Андрей Смирнов ужзэ воштӥз киноен

Удмурт Дунне
By Удмурт Дунне Июнь 3, 2016 15:00
2qO6TkW3tEo

А. Смирнов ветлӥз Эстоние фин-угор фильмъёсъя фестивале Ижысь киноосты возьматыны.

Кунъёс вискысь катанчиез ӝутысал

Кин малпа, Россиысь улосвылъёсын  аспӧртэмлыко кино уг учко, умой кино уг лэсьто шуыса, со туж зол янгыша. Ижын кино зол азинске, та бордын  тырше «Ижысь киноклубен» кивалтӥсь Андрей Смирнов.

 — «Ижысь киноклуб»  ужа ни 40 аръёс ӵоже. 1990-тӥ аръёсы со лябӟылӥз. Нош али «мукет» киноез яратӥсьёс отчы выльысен шумпотыса ветло. Кызьы тӥ сюриды клублэн зарни мурдояз?

— 1990-тӥ аръёс клублэн тужгес секыт вакытэз вал. Уно пол вошъяськылӥзы кивалтӥсьёсыз, странаын кузёяськиз кризис. Валантэм вал, кыӵе кино калыклы возьматоно, кыӵе сюрестӥ вамыштоно, маин выроно. Киноклублэн берпуметӥ кивалтӥсез Александр Наговицын (со ик та киноклубез 1976-тӥ арын кылдытӥз «Зеркало» ним сётыса, нош 90-тӥ аръёсы нимзэ «Прибытие поезда» кариз) малпаз Екатеринбурге кошкыны, киноклубен вырыны нокинлы луиз. Нош ми Сергей Белоусовен кино возьматонъёсы ӵемысь ветлылӥмы, киноклуб улсын пӧртэм программаос но лекциос ортчытъяллямы. Соку малпамы: таӵе усто проектэз аналтыны уг яра, озьы биньгозыез киямы кутӥмы, киноклубен вырыны кутскимы. Сергей берло кошкиз Москвае, киноклубын мон огнам кыли, нимзэ воштӥ — «Ижысь киноклуб». Соин вырон понна ужме куштӥ. Киноклуб улонам валтӥсь сюлмаськонэ но шумпотонэ луиз.

— Киноклуб тӥледлы коньдон уг вайы. Мар понна та ваньмыз?

— Мынам потэ Ижын бадӟым, чебер, усто киноэкран вылын возьматэме умой, аспӧртэмлыко киноез, аслаз куараеныз (со эстон, я немец, я мадьяр кылъёсын луыны быгатэ), ӟуч субтитръёсын. Асьме адямиос медаз шӧдэ, соос дуннелэсь ӝужыт борддорен висъяськемын шуыса, соос мед быгатозы адӟыны сыӵе киноосты, кудъёссэ учко Москваын, Европаын, потэ кунъёс вискы лэзиськем катанчиез ӝутэме, эшъяськеме.

 — Тӥ кадь кино борды бурмем адямиез Ижысь мон уг тодӥськы.

— Мон понна кино — мукет зэмос улон, со дыре ик огшоры улонэз тодыны-валаны амал. Со уйвӧт но, зэмос улон но, искусство но, уж но. Мыным пӧртэм фильмъёс кельшо. Али мон Москваын кинематографияя калыккуспо фестивальын пӧртэм киноослэсь куанӥсько. Киносуредын  мыным тунсыко режиссёрлэн малпанэз, поэтлэн кадь улон шоры учконэз, мон нырысь ик яратӥсько талантэз но быгатонлыкез. Мон уг яратӥськы эрекчаськонъёсты, учкисьёс шоры уксё пуйыос шоры кадь учкемез. Мон понна кино — со бизнес ӧвӧл, со искусство но дуннеез тодон-валаны турттон.

qf8Z-oyEkaU

Эстониысь фин-угор кинолы сӥзем фестиваль дыръя.

— Ижын тӥледын ортчытэм «Арт-квадратэ» нырысьсэ сюрыкум, пайми, мамында Ижын тунсыко кино лэсьтӥсьёс.

— Кино асьме дорын туж умой азинске. Мон али гинэ бертӥ Эстониысь фин-угор кинолы сӥзем фестивальысь. Отын асьме кино лэсьтӥсьёсмылэсь ужъёссэс возьматӥ — соос калыкез зол паймытӥзы. Милям авторъёсмылэн вань чеберлыкез шӧдонзы, аспӧртэмлыко учконзы, соос уг кышкало экспериментъёслэсь — лэсьто тунсыко, куддыр бышкись кино. Соос пӧртэм ӧръёсъя ужало: документальной, игровой кино, анимация, эксперимент, видео-арт. Непрофессиональной кино удысэ таӵе пӧртэм малпанъёсты но ӧръёсты пыӵатӥсь улосъёсты туж шуг шедьтыны. Авторъёс пӧлысь висъясал Андрей Першинэз (анимация, видео), Эрнест Хуснутдиновез (игровой кино), Евгений Кузнецовез (документалистика) но мукетъёссэ. Ижысь документальной фильмъёсъя студилэн но ужъёсыз ӟечесь.

— «Арт-резиденция» проектэз 2 ар талэсь азьло Ижысь Les Partisans театрлэн  кивалтӥсеныз Павел Зоринэн, суредасьёсын Сергей Орловен но Дмитрий Черемныхен малпады. Алигес тӥледыз со проект бордысь палэнтӥзы.

— «Арт-резиденциын» усьтэм киностудия вал Ижын улонэ пыӵатэм эшшо одӥгез малпанэ. Со, «Ижысь киноклуб» бордын вордӥськыса, яна потӥз. Студилэн валтӥсь малпанэз: котькуд адямилы кино лэсьтыны луонлык сётоно но техника ласянь юрттӥськоно. Ми басьтӥм видеокамера, монтаж лэсьтон понна умой компьютер, милемлы инты но висъязы. Ижкарлэсь администрацизэ оскытӥмы, та проектэз кулэ возьыны но азинтыны — «Арт-резиденциын» ми огазеямы Ижысь театрез, киноез, суредаськон удысэз. 2 ар куспын ми вылэ ӧз љожтӥськылэ. Но «Арт-резиденциысь» монэ шуак-дуак палэнтӥзы Эстониысь фин-угор кинолы сӥзем фестивале ветлэме бере — кинлэн ке, кин, оло, воксё но искусстволы матын ӧвӧл, потӥз, вылды, та проектэз киултэмез, кулэ интые аслэсьтыз адямиоссэ пуктэмез.

— Гужемлы быдэ тӥ кошкиськоды дуннеез котыръяны. Пыдын, пичи рюкзакен. Маиныз сюрес бордаз кыске?

— Дуннеез котыръясько, малы ке шуоно мыным интыме, котырме вошъяны кулэ. Милям планетамы бадӟым. Мынам потэ адӟеме выльзэ, тодматскеме мукет культураосын, выльысен берытскеме тодмо но яратоно интыосам, адямиосы доры, тырмытэме лулкужымме дартэн. Дуннеез котыръян — со зарезь дорысь кунокуаос, туристической компаниосын дэмлам туръёс гинэ ӧвӧл, со улонэз тодон-валанын лёгоно сюресэд, со аслэсьтыд дуннедэ паськытатон.

Мария Векшина

Туспуктӥз Ксения Ворончихина

 

 

 

Удмурт Дунне
By Удмурт Дунне Июнь 3, 2016 15:00