«Лудорвай» музей-заповедник юбилеезлы дасяське

Удмурт Дунне
By Удмурт Дунне Май 25, 2016 14:30

30 арлы  — 30 тыпы

Вордӥськем нуналэзлы сӥзьыса, «Лудорвай» ар ӵоже уно ужрадъёс, фестивальёс, адӟытонъёс ортчытэ. Мар вите татчы лыктӥсьёсты? Ваньзэ сое тодӥзы-адӟизы шаерысьтымы журналистъёс.

0106555,архитектурно-этнографический музей Лудорвай,лесопосадка

«Лудорвайын» луоз тыпы арама.

 Нырысьсэ

Ижлэсь 17 иськеме интыяськем «Лудорвай» музей тодматэ 19-тӥ даурлэн кутсконысеныз удмуртъёслэн улэм-вылэменызы. 40 гектар вылын вань лымшор но уйпал удмуртъёслэн, ӟучъёслэн юртъеръёссы. Музейын ужасьёслэн туж потэ вылэм на кылдытэмзы бесерманъёслэсь но старообрядецъёслэсь юртъеръёссэс, но талы коньдон, пе, уг тырмы. 2009-тӥ арысен кутскыса, 3 арлы огпол музейлы 3 миллион манет висъяське вал кун юрттэт сямен. Та уксёен «Лудорвае» ас дыраз басьтӥзы трактор, мотоблок, лэсьтӥзы-выльдӥзы куд-ог пуктӥськемъёсты. Озьы инбам улэ интыяськем музей узырмиз. Но берло аръёсы сыӵе юрттэт уг ни вуы, нош коньдонтэк трос уд лэсьты. Нош, кылсярысь, Балезино ёросысь Юндаысь бесерманъёслэсь юртъерзэс татчы ваён-пуктон дунтэм уз усьы. Соин ик кун ласянь юрттэт заповедниклы мултэс ӧй луысал. Но музейын ужасьёс мылкыдзэс уг куашкато, соослэн трос малпанъёссы, проектъёссы. «Лудорвай» заповедниклэн кивалтӥсезлэн воштӥсез Ирина Вершинина верамъя, туэ соос понна туж ӵем «нырысьсэ» кыл чузъяськоз:

— Ми та дырозь озьы ӧм на ужалэ вал, кылсярысь, журналистъёслы нырысьсэ пресс-тур малпамы, туннэ нырысьсэ усьтӥськоз Москваысь архитектурая Щусев нимо кун музейлэн адӟытонэз, 21-тӥ мае нырысьсэ «Та азбарлэн шудбурез» калык крезьгуро спектакльмес возьматомы, 13-тӥ-14-тӥ августэ нырысьсэ ортчоз «Гурт-fest» калыккуспо фестиваль. Туэ ик нырысьсэ кызьпу арамаямы пуктомы куала. Ӵапак сыӵе куала сылэ Татарстанысь Огырчи ёросысь Варклед-Бӧдья гуртын.

 Корка пуктэм потоз

Москваысь архитектурая Щусев нимо кун музейысь туспуктэмъёсын, макетъёсын но пулэсь арбериосын адӟытон «Лудорвайын» усьтӥськоз шуыса вераськонъёс мынӥзы ини ар кутсконысен. Таяз арняе «Русское деревянное. Взгляд из XXI века» выставка усьтӥськиз. Та проектлэн одӥгез авторез, Москваысь архитектурая Щусев нимо музейын ужась Ольга Корчагина, адӟытонлэсь 2 валтӥсь малпанзэ шараяз:

— Та выставка эшшо огпол возьматэ: писпулэсь котьмар лэсьтыны луэ, но аръёс ортчемъя писпу сисьме-быре. Туж потэ вылэм, та чеберлыкез асьмеос адӟыны, дунъяны но утьыны мед быгатомы азьланяз но. Шумпотӥсько, та выставка дорады усьтӥськиз шуыса, со понна тау кароно «Лудорвай» музейын ужасьёслы, соос — зэмос профессионалъёс. Та нуналъёс ӵоже ӵыжы-выжыос кадь луимы ини, — мылкыдзэ усьтӥз Ольга Александровна.

