Иштван Эркень. «Кӧня улэ писпу?»

Удмурт Дунне
By Удмурт Дунне Июнь 14, 2016 16:51

Иштван Эркень. «Кӧня улэ писпу?»

иштвань

Иштван Эркень.

Верос

Бан кышно тыл ӝуатӥз. Педлон югыт ке но, фронт матэктэм дырысен тылэз вазьгес ӝуатъяны тыршылӥз. Уката ик туннэ, угось коркан огназ кылиз, нош кырын сокем нап бус бугыръяське, укноысь мычиськид ке, кенер ышем, кожалод.

Кӧй возён бидонзэ но эмалированной кастрюльзэ поттӥз. Тыл вылын лопыръяськыса пӧзись вуэ сода поныкуз, ӧсэ йыгаськись луиз. Куалектӥз. Катанчиез палэнтӥз.

Немецъёс со ӧй вал: ӧс куспын кышномурт сылэ.

— Вождэс эн вае, Бан Шандоръёс татын-а уло?

— Мон Бан Шандорлэн кышноез, — вазиз Бан кышно.

Тодмотэм кышномурт вужмем, модаысь потэм дӥськутэн пӧрмытскемын. Утялтымтэ, пурысьтам йырси вылаз — горшок порма гын шляпа: таӵезэ кызь ар талэсь азьло поттэм киноосысь гинэ адӟод на. Сьӧдпӧсьтурын кӧжы быдӟа пияла синъёсыз,  шуккем муртлэн сямен, пӧртэм пала учко.

— Ялонъя лыктӥ.

— Кыӵе ялонъя? — паймиз Бан кышно.

Вазь тулыс но сӥзьыл гинэ ялон сётъяллязы, толалтэ — ноку но. Вуэм кышномурт соку ик усьтӥз бадӟым ридикюльзэ, со тырмемын пӧртэм окты-калтыен, кулэ арбериосын но синпельлы кельтэм чыры-пырыосын, будто ке вань котырзэ сьӧраз нуллэ. Кышномурт поттылыны кутскиз: ӵужектэм лентаен керттэм гожтэтъёс, вужмем часъёс, туспуктэмъёс, эмъюм пиялаос, киное ветлэм билетъёс но буш, озьы ке но духи зын флаконъёс. Туспуктэмъёсын пуксемын тылыё шляпаен пинал кышномурт, кудаз немец овчаркаен, кудаз огназ, но туспуксемъёсысь ымныр тус ӵушиськыны кутскем ини,  сэрегъёс погмаськемын.

Манетъёс, чебермаськонъёс но усьтонъёс жингыртон куспын кышномурт шедьтӥз ик погмаськем газет ялонэз. Ялон вылысь бадӟым букваен гожтэм кылъёсты гинэ лыдӟыны луэ на: «Бан Шандорлэн емышо писпуосыз, Тэт».

— Ми со, бен, — шуиз Бан кышно. — Но кузёе ӧвӧл гуртын.

— Мынам нош вить часэ кошкись поездэн доре бертэме потэ ни вал.

— Картэ отчыозь уз вуы, — вераз Бан кышно. — Гуртэ кошкиз: ӵуказе парсь вандӥськом.

Кышномурт, ӟигарыз бырыса сямен, котыр учкиз. Кӧдэктэм ымныр вылысьтыз, штукатурить карем борддор вылысь сямен, пудраез паласькыса ломдылӥз. Нокыӵе мылкыдзэ ӧз возьматы, но ӵапак со маска музэн кынмем ымныраз вал мар ке сюлэм позыртӥсез — клоунлэн синкылитэк бӧрдэмез кадь.писпу

Бан кышно дунъёс сярысь номыр но уг тоды. Одӥг но ӝыны ар гинэ ортчиз кузпалъяськемзы дырысен. Шандор кышнозэ тӧллэсь но утьыса возиз, чебер куазь дыръя гинэ садазы ӵош ветлӥзы. Озьы ке но Бан кышно юано кариськиз:

— Маин ке юрттыны быгато меда?

— Писпу басьтыны ӧдъясько, — пумитаз вераз пурысьтась кышно.

