Иштван Эркеньлэн гожъяськон дуннеез — пумтэм-йылтэм зарезь

Удмурт Дунне
By Удмурт Дунне Июнь 15, 2016 16:38
иштвань

Иштван Эркень

Татын юмор, гротеск, сатира но абсурд огазе сураськемын.

Ӟуч лыдӟисьёслы со тодмо луэ «Семья Тотов» но «Кошки-мышки» пьесаосыныз. Эркень драматург гинэ ӧвӧл, туж усто прозаик но: вероссэ нырысьсэ лыдӟеме бере ик мон синмаськи та гожъясьлы. «Одӥг минутъем веросъёс» бичетаз азькыл интые — «Индылон», отын автор валэктэ, кызьы та пичи веросъёсты умойгес луоз лыдӟыны,  пусъе: соос кузесь ӧвӧл ке но, котькудӥз ас понназ произведение луэ. Веросъёс татын, зэмзэ но, вакчиесь: кык, одӥг яке ӝыны бам, яке быдэс верос — куинь веран, сыӵеосыз но вань. Нырысьсэ лыдӟыку, кожалод, оло, серекъян понна гинэ гожтэмын. Кыкетӥзэ лыдӟем бере малпаны кутскиськод: оло, та гожъясь котыр дуннемы сярысь мае ке сыӵезэ тодэ, мае ми ум адӟиське яке адӟыса но ум валаське? Куддыръя веросъёсыз серемесэсь, куддыръя — ӝожмытэсь. Кудъёсызлэсь пуштроссэс соку ик валаны но шуг (тани, шуом, «Пытсам ӧсъёслэсь кышкан» верос: Ференц Лист лымыпог (снеговик), тулыс мылкыдлы сётскыса, синмаське куинетӥ классын дышетскись нылашлы — ӧсъёс сярысь пал кыл но ӧвӧл, мын но вала, мар меда верамез потэ вал гожъясьлэн та веросэныз!). Огазея вань веросъёсты малпан: улонэз (котькыӵе секыт яке шузи-мази мед со адскоз) вылӥ дунлык чотын дунъяно.

Эркеньлэсь веросъёссэ лыдӟемъя лыдӟем потэ: азьланезлы оскон мылкыд, адямилык лыдӟисьлы но одно палаське — малпанъёс дун вуэн пылатӥськем бере кадь чылкытало, мылкыд ӝутӥське. Мон понна Иштван Эркеньлэн произведениосыз — сюрс пӧртэм ымныро Будапешт, нап мадьяр мылкыд, Дунай вылысь выльдӥськон вайись тӧл, ӝокыт гужем куазен жаль зор: соос юртто котыр дунне шоры мукет сямен учкыны, огшорыысь паймымонзэ адӟыны. Мон малпамъя, книга, кудӥз лыдӟисьлы умой мылкыд кузьманы, мукет адямилэсь сюлэмшугъяськонъёссэ шӧдытыны быгатэ — со умой книга.

Иштван Эркень. «Кӧня улэ писпу?»

Алёна Петрова

 

 

 

Удмурт Дунне
By Удмурт Дунне Июнь 15, 2016 16:38