Якшур-Бӧдья ёросысь Фрунзе нимо эштос: Кузё ӵуже ачиз пала

Удмурт Дунне
By Удмурт Дунне Июнь 9, 2016 12:50
SONY DSC

Кыӵе сюрес возьма азьланяз?

Коньдон поттыку, адямиез уг жаляло?

Якшур-Бӧдья ёросысь Фрунзе нимо хозяйство кылем арын гинэ районазы огез кужмоез вал. Туэ со кизьыны ик ӧз пота. Гидъёсаз ӟольгыриос гинэ ӟильырто на, шуыны луоз. Ужасьёсыз ульчае кылё. Ар талэсь азьло уго хозяйствоын кылдӥз выль кузё…

Котыр ласянь кесян

Якшурысь куашкась хозяйствоысь адямиосты утчаса, нырысь ик кожимы складъёс пала. Татысь уго йыг-дым вазем куара кылӥськиз, тапала дугдытэм машина адӟиськиз. Иномаркаысь адямиос городскойёс вылӥллям. «Тӥ басьяськисьёс-а?» шуыса юамысьтым нылкышноен воргорон воксё шуэрскизы: хозяйствоен кивалтӥсен кенешемын, вань документъёс МВД-ын ужасьёс киын,  пе. Асьсэос, лушкаськисьёс сямен, машиназылэсь номеръёссэ ватон вылысь пакетъёсын золъяны ӧдъязы.

Тысь куасьтон но шертон комплекс палагес вуыса, сюлэм ик чигиськиз. Корт листэн шобыртэм борддоръёсыз но липетъёсыз кесямын. Пушкысьтыз оборудованизэ  вандыло ни. Ваньмыз металлоломе кошке! Улэп лулэз кырныжъёс кесям сямен, складъёс но кытӥзэ луэ ишкамын.

Неужто фермаос котырын суред эшшо шимесгес? Кылӥськиз вал: кыедзэс гинэ но кин маин быгатэ нуллэ. Гид борддоръёс быдэсэсь на вылэм. Зэм, бќксэм уг кылӥськы. Огаз фермаын гинэ 130 йыр скал вань на. Нош куке-соку кысконо скалъёс гинэ 390 йыр вал. Ваньмыз-ӧвӧлэз сюроос 850 лыдъяськизы.

Пудо утисьёслэн сэрегазы пыроно кариськи. Буш кадь.

— Ӟечбуресь, кин ке татын вань-а?

Малы ке малпай вал, кыедэсь сапеген но кузь халатэн нылкышноосты пумитало шуыса. Нош пумитам кытысь ке дыртытэк потӥзы 2 удмурт воргоронъёс, огез воксё но ботинкаен. Абдрамелы валэктӥз: уж ӧвӧл ни, 4-тӥ мае хозяйствоысь 60 адями кие ужысь кулэстон сярысь ивортон вуиз. Отын гожтэмын: шоро-куспо уждунъя тыриськоз пособие. Со сяна, 2 толэзь ӵоже тыриськоз шоро-куспо уждун мында коньдон. Хозяйствоын шоро-куспо уждун 12 сюрс манет.

130 йыр скалзы вань на.

130 йыр скалзы вань на.

— Кыӵе улӥськоды? — юасько пудо утялтӥсьёслэсь.

— Коть ӝожтӥськы, коть эн — кытчы пырод? — лулӟыса вазизы воргоронъёс. — Частник — со частник ни. Тӥ мынам кисыям эн учке, шуэ но сё. Хозяйствое мынам, шуэ. Вань пудо Татарстанэ кошке. Юртсэ но вузасалыз, но гидлэн борддоръёсыз ёрос администрацилэн лыдъясько. Пудо сиёнэз гинэ но вузало ни. Силос кемалась келямын. Рулонэ биням турын бусыын вань. Одӥгез 1 сюрс манет сылэ. Пудо сиёнэз коть кельтэ, шуиськомы. Но милемыз нокин уг кылы. Тулыс муосты небӟытыны гинэ но ӧм поталэ.

