но.

Дэжё Костолани (1885-1936) — журналэз поттыны кутскисьёс пӧлысь одӥгез. Со тодэ вал 6 кылэз: англи, немец, француз, испан, итальян, латин. Озьы со уно пӧртэм произведениосты венгер кылэ берыкъяз. Ас кылызлы но нимысьтыз саклык висъялляз, нюръяськиз чылкытлыкез понна, возиськылыны курылӥз мукет кылъёсысь пыӵась кылъёсты кутонлэсь. Нырысетӥ дунневыл ож бере Венгрия ыштӥз кык куиньмос музъемзэ, Костоланилэн вордскем шаерез но выжиз Сербилы. Соку писатель  шуиз: «Калык уг быры, музъемзэ ыштыкуз, кунгож воштӥськыку. Со быре, кылзэ ыштыкуз. Музъемез берыктыны луоно, нош анай кылэз уг луы».

Дэжё Костоланилэн «Мискинь нылпилэн ӝожтӥськонъёсыз» нырысетӥ кылбур сборникез потӥз 1910-тӥ арын. Нош 1920-тӥ аръёсы роман бӧрсьы роман — «Нерон, виресь кылбурчи» (1922), «Тюрагай» (1924), «Зарни дракон» (1925), «Анна Эдэш» (1926) — печатласько.

 Удмурт кылын

Кыкетӥ дунневыл ож бере ни тодмо луизы Шандор Вёреш, Янош Пилинский, Магда Сабо, Иштван Эркень но мукетъёсыз. Таос борды итӥськизы Дёрдь Петри, Имре Оравец, Петр Надаш, Петр Эстерхази, Дёрдь Шпиро но мукетъёсыз. Туалаосыз — Ласло Дарваши, Ласло Гараци, Янош Хай, Кристина Тот, Кристиан Гречо но мукетъёсыз. Туала венгер литературалэн вань аслыз тупась кылыз, со сэрттэ-пертче ужпумъёсты, кудъёсыз нокызьы но герӟаськемын ӧвӧл ни национальной юанъёсын.

Асьмелэн табере вань луонлыкмы венгер литератураез удмурт кылын лыдӟыны. Кылсярысь, «Дунай тулкымъёс Кам ярдурын» (1997) сборникез дасязы Иштван Козмач но В. Ар-Серги, соос уртче ужазы кылысь кылэ берыктӥсьёсын С. Матвеевен, И. Ивановен, В. Михайловен но мукетъёсыныз. Удмурт кун университетысь венгер кылъя люкетын дышетскемъёс но Венгрилэсь литературазэ асьмелы матэгес каро. Озьы «Чылкыт сюлэмын» (2009) книгае пыризы Аттӥла Йожефлэн кылбуръёсыз, берыктӥз соосты А. Родионова. Кыкетӥ книгаез (2011) дасяз А. Родионова, отчы шедизы Дэжё Костоланилэн новеллаосыз, берыктӥзы соосты Е. Ермакова, Е. Сунцова, Е. Эмырова но мукетъёсыз. Венгер кылысь удмуртэ ас вакытаз трос берыктӥз А. Уваров.

Удмурт Дунне
By Удмурт Дунне Июнь 16, 2016 08:18