Анатолий Перевозчков. «Пал суй» верос

Удмурт Дунне
By Удмурт Дунне Июнь 25, 2016 11:39
перевозчиков

Анатолий Перевозчиков

Сӥзисько ожысь но ужысь ветеранлы  И. Н. Макаровлы но солэн семьяезлы

 

 

Тодэ на Миквор Миша, кызьы со эшъёсыныз ӵош вистэм-вожтэм пуляос но отын но татын пуштылӥсь снарядъёс пыр немецлы пумит «ура!» кесяськыса бызизы… Собере со шӧдтэк шорысь пеймыт гуэ тюаз…

…Сайкиськиз госпитальысен. Син шораз йӧтӥз бинтэн бинем мар ке зӧкта бур суйыз. Со, наркозэз быремен, чидантэм висьыны ӧдъяз. Я, висем висемен ай, сое, оло, кызьы ке но чидасалыз! Нош кызьы улод-вылод китэк? Уката ик бурызтэк?..

— Я бон вань паллянъёс, — курыт малпан бугорзэ сэратэ солдат. — Соос паллян киынызы но оломар но карыны быгато. Нош мон — бур! Пичиысен бур киын ужаны дышемын. Школаын но бур киыным ик гожъяськи…

Табере бур киызтэк — сюдӥсь-утисезтэк — кылиз. Ой, Инмаре-вордӥсе, оло, тазьы ӧлексы кельтытозь, йырме ик ожалтысалзы ке, умойгес луысал. Шуысалзы, шонерзэ гожтысалзы гуртэ — семьяосылы: тӥляд пиды, атайды Родинамес утён понна геройлыко ожмаськыса быриз…

Нош тазьы сӧсырмыса мон фашистлы пумит нюръяськыны но уг яраськы ни, мирной улонын но асме шудоен лыдъяны уг быгаты. Ма, ужтэк мар улон со луоз? Сюлэм пирсэкъяса, кытчы пырон инты шедьтытэк, шай вылэ мынон сюрес утчаны кутскод, ява!

Вот ведь-а, кыӵе кыӵесэ шедиськиз! Ярам ай, Гитлер армия ке пазьгемын луысал! Ӧвӧл ук, ӧвӧл! Со ай асьме музъеммес кырсь сапегеныз лёга, сапта, асьме советской адямиосты виылэ, сантэма…

Мон странамы сыӵе шуге-леке сюрем дыръя «шудонысь» потӥсько. Мар со луоз? Табере мон… пал киын — паллян киын – кыӵе-мар воин на? Бакча сульдэр!.. Кин ке со, конечно, асьсэды, пе, асьсэос ожмаськонтэм понна, улэп кылён понна юри сӧсырто. Вот соос, дыр, шумпотысалзы, мон сямен «юмоке» сюрысалзы ке…

Но мон зэм ук, зэм, наступлениысен сӧсырми! Эсьма, со лек пуромем тылӝуын ӧй но шӧды контузиен сэрен йырсазьме но ыштэмме, тушмон пуля йӧтэмез но…

Мишаен артэ кыллись боец, эшезлэсь куректонэн пилемаськем ымнырзэ синйылтыса, буйгатытэк ӧз чида:

— Шумпот, Инмаредлы тау шу, йырдэ быгылес кельтэмез понна… Нош тон бӧрдӥськод: китэм кыли. Китэм ке, улэп ук, улэп! Со-а шуд ӧвӧл? Гуртад бертод, кышноеныд, нылпиосыныд адӟиськод… Нош немецез табере асьметэк но пазьгозы ни! Жаль, конечно, Гитлерлэн гуозяз — Берлинозь — ӧм вуэ шуыса. Мар бен карод, ӧз удалты бере. Асьмелэн отын янгышмы ӧвӧл…

Мишаез та кылъёс ӧз буйгатэ. Со куректэмзэ сюлмаз пыдлогес ватӥз.

— Бен, бен, — синкыли пыр шуылӥз со, — мон шудо, шудо, улэп кыли.

Нош мӧляяз каръяськем пычей-малпанэз йыръе, маза уг сёты: «Кинлы мон таӵе ӧлексы мурт кулэ луо на?..»

Гожтэ гожтэт. Паллян киыныз. Кема курадӟе. Букваосыз кырыж-мерыжесь. Кудӟем муртъёс кадь — чорк-чорк! сылыны уг быгато. Гожтыны выронъяз кымысысьтыз нюлам вуэз быльыра. Одӥг бам тетрадь листэ малпанзэ-иворзэ куинь нунал ӵабъяз. Тодаз лыктӥз, кызьы школаысен дышетӥсьсы Илья Григорьевич урод гожъяськись эшъёсызлэсь тетрадьзэс эскеремез бере паймыса шуылоз вал:

— Ма, та тетрадь вылады курегдэс эктыны лэзьяды шат? Адями киын гожъямлы та уг кельшы!

«Азьло чистописаниен «4» но «5» отметкам басьяй ке, таизлы дышетӥсе, — гожтэтэз шоры учкыса, малпаз Миша, — «кол» пуктысал, дыр».

Эшшо огпол лыдӟе на ӵабъямзэ: «Чырккемесь, дуно семьяе…»

Семья кыл бере со матысь адямиоссэ нимын-тулын ик вераны ӧдъя вал но — урод гожъяськемзэ тодаз вайыса, ӧз ни гожты.

