Кристина Тот. «Пиньтэм»

Удмурт Дунне
By Удмурт Дунне Июнь 15, 2016 16:45

Верос

Нуназе бере метроын калыкез тачак. «Москва карлуд» нимо дугдылонниын кӧшкемыт трос адями пуксе, шорысез вагон быдэсак тырмиз. Арлыдо, бабыллям йырсиё дама алвылаз кыллись сяська узьымъёсты тупатъя, вӧзаз пукись эшез бӧтьыртэ: солэн, пе, кылем арын басьтэм гераньёсыз, сыӵе кык полэс бурдъемъёсыз, англи выжыысь, ошыса возьыса но, толэз потӥллямтэ. Быдэсак вандылӥ но, пе, соосты, кызьы Эдитке косӥз, озьы ке но ваньмыз быриз.

Тае кылыса, узьымъёсын дамалы туж дӥсьтӥсь малпан йыраз лыктэ но, табере ини со кутске зульыны: вань политикъёсты, пе, одӥгзэ но кельтытэк, ошылыны кулэ. Озьы вераськыса, кышномуртъёс лулӟыло, сюлэмшугъясько — малпанзэс быдэстон сярысь  сюлмасько, лэся.

нылпи

— Яке ыбылыса Дунае куяно ваньзэсты! — сайкытске пересь эшезлэн ымнырыз. Шумпотэ таӵе тузӥ малпанэзлы, собере сое ик эшшо кык пол шара вера на, оло, котырысьтыз адямиос пӧлысь кин ке пумитаз куаретоз шуыса. Нокин номыр уг вазьы, одӥг пересь пиосмурт гинэ йырыныз огсыр сэзъя, озьы ке но со Паркинсонлэн висёнэныз сэрен, дыр, малы ке шуоно пырак «Эрш Везер карлудозь» ик йырзэ сэзъямысь ӧз дугдылы.

«Баттяни карлудысен» югыт йырсиё кышномурт пичи пиеныз вагонэ пуксизы. Анаез пыдлосьгес пуконъёсты но учкылэ ке но, нокытысь но буш инты уг шедьты. Нылпиезлы юн куараен, кутӥськыны косыса, вазе, соизлэсь кизэ ачиз ик поручень вылэ но понэ. Шуак собере ик кышномурт ӧс вӧзысь буш интыез синйылтэ, но соку ик валатске, малы отчы нокин но уг пуксьы: балонь плащен, кӧтурдэс вылаз уськытӥськыса, кукъёсыз вискы кырсь нейлон пакетъёсты пуктыса, пиньтэм пиосмурт изе. Пинал котыр утчаське, собере анаезлэсь улмозэ курыны кутске.

— Дорын, кидэ миськемед бере, — шуэ анаез.

«Кошшут карлудын» нош ик трос адями пуксе, со куспын сяська узьымъёсын кышномурт но солэн эшез потон пала туйнаськыса вамышъяло. Ӧжыт гинэ потытэк уг кылё.  Пияш вагонлэн пыдлоязгес кемдэ, ӵапак изись пиосмурт вадьсы. Шораз долкаса учкыны кутске. Сое шӧдыса, пиосмурт синзэ усьтэ. Уйжомыса котыр утчаське, кытын ай со шуыса.

Пичи пияш вераськонэз мытэ:

— Тон бомж-а? Соин-а сыӵе зын?

Анаез гордэктэ но нылпизэ мукет пала берыктэ, сопалаз мед кутӥськоз шуыса. Бомж уг вазьы, йырыз берен усе, табере со ини быдэсак лэзиське буш кылем интые.

Анаез мыкырске, шыпыртыса валэктэ, агайлэн, куанерлэн, ӧвӧл пыласькон висъетэз, улон интыез.

— Соин-а сыӵе зын потэ? — шара выжыятэ пинал. Тросэз, таӵе вераськемез кылыса, мыняло. Со вие одӥг инты буша, анай ӝог гинэ пуктэ отчы пичи пизэ, но табере ачиз ини солэн кияз улмо донге, оло, шып кариськоз шуыса. Буйгатыны удалтэ. Пинал чапкетыса сиське, пыдыныз шонаса, пуке, ваче пумит пукись зын агай шоры дырын-дырын учкылэ. Со вакыт калык кулэсме, но «Деак карлудын» нош ик тросаз туйнаське, ӧс палан донгаськон кутске. Тумошо адске, кызьы ваньмыз али пуксисьёс кыстӥсько буш пукон пала, собере, бомжез адӟыса, берлань сётӥсько. Табере мон пиналэз уг адӟиськы ни, анаезлэсь поручень борды кутӥськем кизэ гинэ синйылтӥсько мугоръёс вискытӥ.

Собере мон калык тулкым нуэмъя нош ик вагонлэн пыдлоязгес сюрисько. Выльысен учкисько: пичи пияш, кияз улмозэ кутыса, кышкам ымнырын пукон вылаз азьлань-берлань шонаське.

