Йыр вылын — тылы

Удмурт Дунне
By Удмурт Дунне Июнь 22, 2016 16:25

Йыр вылын — тылы

дарали, тылы

Дарали Лели вылын — Полинаен лэсьтэм тылыйыр.

Алнаш ёросысь Байтэрек гуртысь Пелагея Куликовская — кибашлы. Но чильпаськон, керттӥськон солы тунсыко ӧвӧл. Зарни киосыз басьтӥсько аспӧртэм ужъёс борды. Алигес нылаш дасяз… тылыйыр.

— Азьвыл мон, тодмоосылы кузьманы шуыса, бубыли галстукъёс вурылӥсько вал, — вера Пелагея. — Нош али синмаськи индеецъёслы. Соос удмуртъёс кадесь ук: ымнырзы — паськыт, синъёссы — сюбегесь. Тылыйыръёсты, ӟуч сямен вераса — роучъёсты, индеецъёс дасяло вылэм пинал быркытлэн (беркут) сьӧд-тӧдьы тылыосызлэсь. Роуч — огшоры изьы ӧвӧл. Со, пе, уте син усемлэсь, йӧнатэ висёнъёслэсь. Соин ик та йыре пононэз нуллӥзы индеецъёс пӧлысь тужгес гажамон адямиос гинэ — вождьёс но кышкасьтэм ожгарчиос. Мынам быркытэ ӧвӧл. Вазиськи песяелы. Со ӟазег но ӵӧж тылыос сётӥз.

Роучез дасян понна кулэ: 27 бадӟым тылы — 11 сьӧдэз (ӵӧжлэн), 16 тӧдьыез (ӟазеглэн); тӧдьы но сьӧд юн басма, кулэсь басма, вень, огшоры сӥньыс, мулине сӥньыс, канва, поролон, инӟыос (бисер), бельевой резинка, резак.

  1. Ку басмалэсь йыркерттэт нерге лэсьтоно. Со луоз роучлэн инъетэз (1-тӥ суред).
  2. Канваез — пасьталаез 5 сантиметр, кузьдалаез 20 сантиметр — мулине сӥньысъёсын пужъятоно, отчы инӟыос вуроно. (2-тӥ суред).
  3. Поролонлэсь 2 котыресъёс вандоно — быдӟалазы 5-7 сантиметр. Котыресъёсты тӧдьы басмаен шобыртоно но чеберъяно.
  4. Котыресъёсты но канваез юнматоно йыркерттэт борды.
  5. Ӟазег тылылэн пумаз резакен пась лэсьтоно. Тылылэсь пумзэ сьӧд басмаен бинялтоно но йыркерттэт борды юнматоно. Тазьы лэсьтоно котькуд ӟазег тылыен. Висказы тырылоно на ӵӧж тылыосты (3-тӥ суред).
  6. тылыосты сӥньысэн, йыре пононлэн пуш палтӥз вурыса, юнматоно.
  7. Поролонлэсь котресъёс борды юнматоно кык тылы (4-тӥ суред).
  8. Тылыйыр чорк-чорк мед сылоз шуыса, солэн пуш палаз вуроно резинка.

 

тылыос

 

 

Ольга Корепанова

 

 

 

Удмурт Дунне
By Удмурт Дунне Июнь 22, 2016 16:25