«Кӧӵе мар улкоды?..» Татчы со будэтыны турттэ на вал: «мусоосы». Син азяз шуак пуктӥз начар дӥсяськем кышноезлэсь ёрмонэн кисырскем, восьмем ымнырзэ. Кык нылзэ но пизэ. Самой бадӟымезлы дас арес. Самой пичиезлы — пиезлы — вить. Сиёнзы но, дӥськутсы но рос-прос ӧвӧл, дыр. Вылаз ик, бадӟымъёсызлы — нылъёсызлы — школае дышетскыны ветлоно ай. Гужемзэ, оло, маке со дӥсяны шедьто ик, кутчантэк но бызьыло, луоз. Нош толалтэзэ ӟырт кезьытэн кызьы пырпото, мар даурто ини?

«Сиёнды но, дӥсьты-кутты но вань-а?» Тазэ гожтоно ӧвӧл, дыр. Вӧсь гинэ карод, юмекъятӥсь яразэс копыштод! — малпаськон сяменыз, химической карандашсэ куштыса, йырберзэ кормыштӥз Миша.

«Кӧӵе выль ивор вань гуртын?»

Гожтыны турттэ на вал: «Кин бызиз, кин люкиськиз? Кинлы повестка, кинлы похоронной вуиз?..»

Озьы тӥни, малпаськыса-малпаськыса, созэ но, тазэ но гожтоно кылзэ дуно каӵез кадь бергатэмез бере со гожтэтсэ самой йырвисёно ивортонэныз, юанэныз быдтэ: «Мон али, Орин, госпитальын… сӧсырмемын… Бен, ӧлексы — бур китэм кыли…

Оло, кулэ но уд кары ни, уд принятьты?.. Чидатэк витисько гожтэттэ тани таӵе адресъя…»

***

Миквор Оринлэн картэз войнае кошкем дырысен куинь ар ортчиз ни. Гожтэтъёсыз нырысь-валысь ӵем вуылӥзы. Бӧрысь — шер но шер. Собере воксё но ӧз вуэ ни. Кыӵе ке синтэм-пельтэм буран дыръя сюрес вылэ потэм муртъёс сямен йыромизы, лэся, дорзэс ӧз шедьтэ ни соос.

Мар но ӧз малпа ни Орин картэз сярысь, тужгес но кузесь тол уйёсы. Оло со пленэ шедиз, оло кытын ке котыртэмын курадӟе, яке йырзэ но кемалась ожалтӥзы ини… Но сыӵе дыръя похоронной лэзьыны кулэ ук!.. Тани Ларифон Мишалэн одӥг гинэ гожтэтэз вуэм ке, мукетыз — быремез сярысь ивор вылэм ини. Остэ, остэ, озьы коть медаз луы вал! Но копак гожтэт, ивор басьтытэк но, мар малпаны ик тодоно ӧвӧл. Шугъяськыса, куректыса сюлэм пилиськыны турттэ.

Тазьы ассэ ачиз буйгатыны тырше Орин. Быремен ӧз ивортэ бере, малпа со, озьыен, улэп ай, улэп! Иське, шумпотыны кулэ. Нош мон ке, ас вылам сьӧлык басьтыса, оломар но малпасько. Ой, Инмаре, вождэ эн вай, картэ сопал дуннеын шуэмысьтым… Ма, улэп ке луысал, кыӵе ке но, урод-а, умой-а, ивор одно ик ыстысал ни, дыр. Нёшто уг мӧзмы мынэсьтым? Мынэсьтым ке уг — нылпиосызлэсь, ӵыжы-выжыосызлэсь. Азьвыл гожтэтъёсаз вера вал ук, туж мӧзмисько, туж адӟеме потэ ни тӥледыз шуыса… Табере ке тӥни — иворез но, сяворез но ӧвӧл… Почтальонлэсь гожтэт юаны ик кепырано ни. Синзэ музэ мертчытыса, со, янгыш луэм мурт сямен, лулӟиськыса шокыштэ: «Ӧвӧл, Орин, ӧвӧл…» Собере, кышет улысьтыз йырсизэ тупатыса, ӝож мылкыдлэсь курткиськыса, Оринэз буйгатыны кутске:

— Войнаын, Орин, олокыӵе но учыръёс пумиськыло. Гожтэмез уг луы, дыр. Оло, кыӵе ке спецоперациез быдэстэ… Тани кӧня ке дыр ортчиз ке, гожтоз ай, гожтоз. Эн чигиськы. Главное, тон оскы, картэд улэп ай шуыса.

— Ӧйтӧд ни, мар вераны ик ӟудӥсько. Ма, улэп ик, дыр, шуыса малпасько.

Озьы, сюлэмшугзэ мӧляяз мургес выйытыса, Миквор Орин колхоз уже потаз, трудоденьлы «боды» басьяз. Бригадир мар ке косӥз, сое лэсьтӥз. Пумен йырзэ тӥяз: маин со туннэ нылпиоссэ сюдоз? Нянез тани ымтыр но ӧвӧл ни, шуыны луоз. Толон, сусексэ ӵужыса но изэм беризь сулэн сураса, пичильтык колӟо гинэ пыжыны удалтӥз. Орин сое, ачиз веръятэк но, уралтэм пиналъёсызлы сётӥз но лулӟиз:

— Та сяна, дуноосы, няньмы ӧвӧл ни. Мон тае куиньлы люко. Тӥ сое пичиен сие, ява — ӵуказелы но мед тырмоз.

Соку бадӟымез нылыз Рая, паймыса, синъёссэ кыньыръяса, юа:

— Нош асьмеос, нэнӥ, ньыль кузя ук, малы тон колӟодэ куиньлы гинэ люкид?..