Мар луиз таин? Гуньдӥз? Яке серекъя мае ке? Кызэ? Уг кызы, ымзэ гинэ киыныз ватэ. Ымпушсэ шат куртчиз? Но, иське, малы уг бӧрды? Адӟисько, улмо виресь шуыса.

Номыре но уг валаськы, сюлэмшугъяськытэ та кылтэм сцена. Анай шуак лаптӥське но сумказэ пиналлэн алвылаз понэ. Пыдъёс вискытӥ киыныз  выжез маялля, мукетъёсыз но сюресчиос, вӧзаз лаптӥськыса, юрттыны кутско.

— Татчы усиз кытчы ке но! — возьматэ пинал выж шоры.

Пиньыз усем вылэм.

— Выре вал ини, — выж вылысь утчаськемысь дугдытэк, валэктэ сюресчиослы анай.

— Малы кырымпыдэсад ӧд сялӟы, а? — берыктӥське со пияш пала.

— Сялӟи вал, но уськытӥ.

Анай табере ваче пумит сылӥсь пуконъёс палась котыр утчаське, тросэз солы юрттыны выро. Пияш ӝож куараен ёртэ:

— Табере фея мыным номыр но уз сёты-а? Пиньы ӧз ке луы, номыре уз вайы-а?

Со вакыт татуировкаосын шобыртэм, бадӟым мугоро пиосмурт ӵапак отчы кыстӥське, но туганэз соку ик шораз лек кеське:

— Тон, шузи, мар выриськод? Вылаз лёгиськемед потэ-а?

Шунёк кепыра, зэм но, медам гинэ лёгиськы вылэм пинь вылэ, ёк-моколёк. Соин сэрен нылашезлэн курткаез борды кутске: тупатъя сое, кыска, бур паласен но, паллян паласен но одӥг кадь мед луоз шуыса. Таӵе дӥсен ветлыны туж пӧсь, соин ик йырам малпан лыктэ, та нылаш ӵыж-выль куртказэ чеберъяськон понна гинэ дӥсям шуыса.

— Эшелэн пӧртэм пумо пужыосыз вань. Вуроз курткаяд, кури ке, — шуэ бадӟым пиосмурт.

Нылаш пельпумзэ ӝутъя, зэмзэ вераса, сое али пиньлэн кытынэз гинэ сюлмаськытэ. Выж шорысь синзэ уг ик вошъя. Веранэз ик ӧвӧл, солэн но пинез шедьтэмез, сое нылпилы сётэмез потэ. Нош шунёк ялан нылашезлэсь куртказэ учкылэ, табере ини вылысьтыз кыӵе ке саптаськемзэ шедьтэ.

— Таиз нош мар?

Чиньызэ дыльдыен  коттыса, ӵушылэ. Кожалод, кыӵе ке моторез чылкытатэ но тупатъя. Нылаш — мотоез, тани-тани вылаз лёгиськоз но заводёз.

Со вакытэ «Штадионокын» пуныен нылаш пуксе. Немец овчарка выж вамен выдэ но, секыт шокаса, кылле. Соку ини анай утчаськемысь дугдэ но пиналзэ буйгатыны ӧдъя.

— Озьы ӧвӧл со. Фея пиньыдлэн усемез сярысь умой тодэ, соин одно ик мае ке но ваёз.

Паркинсонлэн висёнэныз курадӟись пиосмурт огсыр, соглаш луыса кадь йырыныз шона, пинь феяослэсь сямъёссэс тодӥсь мурт кадь. Озьы ке но пичи пияш уггес оскы анаезлы, малы ке шуоно татчыозь фея паймымон кузьымзэ, пиньыныз воштыса, сётъялляз ук.

Бадӟым воргорон но солэн туганэз выдэм пуны вамен вамышто но «Бубыли урам» дугдылонние васько. Пинал лӧптэ, со вера, нылпи садын «Бубыли» группае ветлэ шуыса. Кельше солы, одӥгез метро дугдылонни  садысь группаезлэсь нимзэ нуллэ шуыса.

Бомж нейлон пакетъёссэ тупатъяны кутске, кыксэ пичиоссэгес бадӟымаз туйна, собере кисыысьтыз выльзэ поттэ но сое но мукетъёсыз вӧзы туйна. Малпаськыса учке  пакетъёсыз шоры: маиз ке но татын умойтэм кадь. Шуак валамон луэ, бомж выж шоры долкамын шуыса.

Пакетъёссэ киысьтыз лэзьыса, каллен гинэ мыкырске, но  «Эрш Везер карлуд» дугдылонние вуон азьын пияш пала берытске — кузь гижыё, ӵуж чиньыосыныз чепыльтыса, шумпотонэн пачылмем ымнырын сюрем пиньзэ сётэ.

Берыктӥз Екатерина Ермакова  

Туспуктӥз Ольга Корепанова      

 

Удмурт Дунне
By Удмурт Дунне Июнь 15, 2016 16:45