Лаптаен шудон мылкыдэз ӝутэ.

Лаптаен шудон мылкыдэз ӝутэ.

17-тӥ-21-тӥ дауръёсысь пу архитектуралы сӥзем туспуктэмъёс но арбериос зэмзэ но паймыто. Кылсярысь, 1878-тӥ арын Москваысь

С. Мамонтов меценат пуктэм мунчо. Кык этажъем чебер пу юртэз мисьтӥськон инты шуыны ым уз пыры: малпалод, та узыр адямилэн коттеджез яке выжыкылысь дворец. «Лудорвайысь» реставратор, Удмуртиысь дано строитель Дмитрий Шабалин паймемзэ ӧз ваты: та шедевръёс шоры учкыса, валаськод, макем кибашлы калык улэ Россиын. Адӟытонэз усьтонэ лыктэм культурая но туризмъя министр Владимир Соловьёв воргоронъёслы вазиськиз:

— Шумпотӥсько, туннэ татын воргоронъёс трос шуыса. Та выставкаез адӟыса, соослэн писпу мерттэмзы гинэ ӧвӧл, таӵе ик чебер корка пуктэмзы мед потоз но мед пӧрмоз.

 Табань сие   40 сюрс адями

«Лудорвайын» ваньзэ-ӧвӧлзэ 49 адями тырше, котькудӥз ас удыссэ рос-прос тодэ-быдэсъя. Татчы ар куспын 40 сюрс пала адями вуылэ. Котькудзэ кема витем куноез кадь пумитало. Кыӵе муртъёс лыкто, нянь котыкумы ик, тодӥськомы ини, шуэ музейын 20 арлэсь кема ужась Светлана Данилова.

Удмурт кеносын.

Удмурт кеносын.

— Капчи мылкыдын лыктӥсь калыклэсь уд жадиськы. Нянь котӥськод-а, табань пыжиськод-а — ваньмыз ӝутске-пыже, ческыт пӧрме, кырӟаку куара но ачиз потэ кадь. Нош музее секыт мылкыдын, кунэрес тусъёсын лыкто ке, куара но ляб чузъяське, табаньмы но уг ӝутӥськы. Кунгож сьӧрысь лыктэмъёс кошкыкузы паймемзэс верало, сыӵе, пе, шуныт мылкыд кузьмаськоды тодмотэм адямиослы. Ма, ми котькуд лыктэм муртлы ӧтем кунолы кадь шумпотӥськомы, — шуэ Светлана Николаевна.

Зэм но, журналистъёс ас вылазы шӧдӥзы, кызьы пумитало но куно каро «Лудорвайын». Нырысь милемлы экскурсия ортчытӥзы, собере мылкыд карисьёс кин лаптаен шудӥз, кин писпу мерттӥз. Музейлэн 30 аресэзлы сӥзьыса, татчы 30 тыпы мерттоно кариськиллям, Светлана Данилова верамъя, тыпыоссы татын вылымтэ на. Писпу мерттэм бере иворчиосты утялтӥзы удмурт сиёнъёсын. Пушнерен шыд, пӧсь табань, пешникен но кубистаен перепеч, турын-куарен парем чай туж ческыт кошкизы.

«Лудорвайлэн» 30 аресэзлы сӥзем сӥё-дано ужрад ортчоз 14-тӥ гудырикошконэ «Гурт-fest» калыккуспо фестиваль дыръя, отчы туж трос калык лыктоз. Но мылкыд карисьёслы «Лудорвай» музейысь капка котьку усьтэмын.

Галина Семёнова

Туспуктӥз А. Горбунов

Удмурт Дунне
By Удмурт Дунне Май 25, 2016 14:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*