Кун Кенешын сӥлы карозы лыдӟиськон юртъёсты

Удмурт Дунне
By Удмурт Дунне Май 26, 2016 15:08
 Национальной библиотекалэн фондэз ялан йылэ.

Национальной библиотекалэн фондэз ялан йылэ.

Ӵуказе, 27-тӥ мае, библиотекалэн нуналэзлы сӥзьыса, Кун Кенешын ортчоз сӥё-дано ужрад.

Отчы пыриськозы шаерысьтымы библиотекарьёс но та удысысь ветеранъёс. Библиотекаос кулэ ваньмызлы: покчиослы но арлыдоослы киязы книга шер кутылӥсь адямиослы но бадӟым тодосчиослы, городын улӥсьёслы но гуртысь калыклы. Уката ик гуртоослы. Кытын ӧвӧл культура юртъёс, отын библиотека ог-огеныд пумиськон, шутэтскон интылы пӧрме.

Та нуналэ шаерысьтымы кивалтӥсьёс устооссэ библиотекарьёсты пусъёзы наградаосын. Национальной библиотекаен кивалтӥсьлэн воштӥсез Анна Семёнова верамъя, ужрадын ик нырысьсэ «Даритель года» награждение ортчоз.

— Лыдӟиськонэз но книгаез азинтыны-вӧлмытыны юрттэмзы понна Национальной библиотекалэн пусэныз но дипломен сӥлы каремын луозы эшъёсмы но юрттӥсьёсмы. Кылсярысь, экономика наукаосъя доктор Юрий Перевощиков. Юрий Семёнович — нырысетӥ лыдӟисьмы, кин кузьмаз  фондамы аслэсьтыз книгаосын коллекцизэ. Удмуртиысь Тӧролэн Россиысь Президент бордын ужась оскем муртэныз Светлана Смирноваен кема аръёс ӵоже валче ужаськомы ини, берлоез ӵош дасям проектмы нимаськиз «Асьмелэн Вормонмы». Данъямъёс пӧлын ик «Удмурт дунне» газетлэн валтӥсь редакторез Зинаида Рябинина. Зинаида Кирилловна  ӵем кузьма библиотекаямы фин-угор темаен герӟаськем книгаосты. Нош 2015-тӥ арын шер пумиськылӥсь но дуно документъёсъя фондмы узырмиз нырысетӥ удмурт «Войнаысь ивор» газетэн.

Национальной библиотекалэн фондэз ялан йылэ. Шумпотоно, нимаз адямиос юртто ке сое узырмытыны. Кылсярысь, туэ Удмуртиысь валтӥсь библиотекалы дуно кузьым лэсьтӥз шаерысьтымы крезьгурчиослэн огазеяськонзылэн кивалтӥсез Марина Ходырева. Со атаезлэсь, нылпи кылбурчилэсь Герман Ходыревлэсь, книгаоссэ Национальной библиотекалэн фондаз сётӥз, — шуиз Анна Семёнова.

Удмурт Дунне
By Удмурт Дунне Май 26, 2016 15:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*