— Лушкаськисьёс ӧз кылдэ на?

— Кызьы уз кылдэ? Лушкасез шедьтэ мае нуыны. Нуназе уг дӥсьто на кыедэз сяна вораны. Но пеймытэн пыдзы потэ. Кыед поттӥсь транспортёр гидысь ышиз. Нош со сектаез валэн гинэ уд нуы! Ваньмыз черметэ кошке. Борддорзэ но љоген качалозы ай.

— Ужась ӧвӧл шуыса, кузёмы хозяйствоез вузаны кутскиз, — борддор сьӧрысь егит пиосмурт шуак потӥз но вераськонамы итӥськиз, лушкем кылзӥськыса сылэм, лэся. — Ужасез лачак!  Ум но юиське, дисциплинаез возиськомы. Отӥяз шуиз, техника ӧвӧл. Туала сеялкаосты но комбайнъёсты лыктэмез берегес ик вузаз но, кытын мар луоз? Скалъёс висисесь, шуиз. Татарстанысь басьяськисьёс, гидэтӥ ортчыкузы, паймизы: милям, пе, хозяйствоез тазьы вузаны ӧй лэзьысалзы.

Воргоронъёс нимтулзэс вераны ӧз дӥсьтэ. Шара вераськыны алэмын, шуизы. Бандитъёсын кышкатъяло, пе. Ӝожтӥськонлэн пайдаез но, пе, ӧвӧл. Хозяйствоысь валтӥсь бухгалтер Ольга Петрова Президентлы Владимир Путинлы но  югдурзы сярысь гожтэм вылэм ни. Но та но быронлэсь ӧз утьы.

Кылӥсь но юрттӥсь ӧвӧл

—  Сюлэм вандӥське. Синвуэн ик бӧрдӥськом, — шуэ Ольга Петрова. — Гаражын чиньыен лыдъямон техника сылэ на. Бухгалтериын 3 кузя пукиськом, дунзэ но ум тодӥське. Кузёмы басьяськисьёсыныз ачиз кенеше. Озьы хозяйствомес син азямы кесяло ни, нош ми номыр карыны ум быгатӥське! Трактористъёс техниказэс уг чаклало, пудо утялтӥсьёс скалъёсты уг бызьылыто. Адямиослэн осконзы но ужаны мылкыдзы ӧвӧл. Ёросысьтымы ик адямиос хозяйствоез басьтыны мылкыд каро, но кузёмы уг вуза. Ёрос администрациен но Прокуратура пыр гинэ вераське. Нош макем жаль быдэс улонзэс хозяйстволы сӥзем животноводъёс! Школазэс быдтыса, уноез соку ик колхозэ кылизы. Соослы колхоз квартира висъяз. Адямиос оскизы, пенсие потытозязы, ужазы ке, юрт соослы ик кылёз шуыса. Выль кузёмы табере квартираосты бушатыны яке басьтыны косэ. Ог 600 сюрс манет дун пуктэ. Нош кытысь гуртоослэн сомында уксёзы? Банкъёс кредит уг сёто. Уноез пенсие потон арлыдазы вуэмын ни. Кытчы ке уже интыяськыны быгатӥзы ке но, кредит мед сётозы шуыса, ӝыны ар выль интыын ужано ук. Нош кузёмылэн сомында возьмамез уг поты — солы али ик коньдон кулэ. 7 семья улон интытэк кыле. Ваньзэ тае Президентлы гожтӥ вал. Но интыысь кивалтӥсьёс югдурез мед эскерозы шуыса валэктон вуиз. Ми Гурт удысъя но сиён-юнъя министерстволы гинэ но кулэ ӧвӧл! Кивалтӥсьёс монэ буйгато: улон интытэк уд кыле. Мон ачим сярысь сюлмаськисько кожало, лэся. Мынам аслам коркае вань. Мон, мукет адямиос понна сюлмаськыса, гожтӥ. Собере улон инты — со тужгес висьытӥсез ужпум ӧвӧл! Хозяйство быре! Малы та нокинэ уг сюлмаськыты?! Умой ужаськомы вал. Гид гинэ вуж. Араз 5-6 миллион манет чылкыт прибыль поттыны быгатылӥм…

SONY DSC

Куашкам склад бордын — ватэм номеръёсын машина.