— Ма, мынам, нылы, — пушкыз тырыса быльырскись синвузэ ватыны турттыса, Орин мырдэм потӥсь ӵакмем куараеныз вера, — шыдэн но кӧты гусъяськиз…

Берлогес, нэнэзы уже кошкем бере, Рая вын-сузэрезлы шуэ:

— Чылкак паймисько мон та бадӟымъёслы, кызьы соослэн кӧтсы няньтэк но тыре? Мынам ке — весь сием потэ. Эшшо ке нэнэй вераз на: та няньдэс, пе, шыръялэ. Кызьы? Куинь пол, ньыль пол куртчид ке, та быроз ук! — нянь турижез шоры былькмыса учке со.

— Выжыкылын сямен мед луысал: сиён шоры учкыса гинэ но, кӧт мед тырысал, — апаезлэн верамез борды итӥське Лиза.

***

Огпол пиналъёс гӧртэм кынмем пиялаез, черодэн пелляса, маке быдӟа «укно» усьтӥзы: ульчае потон мылкыдэз кызьы ке но буйгатоно ук! Отӥ табере, киноын сямен, тол инкуазез адӟыны луэ. Соос, лымы шубаен дӥсяськем писпуосты сяна, куд-ог дыръя адямиосты, пуныосты яке тылобурдоосты но табере синйылто.

Нош тани колодча дурын ву вайись Юбер кенакен кыӵе ке солдат вераськыса сылэ. Пурысь  шинелен, йыраз горд кизилиё изьыен муртэ пиналъёс туж-туж учкизы ке но, тодманы ӧз быгатэ. Озьы ке но, ог-огзэс донгаса ик, укное мыр-мыр мертчиськизы. Уго солдатъёс гуртэтӥзы котькуд нунал уг ветло. Атайзы фронтын бере, оло со сярысь та солдат маке тодэ, оло пумиськылӥзы но. Ма, со ожмаськон бусызы пумтэм-йылтэм ӧвӧл, дыр, ук! Сиськыкузы но шутэтскыкузы адӟиськыло, луоз…

Ӝоген солдат соослэн капка азязы кожиз. Пиналъёс, ӟуч пыре шуыса, куалектӥзы. Соос уго огназы, нэнэйзы уже кошкемын… Рая ӧсэз ури-бери куриказ но сузэр-выныз доры бызьыса мынӥз. Мумы курег бурдъёссэ ӝутыса чипыоссэ ватэм выллем, кышкамзэс быдтыны сюлмаськыса, соосты ӟыгыртӥз, нош аслаз сюлэмыз, гадьысьтыз потыны турттыса, лук-лук! тэтча…

Солдат соку ик корка ӧз пыры, азбартӥ поръя, лэся. Лушкано кадь ӟеч арберизэс утча, луоз…

Но тани куке-соку корказь ӧс шальк! вазиз, тубат выжъёс ӟукыртӥзы… Нылпиос ог-огзы борды уката юнгес ӝиптӥськизы, кыл-куара поттыны дӥсьтытэк, сыло. Эсьма, шоканзы ик пытсаськиз, лэся. Ымзы пеперскемын, дась «нэнэ» кеськыны.

Ӟуч ӧсэз зуркак кыскиз, но со ӧз усьтӥськы. Паймыса, ӟудыса кӧня ке сылэмез бере солдат йыгаськыны ӧдъяз, собере ӧс сьӧрысь пиосмурт куара кылӥськиз:

— Усьтэ, усьтэ, ӟечокъёсы! Мон та — тятяды…

Раяен Лиза тодмазы тятязылэсь куаразэ, нош пичи Яша уката кышкатскиз, быз! бӧрдыны кутскиз.

— Эн бӧрды, ӟуч ӧвӧл со, тятямы!.. — Рая вынзэ буйгатӥз но ӧсэз усьтыны бызиз. Тятязы тӧдь-тӧдь бусэн ӵош пыриз. Ӧс ворсаськем бере кӧня ке улыса, ӵынкыт сылмиз. Солдат котомказэ, пал киыныз шугенгес басьтыса, ӟус вылэ понӥз но нылпиоссэ ӟыгыръя, йырсизэс маялля, пизэ пыдесъяськыса бордаз ӝиптӥз. Шумпотэменыз синвуэз чильыраз, лулпушкыз тыриз.

— Ой, кыӵе мӧзми тӥлесьтыд, мусоосы, кыӵе мӧзми!.. Ум ни пумиське кожасько вал. Адӟытэк ик сопал дуннее кошко шуыса, улӥ…

Атаез борды ӧжытак дышыса, Яшалэн но куараез бычыраз:

— Нош сопал дунне со туж-а кыдёкын?..

Таӵе юан ож тылӝу пыр потэм муртлэсь синвузэ пызьыртӥз. Миша пизэ бордаз юнгес ӝиптӥз. Ас понназ малпаз: «Сопал дуннеысь ук мон бертӥ, мусоосы, сопал дуннеысь!.. Тӥ сое уд тодӥське на, ноку но медад тодэ!»

Со куспын корка ӧс вӧлак усьтӥськиз но, шокпотыса Орин пыриз. Мертчан йырсиез кышет улысьтыз потэм, кезьытын гӧртыса но вуттэм, сьӧд шубаезлэн кык бирдыез пертчемын. Синъёсаз шумпотон тылси югдэ, синкашсэ кыньыръямысьтыз, оскымтэез шӧдӥське. Со уго гурт кышноослэн картэд бертӥз шуэмзылы ӧз оскы вал. Ма, али но — Мишаезлэсь нылпиосыныз ӟыгыръяськемзэ, мусояськемзэ адӟыса но, ваньмыз та уйвӧт гинэ кожа ай. Соин ик Орин, ӧс азе шуак дугдыса, онгромиз кадь. Мишаез со пала вамыштэм бере гинэ сазьдӥськиз, азьпала вырӟытскиз.

