Дипломтэм инженер

Удмурт Дунне
By Удмурт Дунне Июнь 17, 2016 16:33

Дипломтэм инженер

Пичи Пурга ёросысь Баграш-Биграысь Соколовъёс.

Пичи Пурга ёросысь Баграш-Биграысь Соколовъёс.

Соколовъёслэсь семьязэс Пичи Пурга ёросысь Баграш-Бигра гуртын пичиез но, бадӟымез но ӟеч тодэ. Ирина Николаевна керттӥське, чильпаське, киуж ужа. Нош Николай Павлович пулэсь, кортлэсь паймымон арбериос кылдытъя.

 

Тулыспал пумын гурт клубын концерт ортчиз. Со улсын ик фойеын адӟытон радъямын вал. Маиз но отын ӧй вал: выж лёгетъёс, пужъятэм ӵушконъёс, ӝӧкъёс, пуконъёс, корка макетъёс… Нош тужгес но монэ паймытӥзы пичи уробоос.

Вань чыры-пыры ёзъёссэ но Николай Павлович ас киосыныз лэсьтэм, питранъёссэ гинэ но. Зэмос уробоослэсь быдӟалаенызы гинэ висъясько.

Колягай тодматэ:

— Таӵе дӧдьыен азьло председательёс ветло вал, нош таӵеяз бусыосы кыед поттазы. Нош таяз турын нуллӥзы яке коръёс вайылӥзы. Таиз тылпу кысон уробо… Таизлэн насосэз но ужа, лопаткаез но, ведраез но, тубатэз но, шлангез но вань.

— Кызьы сыӵе тунсыко уж борды кутскиды? — юасько Николай Павловичлэсь.

— Мастерскойын ужай ук мон, столяр но, кин но луыса. Отын мар лэсьтӥськом вал, сое пиналъёслы адӟытэме потӥз. Соос вашкалазэ уг тодо ни ук. Али столярной мастерской но ӧвӧл ни. Мае адӟозы на соос, марлы дышозы.

— Нош кин пуэн ужаны мылкыд пыӵатӥз?

— Ачим кутски. Мар но со пуртэн вӧлӥсько вал. Тӥрлык нокыӵе но ӧй вал ук азьло. Атае ожын Ржев котырын быриз. Номыр тӥрлыкез ӧй вал ини. Мон 1939-тӥ ар дырысен кышномуртъёсын, мемеен кылемын. Собере, колхозын ужакум ини, быгатэмме шӧдыса, мыным сёто вал ини киужен вырыны.

Дышетскемын ӧвӧл мон. 7 классэз гинэ йылпумъямын. Но тодӥсько: мар ке  борды кутски ке, одно ик быдэсто. Калыклы паймымонзэ, ӧвӧлтэмзэ, адӟымтэзэ пӧрмытыны турттӥсько.

htmlimage

Н. Соколовлэн корт валэз.

Пенсие потэмелэсь азьло тани таӵе трактор лэсьтӥ вал, — возьматэ Николай Павлович туспуктэмъёссэ. — Соин мон олокытчы но вуи. Ижысь «Металлург» культура юртысь сцена вылэ, тракторме заводитьтыса ик, руль сьӧраз потай. Гурт удысын ужасьёслэн нуналзы вал соку. 30 ар ини тракторелы, али но ужа. 1980-тӥ аръёсы мотоблок лэсьтӥ вал. Соку «мотоблок» кыл ик тодам ӧй вал. Магазинъёсын но со потэмын ӧй вал на. Мотоцикллэн мотореныз лэсьтӥ. Собере колхозэ картофка миськон машина лэсьтӥм вал. Но сое пуктыса ӧз вуттэ, кытчы ке вузазы-а, сётӥзы-а, уг тодӥськы. Колхозлы ик вуко лэсьтӥ. Со 20 ар ӵоже дугдылытэк ужаз. Нырысь ачим ик ужай ай соин. Эскерыса сямен. Тани ужъёсылы лэсьтэм чертёжъёсы.

— Чертёж? Тӥ нокытын дышетскемын ӧвӧл шуиськоды ук?

— Ма, валамея суредасько (серекъя). Черчениез дышетэме ик ӧвӧл. Бигралан 4 классэз быдтӥм, собере Пургала дышетскыны ветлӥськомы вал. Пыдъёсамы — кутъёс. Пургаозь вуытозямы, шудонъямы кутъёсмы пӧсьтыса ӟустари луо вал. Бӧрысь колхозын ужаны кутски. Нырысетӥ тракторъёсын ай. Прицепщик вал отын.

Тракторзэ лэсьтэмез бере Николай Павловичез Москвае изобретательёслэн съездазы лэзьязы. Ужъёсыз пӧртэм грамотаосын пусъемын.

— Дипломтэк инженер ини со, — серекъя Ирина Николаевна.

— Арлыдмы вань ини ке но, улонлэсь кылеммы уг поты ай. Отысь-татысь чебер юртъёсты адӟоно. Мылкыды ӝутскиз корка проектъёс малпаны. Огезъя Пави пимылэн юртэз пуктэмын ини, — валэктэ кибашлы.

Николай Павлович пулэсь но котьма лэсьтэ. Юртъерзы выжыкылысь кадь — пӧртэм пужыё укно чильтэръёсын олокызьы но чеберъямын.

— Нош мар ке лэсьтыны курисьёс трос-а?

— вань. Кроватьёс, диванъёс, ӝӧкъёс куро. Бызись нылъёс соосты басьяло. Кылем арын пересьёс, огзылэсь огзы адӟыса, дас вить салазки лэсьтытӥзы. Али но куро на но, уг ни, шуисько. Косэмъя ужаме уг поты, ас мылкыдъягес.

— Нош табере кыӵе уж борды кутскыны малпаськоды?

— Пуэн вырыса, кӧт тыриз ини. Мар ке кортлэсь лэсьтэм потыны кутскиз ай. Пичи трактор борды турнан лэсьтоно вал…

Анжелика Петрова

 

Удмурт Дунне
By Удмурт Дунне Июнь 17, 2016 16:33