— Чеберлы писпуосмы ӧвӧл, — шуиз Бан кышно. — Емышо писпуосмы гинэ вань.

— Мыным маке шат, — малпаськись тусын вазиз басьяськись. — Чебер гинэ медло.

— Вань ньыль аресъем писпуосмы.

— Уг ик тодӥськы, — вазиз кышномурт, азьло кадь ик малпаськыса, котыр учкылыса. — Мыным бадӟымгес кулэ вал.

— Ӧжыт возьмады ке, мон возьмато тӥледлы садмес.

Бан кышно кастрюльёссэ пӧсь вуын миськиз. Чылкыт ӵушконэн кизэ кќсатыса, азбаре пальккиз вузэ. Улонэн пачылась егит нылкышно ныгыль-ныгыль, вань выросъёсыз сокем небытэсь но чебересь, синэз ик шорысьтыз воштыны уд ӵыды. Нылкышно кизэ ӵушылытозь, куно вазьыны ик ӧз дӥсьты. Собере юаз:

— Нуны возьмаськоды-а?

— Бен, — шуиз Бан кышно.

— Мынӥськом-а? — юаз кышномурт, зорлипетсэ (зонтиксэ) суй вылаз ошыса.

Куазь дэри. Пурысьтам кышномурт ӝужыт пыдберо туфлиеныз эли-кеби вамышъя. Вить минут пала гурезьлань мынӥзы. Бус пӧлын, ӟарыт карандаш гожъёс выллем, адӟисько кык-куинь аръем писпуос.

— Таиз ваньмыз джонатан, — котырак возьматэ Бан кышно. — Таиз батул. Таиз ранет. Таиз лондон пепи. Татын абрикосъёс кутско ини.

Куно кышномурт дугдӥз.

— Мыным огез но уг кельшы, — шуиз. — Мон малпасько вал, соос бадӟымесьгес шуыса. Юнгес, йыг-йыггес, кужмогес.

— Соку ойдолэ тапалагес, — ӧтиз Бан кышно. — Миндальпу витетӥ араз емышсэ сётэ ни.

— Емышез мыным кулэ ӧвӧл. Ӧвӧл ни мынам дыры вить ар возьманы.

Кышномурт дугдӥз, зорлипетэныз писпуэз выретӥз.

— Нуныкарам пыктос, —  шуиз со. — Рак.

— Осто Инмаре! — шуэрскиз Бан кышно. — Вандылыны нош уг луы-а?

Пурысьтам кышномурт, синмыныз пыр сӥсъяса кадь, шораз учкиз.

— Ку-о возьмаськоды? — шӧдтэк шорысь юаз.

— Мае? — Бан кышно паймыса шораз учкиз. — Южтолэзе.

Кышномуртъёс азьлань вамыштӥзы. Вылӥе тубись сюрес кузя бакча пуме вуо ни вал. Сюрес одӥг-кык вамышлы гинэ адӟиське: нап бус, куэм нуны кутэт музэн, ваньзэ шобыртэм.

— Таиз мар? — юаз кышномурт, лы выллем вайёсыныз ӵаштыртӥсь, межалэн дураз будӥсь бадьпу шоры возьматыса.

— Номыр, — пумитаз вазиз Бан кышно. — Огшоры писпу.

— Таиз мыным кельше, — шуиз пурысьтам кышномурт но чутык-вайык азьлань вамыштӥз.

Межа пумозь пӧртэм писпуос сыло, ясеньёс, кызьпуос, бадьпуос. Бан кышнолэн аймуртэз соосты мерттӥз ай вал, оло тӧллэсь утиськон понна, оло  бускель бакчалэсь висъяськон понна. Собере писпуос шеромыны кутскизы, вырйыл сюрлы вылын нош — чолак огназ писпу.

— Та кыӵе писпу? — юаз кышномурт.

— Беризь, — шуиз Бан кышно. — Но солы дас вить арлэсь тросгес ини.

— Басьтӥсько.

— Сое? — долказ  Бан кышно. — Гур эстон понна, луоз?

—  Чик но ӧвӧл, — вазиз пумитаз кышномурт. — Озьы гинэ.

