Куинь ӧсэн инвис

Удмурт Дунне
By Удмурт Дунне Май 25, 2016 15:01
пан

Вера Григорьевна.

16-тӥ куартолэзе Удмурт кун университетысь библиотекаын ортчиз Вера  Пантелеевалэн «Удмуртская поэзия и перевод: анализы, интерпретации, комментарии» но «Триптих» книгаосыныз тодматскон.

Дышетон удысысь йӧскалык ужпумъёсты тодон-эскеронъя институтлэн кивалтӥсезлэн воштӥсез, Удмурт кун университетысь журналистикая кафедраысь доцент, филология наукаосъя кандидат Вера Пантелеева зарни юбилеезлы аслыз но эшъёсызлы таӵе кузьым лэсьтӥз. «Удмуртская поэзия и перевод: анализы, интерпретации, комментарии» книгаяз со литературовед сямен сэрттэ-пертче удмурт поэзилэсь азинскемзэ. Нош «Триптих» бичетэныз поэзиез но прозаез яратӥсьёс доры автор вамыштэ Вероника Дор нимын.

Али гинэ пыжем книгаосын тодматскыса тросэз ӧз на вуттэ, но ужъёссэ дунъясьёс созэ но, тазэ но синйылтӥзы ни. Монография сярысь вераса, тодосчи Марина Серова пусйиз: туж капчи, валамон но чебер кылын гожтэмын, пӧртэм терминъёс пӧлы йыромытытэк. Соин ик сое ческыт потыса лыдӟозы кызьы ке студентъёс, озьы ик тодосчиос но. Вера Григорьевналэсь капчи гожъяськыны быгатэмзэ мукетъёсыз но пусйытэк ӧз кельтэ.

Йыг-йыг литературовед сямен Вера Пантелеева тодмо ни вал Флор Васильевлэн кылбуръёсызлы сӥзем монографиеныз но мукет ужъёсыныз, нош чеберлыко  литературае ӧс усьтэменыз паймытӥз ваньзэс ик. Кема аръёс ӵоже гожъям  ужъёсыз  шуак шарае потӥзы. Ачиз верамъя, улонэз «3» лыдпусэн герњаськемын бере, «Триптих» бичетэ но пыртэмын веросъёс, улонысь учыръёс, кылбуръёс. Москваысь Литературной институтын ӵош дышетскем эшез, прозаик но кылбурчи Лидия Нянькина верамъя, Вера Григорьевналэн пинал дырыз сярысь ӟуч кылын гожтэм тодэ ваёнъёсыз магнит сямен бордазы кыско. Удмурт кылын но лыдӟем потэ, пе, та выллем чебер гожъямъёссэ.

Лия Малых

Туспуктэм: Удмурт кун университетлэн лыдӟиськон юртэз

 

 

 

 

Удмурт Дунне
By Удмурт Дунне Май 25, 2016 15:01