Июнь — чехонь кутон вакыт

Удмурт Дунне
By Удмурт Дунне Июнь 21, 2016 16:45

Майлэн пумаз, июньлэн кутсконаз чехонь, уллёе люкаськыса, мызь лэзе. Та вакытэ ик со визнанэ тросэн шеде. Соин но тросэз чорыгасьёс, алонъёс шоры учкытэк,  резинка шуон визнанъёсазы 3-6 но курик быртто. Нош мызь лэзён вакытэ кык курикен гинэ визнаны яра.

Июнь - чехонь кутон вакыт.

Июнь — чехонь кутон вакыт.

Чехонь туж яратэ кут нумырез (опарыш). Мед зыгатоз шуыса, пӧяны луоз пенопластэн но: вуэтӥ уясь пырыос чорыгъёсты бордазы кыско. Ми эшъёсынымы чехоньлы ветлӥськом фидер визнанэн, 1-1,5 метръем поводок пуктӥськом, курике пенопласт юдэсъёсты бырттӥськом. Чорыгтэк ноку ум бертӥське. Чехоньлы сиён (прикорм) сярысь но нимысьтыз сюлмаськонэз ӧвӧл, мед со луоз тӧдьы тусъем но пурӟись. Фидер кормушкае пононо вуэн коттэм сухари юдэсъёс, геркулес яке кокос пыры (милемлы тужгес яра берлоез). Ву пушкы лэзем бере соос лӧптыны ӧдъяло но чорыгъёсты бордазы кыско.

Чехонь — карп выжыысь чорыг, но висъяське сюбег но кузялэс мугорыныз. Та чорыглэн кузьдалаез ог 50 сантиметр, секталаез 500-600 граммозь вуэ. Тросэн возиське Кам, Ватка, Сива шуръёсысь чылкыт вуосын, мур кожъёсын. Сие векчи лулосъёсты но пичи чорыгъёсты. Сӥльыз тӧдьы, ческыт.

Чехонь тупа тӧлатыса (вялить карыса) сиыны. Сузям бере чорыгез сылалтоно. 1 килограммлы кулэ луоз 100 грамм сылал. Сылалэн пызьнам-зырам бере чорыгез 3 нунал ӵоже пачкатыса возёно. Собере, мултэс сылалзэ гылтыса, 3-4 нуналлы тӧлатыны ошоно. Ческыт сиён дась.

Дмитрий Жигалов

Туспуктӥз А. Горбунов

 

 

Удмурт Дунне
By Удмурт Дунне Июнь 21, 2016 16:45