Бадӟым удмурт диктантлы йылпумъянъёс лэсьтэмын

Удмурт Дунне
By Удмурт Дунне Май 18, 2016 14:58
IMG_4444

Бадӟым удмурт диктантэз гожтӥзы «Удмурт дунне» газетын ужасьёс но.

16-тӥ апреле Ижкарысь аудиториосын удмурт диктант гожтонэ туэ 65 адями пыриськиз. 510-эз ассэ эскериз радио пыр.

Ужрад туэ витетӥ арзэ радъяськиз ни. Жаляса верано, диктант гожтӥсьёслэн лыдзы уг йылы. Азьло кунгож сьӧрын улӥсьёс но гожто ке вал, туэ соос ӧз пыриське, быдэн одӥг-кык мурт вал Санкт-Петербургысь, Дагестанысь.

— «Мынам Удмуртие» радио пыр туэ диктантэз нуназе бере лыдӟим, сыӵе вакытэ калык ас ужъёсыныз выре, шутэтске, — шуэ ужрадэз ортчытӥсь Александр Бикузин. — Соин ик вераськиськом диктант гожтон дырез азьланяз ӝытлы ик выжтыны.

Диктант гожтӥсьёслэсь арлыдзэс ке учконо, тужгес но пересез — Кияса ёросысь Выль Тӥгырмен гуртысь 89 аресъем Мария Павловна Никонова, тужгес пиналэз — Шаркан ёросысь Пороз гуртысь 7 аресъем Лиза Титова.

Удмурт кун университетысь дышетӥсь, диктант лыдӟись Ольга Стрелкова верамъя, туэ текст орфография ласянь шуг ӧй вал. «Сӥ-дан» кылэз ке шат тросэз мыдлань гожтӥзы, пуштроссэ валамтэенызы. Знакъёс пуктылыны шугъясько союзтэм предложениосын но приложениосты висъянын. Ортчем аръёсын ӵошатыса, диктант ӟечгес гожтэмын, но 100 балл одӥг адями но ӧз люка.

Озьы радио пыр гожтэмъёс пӧлын тужгес трос балл люказы Дэри ёросысь Пётр Давыдов но Владислав Кабанов, Шаркан ёросысь Ольга Фролова, Алнаш ёросысь Ольга Рябина но Сьӧлта ёросысь Владимир Семакин. Ӟечкыласьком!

Но ми лыдъямъя, тужгес зэмлыко баллъёссы очно амалэн гожтэмъёслэн: угось таосызлэн луонлыксы ӧй вал ужзэс бӧрысь арня ӵоже эскерыны-тупатыны. Озьыен, тужгес шонер гожъяськисьёс пӧлын — «Удмурт дунне» газетын ужасьёс! Ми люкам 94 баллозь. Умой гожтӥзы «Ӟечбур!» газетын ужасьёс но. Шорлыдын ке учконо, 90-94 балл — со ӟеч дунъет, «5» пуктыны луоно, шуэ Ольга Борисовна, со ӵошка заочно амалэн басьтэм 98-99 баллы.

«Мынам Удмуртие» телерадиокомпания удмурт диктантэз азьланяз но ортчытъяны малпа. Ӟеч кичӧлтон уго пумен паськытгес вӧлме, но берло дыре тросэз верало очно гожтыны мылкыд каремзэс. Али сыӵе луонлыксы вань ай Ижкарын улӥсьёслэн гинэ. Но ужрадлы дурбасьтысалзы ке удмурт кылмы понна висись кивалтӥсьёс но ужбергатӥсьёс, анай кылынымы шонер гожъяськыны мылкыд карисьёс арысь аре йылысалзы. Куд-огез гожтыны кисыра на, баллъёссэ шараямлэсь возьдаськыса. Та ласянь ӟуч диктант радъясьёслэсь адӟем кароно вылэм — нимтулзэс шараятэк гожтыны мылкыд карисьёс уногес люкаськысалзы.

Кин кӧня балл люказ туэ, учкемды луоз «Мынам Удмуртие» телерадиокомпанилэн сайтысьтыз но «Иворъёс» группаысь. Нош асьтэлэсь янгышъёстэс эскерон вылысь сётӥськом шонер текст.

Зинаида Рябинина

Туспуктӥз А. Тронин

 

 Василий Ванюшев

Мынам дуно эше

Со вакытэ мон «Комсомолец Удмуртии» газетлэн редакторез луыса ужасько вал. Одӥгаз арнянуналэ валесысьтым султыса оло вуи, оло ӧй — Ижкарысь Пушкин нимо ульчаысь улонниысьтымы ӧсэ жингыртӥсь луиз. Усьтӥ но, со сьӧрын дуно эше, Сеня Виноградов, сылэ. Вождэс эн вае, гажано эшъёсы, асьмелы ваньмылы туж тодмо, дано адямиез, Удмуртиысь калык суредасез, Семён Николаевич Виноградовез мон озьы нимасько шуыса. Ми соин кемалась тодмо: Можга педучилищеын ньыль ар ӵоже ӵош дышетскимы, мынам син азям ик кутскиз солэн суредан сюресэз но.

Мон ӧй паймы сыӵе вазь куноелы: кӧснуналэ со пыраз мон доры редакцие, поттылӥз Огырчи базарын вузаськись туж чебер пужыосын куэм, керттэм, чильпам киужъёс сярысь. Мон жаляса верай, ми палан, Кизнер шаеръёсын, сыӵе пужыосын куиськисьёс ӧвӧл ни кадь шуыса. Сое, озьыен, эше пеляз понэм.

Семён Николаевич суредась гинэ ӧвӧл, со тодосчи, этнограф но. Суредъёсыз солэн яркыт буёлъёсын кисьтасько, удмурт калыклэсь чылкыт сямъёссэ кырӟаса верало кадь. Котырысь дунне но, адями вылысь дӥськут, чеберъянъёс но, суредам муртъёслэн выросъёссы, мугор воземзы но — ваньмыз удмурт.

Тодам вайисько на Будапештын ортчем конгрессэз, кытын Семён Виноградов тодосчи лыдӟиз «Шунды» пужы сярысь докладзэ. Паймытӥз унозэ, уката но — кунгож сьӧрысь эшъёсмес. Ваньмызлэн тодэмез потӥз та пужылэсь кылдэмзэ но, пуштроссэ но, туала аръёсы уже кутӥськемзэ но. Татысен ик кутскиз Кизнер ёросысь Улысь Кусо гуртысь мынам вордӥськем юртэлэн бадӟым капка бордысьтыз пужы сярысь вераськонмы. Солэсь азьло мон та пужыез, оло, миллион пол адӟылӥ, но зэмос сӥ-данзэ ӧй но тодылы, ӧй но валалля.

Удмурт Дунне
By Удмурт Дунне Май 18, 2016 14:58