— Миша! — сюрмем киосыныз ӟыгырскиз со картэз борды но зуэн шобырскем бамзэ чупаны ылаз. Пумен бӧрдэ, пумен вера: — Ой, бертонэдлы ик уг оскиськы ни вал… Весь вӧсяськи, весь вӧсяськи, Инмаре, уть Мишаме, улэпкын вутты шуыса… Вуттӥз ук. Вуттӥз. Кылӥз монэ Инмаре! Ма быдӟа шуд со, ма быдӟа шуд! Милемыз утись-вордӥсьмы бертӥз, улэп вуиз… Нош киыд ӧвӧл шуыса, пичи но эн куректы. Китэк-пыдтэк но уло адямиос. Главноез — йырыд быдэс! Быдэсэсь пыдъёсыд. Быдэс паллян киыд! Озьыен, улом ай, улом!.. Нош со ке «принятьтод на-а?» гожтэ. Остэ, остэ, ма кызьы ум принятьтэ? Кызьы ас мугор люкеттэ мултэс карод? Ма, кызьы тынад йырад сыӵе малпан ӵогиськыны быгатӥз? Со, дыр, озьы луиз кидэ ыштэмед бере, туж но туж куректэмысьтыд, бен-а?..

Орин, картэзлы кыл вераны сётытэк, аслэсьтыз кисьтэ но кисьтэ. Собере шуак чалмиз, ӟыгырскем киоссэ лэзьыса, кӧтурдэсаз чабкиськиз:

— Ма, мар-о  мон тонэ кӧс кылын сюдыса возисько? Тон сюрес вылысь ук! Кӧтыд но сюма, луоз? Нош маин утялтом ай? Ми али, Миша, туж ёрмыса улӥськом. Ми гинэ ум, конечно. Но вань гуртамы… нянь пӧлын пыласькисьёсыз но. Кылсярысь, бускельёсмы — Юберъёс — ик. Оло, соослэсь, — картэз шоры янгыше усем мурт сямен учкыса, либытак юаз со, — одӥг колды няньзэс пунэмалом?.. Только вот маин берло берыктом?..

— Я, ӵуказе мар ке но малпалом ай, туннэлы мынам солдат саламе тырмоз, — пальышак потӥз Миша, гордалэс мыйык пумзэ позыртыса.

Собере ӟус вылэ пуксиз, солдат пуйызэ, алвылаз поныса, пал киыныз пертчылыны кутскиз. Пиналъёс кынмем кадь сыло, синзы пуйые мертчиськемын: мар меда ческытсэ ваем тятязы? Но тятязы укыр каллен выре кадь потэ соослы. Паллян киызлы муглоеныз ке но юрттыны турттэ — пертчыны шуак уг пӧрмыты…

Орин, оло, юрттоно ини талы шуыса малпаз вал но — йыраз шуак шуккиз: «Бен со мынам котыры ӧвӧл ук! Сэре, ӧлексы луэмзэ тодаз уськытод, сюлэмысьтыз висись яразэ копыштод. Сотэк но сӧсырмемез пумысен куректэмез ӧз тӧлӟы на, дыр».

Я, куке-соку пуйы пертчиськиз, усьтӥськиз. Миша, кымысысьтыз нюлам вузэ саесэныз ӵушалтыса, янгыше усем мурт кадь семьяезлы пальпотӥз. Вамыштӥз гольык ӝӧк пала, пуйыеныз валче пуксиз но котырзэ поттылыны ӧдъяз. Нырысь ик ӝӧк вылэ вуиз базар калач нянь. Сютэм нылпиослэн (ма, Ориналэн но) синъёссы соку ик ӝуалскизы. Соослэн зэмос чылк-чылк, номырин сурамтэ нянез сиемзы, оло, быдэс даур ӧвӧл ни. Оло нош, копак но ӧвӧл. Ма, няньлэсь шӧмзэ но уг тодо ни бере, озьы но, дыр…

Ӝӧк вылысь нырез бичатӥсь нянь зын быдэс корка вӧлмиз. Соин, вылды, нылпиос — Рая, Лиза, Яша — калачез адӟыса гинэ но, ӵоксузизы, шыр виясь дыльдызэс ньылыны ӧдъязы…

Тани ӝӧк вылэ вуизы на кык чилясь корт банкаос. Мар отын, пиналъёс уг тодо, но туж оско, чечымлэсь но чечым сиён шуыса. Ма, озьы ик вылэм. Та сярысь тодӥзы ни ӝӧк сьӧры пуксемзы, сиськыны кутскемзы бере. Огаз банкаын тушёнка, пе, кылэз ньылоно кадь ческыт, мукетаз — сакыр! Солэсь но ческытгес маке. Тятязы госпитальысен чай юыны сётъямзэс озьы люкам. Ачиз коллёвуэн сюзэ юзматылэм.

Нянь шорем вылэ пичильтык тушёнкаен зырӟем чай, эшшо ке сакырен! Ой, ческыт ке, ческыт кошкиз! Нылпиослы та нунал вань улытозязы тодазы кылёз. Ма, соослы гинэ-а? Анайзылы — Оринлы но!

Кыӵе жаль, праздник одӥг нунал гинэ кыстӥськиз. Ӵуказеяз ик тятязы ӟуче мынӥз, коркась корка шуэм сямен, кенос бугрозэ басьтыны ӵектыса, ветлӥз. Ӟучъёс кема ӧз ӝегалэ: дунтэм ваньбур инмысь, шӧдтэк вуэм зор сямен, уг усьы угось. Ньыль таза пиосъёс кенос бугроез трактор дӧдьые ури-бери тыризы но кошкизы.

Мукетъят Миквор Миша кӧня ке пол гинэ кутчаллям яловой сапегзэ Огырчи базаре вузаны ветлӥз. Жаль вал Мишалы сапегез, пороз вузам коньдонэныз войналэсь азьло басьтӥз вал. Но мар карод? Кытчы пырод — кызьы ке но ёрмон кыӵесысь потоно ук!