— Уг валаськы, — паймиз Бан кышно. — Сое татысь мукет азе мерттыны уз луы ни.

— Мынам уг но поты сое мукет азе мерттэме.

— Иське, мар соин луоз?

— Номыр, — вазиськиз пурысьтам кышномурт. — Татын ке но сылӥз, со мынам луоз.

Бан кышно интыяз пумиз. Эк, картэз гуртын медло вылэм! Ачиз но учкиз писпу шоры: укыр ӝужыт ӧвӧл, озьы ке но йылыз бус пӧлын ышемын. Веськрес модосэз шонер, егит муртлы кельше: юн, кужмо, но чеберез пушйыны вуымтэ на.

— Татчы медӥськоды кельтыны? — абдраз Бан кышно. — Таӵезэ кылылэме ӧй вал на.

— Татын ик, интыяз кылёз, — шуиз пурысьтам кышномурт. — Кӧня куриськоды со понна?

— Соин котьку картэ выре, — кепырасагес вазиз Бан кышно. — Таосыз пӧлысь огзэ но татчыозь ӧз вуза на вал.

— Выльысь уг лыкты ини. Кӧня потэ, кур — тыро дунзэ.

Огвакытлы чалмыт луиз. Банъёслы та ар войнаен сэрен секытэн сётскиз. Коньдон туж кулэ.

— Сю пенгё, — вазиз Бан кышно. — Укыр трос ӧвӧл ке.

— Ярам, — соглаш луиз пурысьтам кышномурт.

Выльысен пыр-поч учкиз писпуэз, собере зорлипетэныз писпу выжы котырысь музъемез бышкалляз но корка пала вырӟиз. Кыкетӥзэ сумкаысьтыз ваньзэ поттылӥз, пӧраськон ӝӧк вылэ сю пенгё понӥз. Собере куриз:

— Утелэ-чаклалэ сое.

— Номырзэ отын утьыны, — шуиз Бан кышно.

— Утемды понна но тыро, — пумитаз вераз кышномурт.

— Со понна уг тыро, — шуиз Бан кышно.

— Кыеданы но эн вунэтэ. Кызь пенгё одӥг ар понна тырмыт луоз-а?

— Курисько тӥледыз, эн тырелэ. Номыр но та писпулы уз луы.

Пурысьтам кышно нош ик пуйыяз бугыръяськыны ӧдъяз но ӝӧк вылэ куатьтон пенгё понӥз.

— Утялтон дунзэ куинь ар понна тырисько, — шуиз.- Только кыл сётэ, умой-умой эскероды шуыса.

Бан кышно кызйиз.

Пурысьтам кышномурт синучконзэ поттӥз но курмем пуховкаен ымнырзэ маялтӥз. Берло нош ик портыса кадь учкиз Бан кышно шоры.

— Выре-а ини?

Бан кышно нош ик кызйиз.

— Бен.

Кышномурт кошкыны ӧдъяз. Берытскиз.

— Кӧня улэ беризь? — юаз.

— Кема.

—  Кӧня со — кема? Сю ар но улыны быгатэ-а?

— Тросгес но быгатэ.

Пурысьтам кышномурт йырыныз шонтӥз. Суй вылаз зорлипетсэ ошиз но потыны вырӟиз.

— Ву но вылаз киськалэ! — юн-юн шуиз. Ӧс куспын нош ик Бан кышно шоры учкиз.

— Ӟеч луэ, — кизэ сётытэк, шуиз на, собере ӧз берытскылы ни. Зорлипетэныз тротуаретӥ корккетыса, кошкиз.

Бан кышно ӧжытак сылӥз на, уксёзэ октӥз. Ивор вӧлмиз вал, чигнась немецъёс вань улэп пудо-животэз талало шуыса. Уж борды кутскиз. Шораз учкыса, нокин но ӧй малпасал, кышномурт жадемын шуыса, сокем мотор но каньылак ужзэ быдэстӥз, кылӥськисьтэм крезьгуръя эктӥсь мурт сямен.

Берыктћз Алёна Петрова

Берыктћз Алёна ПЕТРОВА

 

Удмурт Дунне
By Удмурт Дунне Июнь 14, 2016 16:51