Кинъёс соос табере?

Удмурт Дунне
By Удмурт Дунне Июнь 30, 2016 15:20
eefb7504.bw-crop503x482x56x3-fit990xNone-q10.1

Курт Воннегут: адямиос витё выжыкылъёсты, малы ке шуоно улонын укыр трос пӧяськон.

Кызьы асьмеос син азямы пуктӥськом Америкалэсь туала культуразэ? Нырысь ик тодэ лыкто Голливудын пуктэм фильмъёс. Соосын ӝутэм ӝужыт борддор сьӧрысь шуг адӟыны литературазэс.

Голливуд возьматэмъя Америкаын кыӵак суперменъёс уло, соос азьло Россиысь лыктӥсь коммунизмен нюръясько вал, али мафимес вормо, я инопланетянинъёсын ожмасько. Американец «Макдональдсын» кыӵе ке но булкаен котлетэз, «Кока-колаен» гылтыса, гумыл-гамыл ньылэ но тупыр-тапыр бызе «мечтазэ» быдэстыны. Со «мечтазы» но соослэн коньдон дуронэн но тодмо луонэн герӟаськемын. Тон визьмо, но начар ке, эн возьматы визьдэ — сереме уськытозы, школаез горд дипломен йылпумъямын, нош ужа выж миськисьын шуыса. Визь, тодон-валан уг ваё ке узырлык, соос воксё кулэ ӧвӧл.

Америкаысь калык но огшоры улонэн улэ, заводын я библиотекаын ужа, яратэ, керетэ шуыса, мыным усьтӥз Курт Воннегут «И кто я теперь?» веросэныз. США-ысь пичи городын ужа театральной кружок. Валтӥсь рольёсты отын шудэ вуз карись Гарри Нэш — огшоры улонын востэм, тексттэк кык кылэз герӟаны быгатӥсьтэм кышнояськымтэ воргорон. Роль сётэмзылы быдэ со огкадь юа: «Кин мон табере?»

Огаз спектакльын солэсь кузпалзэ шудыны косо егит, чагыр синмо, чебер, но кезьыт Элен Шоу нылэз.  Элен та городэ 2 толэзьлы гинэ лыктэмын бере, уг тоды, Гарри сцена вылын гинэ тодмантэм воштӥське но Марлон Брандо выллем пӧсь воргоронлы пӧрмытске, вӧзаз шудӥсь мукет актёръёслы но мылкыдзэ но талантсэ палатэ шуыса. Элен сцена вылысь Гаррилы синтэм-пельтэм синмаське. Но кызьы та «ымныртэм» пиосмуртэз ас палад берыктоно? Эленлэн, нырысь учкыса, визьмыз туж ик трос ӧвӧл кадь, но со Гаррилы книга кияз мыче — озьы соос ог-огзылы синмаськемзэс верало, Ромео но Джульетта кариськыса, бӧрысь кузпалъясько но уло… книгаосъя. «Таяз арняе мынам кузпалы Отелло вал, монэ яратӥз Фауст, лушказ Парис», — синъёссэ уллань лэзьыса, эшъёсызлы шуылэ Элен.

Пыдлось провинцилэсь пурысь улонзэ дырын-дырын югдытъя исскуство — милям Ижамы П. Зоринлэн туала драматургияя но режиссурая центраз пьесаосты лыдӟон кадь.

 Ольга Вахитова

Удмурт Дунне
By Удмурт Дунне Июнь 30, 2016 15:20