Сапег уксёеныз со ыж басьтӥз. Тулыс ыжпиез луыны кулэ. Иське, кайта (ма, оло, туэ но, пиналъёсызлэн, ма, аслаз но, кузпалызлэн но) ыж гон пыдвылзы но, пӧзьзы но луоз. Ыж гонзы тырмиз ке — оло, гын сапегзы но!

— Эк, кызьы ке но сапег гындыны дышетсконо вал, — огпол кышноезлы лулӟиз со.

— Оломар кеметӥ инметӥ эн лоба ай — сачак усёд. Пал суен со сапег гындоз ини. Васькы музэ, Миша, лэсьты сое, мае быгатӥськод…

Номыр ӧз куареты фронтовик. Вогез пӧсьтӥз ке но, ӝожзэ ньылӥз.

— Мон дышетско, одно дышетско, пал суен но сапег гындо! — оло кузпалызлы, оло аслыз ачиз чурыт вераз со.

…Юг-юг гӧртэм йырсиё но пилинча быдӟа тушо сапег гындӥсь Сачык Вася сое паймысагес пумитаз: «Марлы кулэ та ӧнер ӧлексы муртлы? Татын веть выронэз ой-ой!.. Таза пиосмурт но ваньмыз уз чида», — малпаз со, пал суй Мишаез синмыныз сӥсъяса.

— Мон уксё поттыны уг медӥськы. Мон ас семьяелы гинэ гындысал… Дышысал ке,

конечно. Лэзь вал кӧня ке нунал бордад ужаны, Васягай. Мон быгатӥсь… Оскисько: пал суйын но пӧрмыто…

— Ӧйтӧд, ӧйтӧд, мар вераны ик ӟудӥсько… Мылкыдыд вань бере, ветлод-а, мар-а…

Озьы тӥни Миквор Миша мӧйымыса ни Сачык Васягай доры сапег гындыны дышетскыны арня пала сюресэз волятӥз. Сачыкъёслэн вӧл-вӧл бадӟым корказы сапег гындон цехлы пӧрмытэмын кадь. Ӧс дорын ик гуртоослэн ваем ыж гонъёссы. Соос кошмаен яке кышетэн бинялтэмын. Сурантэм вылысь котькудаз пичильтык кагаз кесэге нимтулзы гожтэмын.

— Ваем ыж гонэз нырысь тугоно, — валэктэ Васягай. — Со понна борддор вӧзтӥ та езъёс золтэмын. Татчы ыж гон вӧлдоно… Вераны вунэтскем на: ыж гон тугемлэсь азьло чылкытатэмын мед луоз. Собере ини вӧлдэм ыж гонэз тани та кугонэн кокано, жугоно…

Дышетскыны ноку но бер ӧвӧл шуэмзэс Миквор Миша ас вылаз эскериз. Сапег гындон егит муртлы кадь капчиен ӧз сётӥськы ке но, дышоно ке, пичи мурт выллем ик шумпотоно вылэм. Туж потэ вал, нылпиосыз шуныт пыдкутчан мед нуллозы шуыса. Медаз ни кынме. Кынмон бордысь вань висёнъёс кутско, отын ук чер-висёнъёслэн кӧкызы. Зэм, таиз толалтэ быре, ымныре тулыс омыр шокче ини. Нош кайта, кайта нылпиосыз одно ик тятязылэн гындэм сапегеныз толэз пырпотозы… Ыжмы вань, со пиялоз на ай, озьыен, ыж гонмы но луоз. Отчыозь сапег гындон тӥрлык дасяно, таръяно…

Ма, пумен тулыс ужъёслы но дасяськоно. Кытысь ке но картошка, гордкушман, ӵужкушман, сугон кидыс шедьтоно! Нош кин ай тонэ — пал суез! — уже кутоз? То-то угось! Выльысь могӟет… Эшъёсыз буйгатӥзы вал: шумпот, йырыд быгылес кылиз шуыса. Бен, йыр быгылес, нош мар падиез? Семьяме сюдыны-вордыны но уг быгатӥськы ке… Оло, мукет солдатъёс сямен ик, бырыса умойгес луысал… Ну и верад! Иське, Оринэд, нылпиосыд мед курадӟысалзы, сютэм мед кулысалзы-а?.. Сыӵе малпанъёс йырад вуэмысь, Инмаредлэсь прощение кур. Со тонэ жаляз, со тонэ улэп кельтӥз. Улэп кельтӥз нылпиостэ, семьядэ утён понна.. Нош тон ке… сэмберъяськиськод на…

Войналэсь азьло тӧлвукоын но, кутсаськон машинаен но ужад вал ук! Али бон тӧлвукоен уг выро ни. Шур дурысь вукоез но ву уг бергаты ни… Нош азьвыл гуртын куинь тӧлвукоос вал. Огез гурт дорынгес ик сылӥз, мукетыз — вылӥынгес, куинетӥез — улӥын. Со интыез али ке но, вукоез аналтэмын ни ке но, Улӥсьвуко шуо…

Тӧлвукоос но Пуро вырйылын трос вылӥллям. Миша кыксэ тодэ на: Саваослэсь но Быжъёслэсь. Колхоз кылдон вакытэ соослэсь кузёоссэс кулаке поттӥзы, вукооссэс талазы но, зэмос кузёзы луытэк, со тӧлвукоос кема ӧз ужалэ ни. Гурт вырйылын, бакча сульдэръёс сямен, далай гинэ вужераса сылӥзы. Быжъёслэназ Миша но ужаз вал. Мар умоез вал соку, Миша отын тыршыку? Семьязы кӧттыро улӥз. Микворъёслэн ӝӧк вылысьтызы нянь ӧз бырылы.