Уж шедьтыны быгатӥсез Фрунзе нимо огазеяськонысь кошкиз ни. Но со егитъёс. Туннэ ог 40 адями ужтэк кыле. Уноезлы, пенсие потытозязы, кӧня ке ар ужаны кылемын. Гуртоос верамъя, Якшур-Бӧдьялан али уж шедьтыны секыт. 3-4 колхоз ужа на, но соос ваньмыз кыдёке пуксемын. Кытчы мынод?

Ёрос администрациен кивалтӥсьлэн воштӥсез Сергей Широбоков та пумысен мар вераны ик ӟудэ.

— Берло аръёсы Фрунзе нимо хозяйствоысь нокыӵе ӝожтӥськонъёс ӧз вуылэ. Уждун, выт котьку дыраз тырылӥзы. Соин ик малпась но ӧй вал, со бырыны кутскоз шуыса. Зэм, туэ пудозэс сюдыны фуражзы ӧз тырмы. Комбикорм палэнысь басьтоно луизы. Но та гинэ хозяйство понна секыт ӧвӧл, — шуэ Сергей Дмитриевич. — Ваньмыз потэ кузё бордысь. Азьвылэз пенсие потӥз. Огазеяськонзэ вузаз Можгаысь ужбергатӥсьлы. Нокин ӧз но малпалля, таид аслыз коньдон поттыны гинэ вуэмын шуыса. Ужалом, шуиз вал. Но сӥзьыл суред воксё мукет адӟиськиз. Тол улэ кизьыны потазы ик, гырем но каризы. Но сентябрь толэзе кузё кунянъёсты вузаны кутскиз. Валэктӥз: ужаны нокинлы, али скалъёсты утён сярысь сюлмаськоно, гидъёсты выльдоно. Но ужбергатӥсь пудоез шоры вуз шоры кадь учкыны кутскиз, кӧня тонна сӥль таослэсь потоз шуыса, лыдъяны ӧдъяз. Соку гинэ тӧллэсь кудпала пельтэмзэ валамы. Но сое кутыны ӧйлась ни. Гурт удысъя но сиён-юонъя министерствоысь адямиосты но ӧтчаллямы. Но пайдаез ӧвӧл.

Туэ бусы ужъёс дыръя артысь хозяйствоос — «Старые Зятцы» но «Исток» — быгатэмзыя Фрунзе нимо огазеяськонлэсь кӧня ке гектар музъемзэ кизизы ик. Мукетыз хозяйство трос аръем турынъёссэ утялтыны чакла. Урожай калтыны луоно: арлы быдэ татын клевер но люцерна кизьылӥзы уго.

— Мар возьма азьланяз хозяйствоез? — юасько.

— Кыӵе азьланез солэн? — лулӟе Сергей Широбоков. — Частной хозяйство бере, отчы милям но, министерстволэн но пыреммы уг луы. Макем ичигес понӥд, сокем уногес коньдон поттӥд — кузёлэн сыӵе арифметикаез. Туннэ хозяйствоез басьтыны мылкыд карисьёс асьме ёросын но вань. Но кузё быдэскын уг вуза. Люкетэн-люкетэн вузаса уго, барыш уногес поттыны луэ. Солы нокыӵе уг пото адямиос. Со — торгаш.

Елена Сараматова

Туспуктӥз В. Беломорских

Удмурт Дунне
By Удмурт Дунне Июнь 9, 2016 12:50