Миша со вакытэз ӟечен тодаз вае. Но тани война ваньзэ сураз-пожаз, вань улонэз йырчукиназ. Тросэз гуртоосыз, коллёву ӟузьылыса, векало. Котькуд корка пыриз войналэн сурымез. Колхозлэн азинсконаз но со шӧдӥськытэк ӧз кыльы. Уго ӟеч ужась воргоронъёсты сяна, лек ожмаськонлэн ашмем ымыз гуртысь таза валъёсты но, кужмо техникаез но ньылӥз. Вань секыт уж зӥбиськиз нылкышно но быдэ вуымтэ нылпи пельпум вылэ…

Оштолэзь. Шунды яркытгес но яркытгес пиштэ. Музъем куӵо скаллы кельше. Иське, ӝоген со копак сьӧдэктоз, гырон-кизён, бакчае мерттӥськон дыр вуоз. Нош картошка кидыссы ӧвӧл. Маин басьтод? Уксёзы ӧвӧл. Воштӥськыны номырин. Мар ӟечез вань, вошъяса быдтэмын ни… Ма, дугды ай, дугды. Шинелез вань на ук! Толалтэ ортчиз, шуыны луоз. Иське, сотэк но (шунтӥсь-утисьтэк) тулысэз пумитаны быгато ини. Жаль, конечно. Мон солы улэп луллы кадь дыши ни вал. Соин лек ож тылӝу пыр но, ву пыр но потӥ. Со монэ толалтэ ӟырт кезьытэн но, сӥзьыл зор-котэн но шунтӥз. Уйёсы валес вал, саесэз — миндэр…

Оринлы шинельзэ воштон сярысь вераз но — соиз ӵушъял кадь пужалскиз:

— Остэ, остэ, ма, мар адями тон? Ваньзэ воштыны, вузаны дась! Бон ачид мае нуллыны ӧдъяськод? Нылпиос сямен, коркась потатэк, пукод-а?

— Ма… вуж фуфайкае вань ук ай… Соин ортчо…

— Нош калыке… калыке маин поталод? Пӧсьтэмын ни ук со! Кышъет пуктыны интыез но ӧвӧл!..

— Ничего. Ничего, Орин… Шуг югдурысь кызьы ке но потоно. Дӥсь шоры учкыса, кӧтыд уз тыры. Нош асьмелы улыны  кулэ, нылпиосты пыд йылазы султытыны… Бакчае мерттӥським ке, ум кулэ ни…

Ваче капка улӥсь Чудӟа Анна берыкъяса кема учкиз Миквор Мишалэсь ӵектэм шинельзэ. «Пӧсьтэмын ӧвӧл ай, кей сиымтэ. Талэсь шуныт дӥсь пӧрмытыны луоно», — ятвылтӥз котьмалэсь пайда поттыны быгатӥсь ог 40 аресъем кышномурт. Паймоно солы: огназ ке но, кӧттыро улэ, юрт котырез но ӝикыт, чипы-курегез но, пудоез но гид тыр, нянез-вӧез но ӝӧк вылысьтыз уг бырылы…

Бускельзылэн ӟеч улэмез пумысен Миша кызьы ке кышноезлы кылпум поттылӥз ни вал. Орин шуиз: «Со бригадиренымы кушласькемын…»

Анна йыраз лыктэм малпанзэ кыре ӧз потты. Шара мукет вераз:

— Уг тодӥськы, та ӟустыриед марлы ке яралоз на-а, уз ни-а. Куяськон нюке шат зӥртыны?..

— Ма-а-р-р?! — Миша йырыз курен кеськемзэ но ӧз шӧды. Бускель кышномуртлэн тазьы мыскылляса верамезлы пумит со кыл но ӧз шедьты ни. Анна киысь шинельзэ зуркак! кыскиз но коркась потон ӧс пала вамыштӥз.

— Я дугды ай, дугды, Миша, — кышномурт куаразэ соку ик небӟытӥз. — Мар, горд лыс кадь, гомак кенжид? Воргоронлы уг тупа сыӵе сям… Вай шинельдэ! Ведра картошкаен тупалом, малпасько…

— Ма… со туж ӧжыт ук!..

— Базарын кожаськод тросгес сётозы-а? Ай отчы мыныса-бертыса ик, быдэс нуналдэ быдтод. Эшшо ву вылэ бодыен гожтэмын: вузаны быгатод-а, уд-а.

Я озьы-а, тазьы-а, но ведра но ӝыны вылэ тупазы. Табере та картошказэ бакчае мерттӥськытозь утёно. Вераны каньыл, нош кызьы сое быдэстод? Кызьы сютэм улон зӧк кор вамен вамыштыса потод? Ма луэ, ваньзэ вузай ни. Озьы но ёрмон кыӵесысь потыны ум быгатӥське. Нылпиос лы но ку кылемын. Ӧйтӧд, кытыназы лулзы возиське на.

Копак ёрмем пумысь ини соос картошказэс сиыны кенешизы, нош синъёссэ — мерттыны кельтыны. Зэм, мерттӥськытозь кема на — толэзь пала. Кызьы утёд отчыозь «син» кидысэз, со медаз изъянмы, куасьмы шуыса? Микворъёс «картошказэс» ящикъёсы мерттыны малпазы. Берло ини сое удэн бакчаязы выжтозы…

Но  тани Миквор Мишалы уж ӵектӥзы. Осконтэм ке но, азьло интыяз: вукоысь мотористэ. Азьвылэз ужасьсы висьыны усем.

Нуназеяны бертэм кышноез картсэ ӧз тодма ни: курень синъёсыз чиляло, пуксетэз ӧвӧл, Орин ӝӧк сьӧрысен шыд ӟузьылыку но, со корка пушкытӥ, часкыл сямен, солань-талань ветлэ.

— Сё, — шуэ, — Орин, мон но табере адями радэ пото. Иське, семьяме ёрмонысь поттыны быгато!..

— Вордскымтэ чуньы вылын эн ворттылы ай. Улыса адӟом ини, кыӵе адӟон асьмемыз вите.

— Ӟечезлы ке ӧд оскы, со ноку уз вордӥськы, — мур ӝоже усемзэ Миша ӧз ваты.

Ӵуказеяз со ӝутскем мылкыдын вуко пала вамыштӥз. Вазь тулыс. Шунды инвис сьӧрысь гордэктэм ымнырзэ мычем ни. Уйёсы музъемез тан-тан кынтылэ на. Нуназепал шунды сое шунтыса небӟытоз, йӧкурам шур но тудӟоз, золгес бызьыны кутскоз. Инкуазь сайкамлы шумпотыса, чипсо, чирдо, шулало, тюргето тылобурдоос. Оло, соос озьы, будильник сямен, куазез сайкато?..

Ой, малы меда ӧвӧл кыкез ик киосы? Соосын со, тыло бурдъёсын кадь, пичи дыръяз сямен, шонаськыса бызьысал! Но пал бурдэн лобаны уг луы ни.  Амалтэк синмыз мугло киыз шоры мертчиз, лобӟем мылкыдзэ музъем вылэ васькытӥз. Бен, та война «кузьым» Мишаез курыт кӧтӝожен трос пол гуньдытъялоз на ай. Но со уз сётӥськы, уз! Ож тылӝу вӧсь кариз ке но, со ик кыдатӥз но шуг-секытъёсты вормыны дышетӥз…

Тани шур дурысь вуко. Со бадӟым корка выллем, озьы ик коръёслэсь ӝутэмын. Зэм, азьвыл сямен ӵыпетысь вуэн уг ужа ни, кӧэз двигатель бергатэ. Двигатель медаз тэтча, вырӟылы шуыса, со фундаментэн музъем борды юнматэмын, двигатель бадӟым питранэз (маховикез) бергатэ, нош со питран е пыр — пичизэгес, нош пичиез корт черс пыр — кӧэз.

Вукоын нокин но вылымтэ ай, солэн ӧсэз бордын маке быдӟа вашкала тунгон ошемын. Усьтонэз кытын ке но татын ик ватэмын, дыр, но Миша утчаськыса дырзэ ӧз быдты. Двигатель уго кырын, липеттэм азьын. Миша нырысь-валысь ужан интызэ чылкытатоно-утялтоно кариськиз. Соин гузэмпу тӥяны нюлэскы пыриз. Кыдёке ветлонэз ӧвӧл, сик артэ ик. Вамыш-кык лэсьтӥд но, тон отын ини.

Ужан интызэ чылкытатэмез бере, ӟустари кутыса, двигателез тазатыны басьтӥськиз. Вӧесь тузонэз ӵушылонъяз, моторез маяллянъяз тодаз вайиз, кызьы войналэсь азьвыл та машинаен ужан понна со Кечолысь курсъёсы дышетскыны ветлӥз. Бӧрысь та корт валэн Миша кеносысь лапас улын толбыт ю кутсаз. Соку уго бусыын ик ю арась-кутсась комбайнъёс ӧй вал на. Егит пиос жнейкае кыткем валъёсын юэз погыръязы, нош кышноос, нылъёс культо керттылӥзы но кабан сюрылӥзы. Собере отысь культоез кеносэ нуллыса, толбыт сямен, двигателен бергатыса, кутсазы. Ужаку тузон киль, кыд ке но луэ, шулдыр вал. Гуртын улӥсьёс оскизы угось, колхозлэн кеносэз юэн тыр пачылмиз ке, соосты но сютэммон уз кекаты ни…

Ваньзэ сураз-пожаз война. Мишалы но — со армиын вал ке но ини, финъёсын ваче пумит луонэ но пыриськиз — повестка сётӥзы. Вылаз ик, бригадир ас интыяз Васька Сергеез ужаны дышетыса кельтыны косӥз.

…Миша армие выльысь басьтэмзылэсь сокем ӧз кушетскы, уго вань таза воргоронъёс вормонэз ӝоггес вуттон понна фронтэ кыстӥськизы. Нош Орин Мишаезлэсь оже кошкемзэ бадӟым кайгуэн адӟиз. Шудон уж-а ма — куинь пичиесь нылпиосын кыльыны! Собере, Инмар но огпол быронлэсь утиз ке, весь уз утьы ук! Солэн уть кӧня нылпиосыз! Ваньзэс чакланы, возьманы моӵез уз сузьы. Быроз, быроз Мишаез, гуртэ уз вуы ни!..

Картэз кошкыку, музын погылляськыса ик, ӝож куараен кесяськыса, бӧрдӥз Орин. Буйгатыны тыршись кышноосты кылэм-адӟем ик ӧз кары.

— Мон берто, берто, Оринэ, оскы, вылысь  Инмармы утёз ай, утёз монэ! — пичи муртэ сямен, кышнозэ лӥятыны выриз Миша. Нылпиосыз, атаенызы кемалы люкисько шуыса, валаса ик ӧз вуттэ кадь. Малпазы, вылды, базаре ветлыкуз выллем, ӝыт кыӵе ке но ческыт сиёнэн вуоз…

Ӝоген вукочи Кольтыр Косьта но лыктӥз. Солэн фуфайкаез, эрезез, изьыез пызен наштаськемын, тӧдьы-пурысь луэмын. Эсьма, изьы улысьтыз потэм  йырсиез но тӧдь-тӧдь. Таиз ини пурысьтаса. Ма, арлыдыз но вань ини: куатьтонэтӥ тулысэз пумита.

— О, ӟечкыласько выльысь уже потэменыд! Мӧзмемед, мӧзмемед, шӧдӥське, корт лулыдлэсь-моторедлэсь! Эсьма, уез но иземед луымтэ ни… Адями сюлэм сыӵе уга: улэпез борды но, улэптэмез борды но сир кадь лякиське. Мар борды дыше, солэсь люкиськемез уг поты ни. Тон но озьы ик, дыр?

— Озьы, озьы, Косьтагай. Уд но оскы, эсьма, войнаысен но та двигательме, матысь гажанме кадь, вӧтын адӟылӥ. Мӧзмисько вал, мӧзмисько…

— Ужась мурт, шуэ асьме калык, укно пыр ик адӟиське. Тани тон но, нунал ӝужаку ик, астэ возьматӥськод ини: ужан интыдэ чылкытатэмед, мотордэ но сузямед, вӧямед. .. Иське, ужмы пӧзёз. Нош ужмы — йыровыл! Колхозлы фураж, пудо сиён кулэ, гуртоослы — пызь!.. Война лябӟытӥз адямиосты. Сютэм улон, дӥсьтэк-куттэк ветлон дырызлэсь вазь нуэ соосты шай вылэ… Я коть урмем Гитлерез вормим. Табере калыкмы эркын шокчыны кулэ…

Собере со вуко вӧзысь бадӟым пуклёк  вылэ пуксиз. Кисыысьтыз газет юдэс но махоркаен пуйызэ поттӥз, тамак бинялтӥз но кенжытӥз. Пуйызэ но кагаззэ кисыяз донгон сямен юаз на:

— Тон, Миша, та курыт ӵындонэн выльысь ӧд ни эшъяськы, дыр? Войнаын таӵе кулэтэм арбериен вырыны неку, луоз?

— Ма, кыскисез кыскиз… Эсьма, кыскисьтэмезлы но, оло, юри исаса кадь, тамак сётъязы. Но ведь тодмо: тамакен эшъяськод — тазалыкеныд люкиськод.

Миквор Миша фронтын дыръяз син азяз но пуктыны ӧз быгаты, макем зол ёрмон кыӵесэ сюрем вылэм солэн семьяез. Йырвизьмыныз бен валатэк ӧз улы: капчи ӧвӧл соослы. Война вакытэ вань советской калыклы секыт. Тушмонэз вормон понна гурт берпум шорем няньзэ, шуыны луоз, Горд Армилы келялляз. Кунмылэн лозунгез ик «Всё для фронта, всё для победы!» вал ке…

Но ведь гуртысь властьлы но ас калыкез сярысь кӧня ке но сюлмаськыны кулэ вал, дыр. Вылаз ик, сюдӥсьсы фронтын ожмаське ке. Яке солэсь но уродгес — утись-вордӥсьсы ожын быремын ке… Кызьы соослэн матысь адямиоссы уло, мар сиё, мар дӥсяло-кутчало?.. Нёшто тае колхоз пред, бригадир уг тоды? Тодэ ке, малы, иське, ёрмисьёслы юрттӥллямтэ?.. Мишалы потэ: самой со лозунгысь куронэз умойтэм валамысьтызы. Татчы кышкан но ватӥськемын, луоз. Уго война вакытэ куронъёс, законъёс ой-ой кыӵе чурытэсь! Пичильтык янгыш понна пытсэт сьӧры келяло… Нош адямилы копак номыр ке сиыны: одӥг ымтыр но нянез ке ӧвӧл, соку мар? Сыӵе дыръя но анаймурт ачиз сярысь уг, нылпиосыз сярысь нырысь ик малпа. Озьы кеносысь — ю шертонысь я кутсаськонысь бертыкуз — кисыяз одӥг кырым тысь понэ… Сое уг кышкаты ни тюрьма но, штраф но! Уго гуртаз солэн, умортоысь шырчикпиос сямен ымзэс усьтыса, нылпиосыз возьмало.

Миша кузпалызлэн верамезъя тодэ ни (ма, табере, ожысь бертэмез бере, ачиз, ас синмыныз адӟе), кыӵе уралмыса улэм солэн семьяез война вакытэ. Гурт котырысь, пе, иськем кемысь сиыны ярась турын-куарез, жуг-жагез, нюло, беризь кадь писпуосты шедьтыны уг лу ни вал. Нош тулысэн музъем ӧжыт шупам бере, чипыен но куреген шуэм сямен, пото вылэм картошка бусые крахмал бичаны…

Миша син азяз ик пуктыны шугоме, кызьы солэн 10, 8, 5 аресъем нылпиосыз йӧназ-тыраз дӥсьтэк-куттэк, кыӵе ке уродос ведраен асьсэлы кӧттырос утчало… Шимес! Нош кытчы пырод? Мумызы вазь ӵукнаысен бер ӝытозь колхоз ужын. Шутэтскон нунал сётъясь ӧвӧл. Анаймурт, ужысь копак какалмыса бертыса но ай, нылпиосызлы но, аслыз но маке со сиён йӧндырыны кулэ… Тӥни соку пичи ке но (ӝамдэлы) гусъяськыны юрттэ пиналъёслэн колхоз бусыысь шедьтэм, бичам крахмалзы. Берло, будэмзы бере но, та ческыт сиёнзэс соос ноку уз вунэтэ ни…

 

 

 

 

 

Удмурт Дунне
By Удмурт Дунне Июнь 25, 2016 11:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*