«Удмурт Кенешлэн» выль исполкомезлэн нырысетӥ кенешонэз ортчиз

Удмурт Дунне
By Удмурт Дунне Апрель 27, 2016 13:17
степанова

Ашальчи нимо премиез басьтӥз Надежда Степанова

24-тӥ южтолэзе ортчиз  «Удмурт Кенешлэн» выль исполкомезлэн нырысетӥ кенешонэз.

Татьяна Ишматова исполкомчиослы мадиз туэ быдэстоно ужъёс сярысь. Данакез соос герӟаськемын лулчеберетмес азинтонэн но сӥземын огазеяськонлэн 25 ар тырмонэзлы. Со сяна, со ӵектӥз мыло-кыдогес пыриськыны быръён ужрадъёсы.

Выль тӧро ӵектэ «Удмурт Кенеш» борды визьнодасьёслэсь (экспертъёслэсь) кенешсэс кылдытыны — отчы ӧтёзы ассоциацилэн ужаз меӵак пыриськисьтэм, но ас удысазы бадӟым вормонъёс басьтэм, азинлыко адямиосты. Туж ӟеч малпан —  тодмо-дано адямиослэн визь-кенешсы  ноку мултэс уз луы. Кин отчы пыроз, нимын-тулын тодмо  ӧвӧл на, ивортом бӧрысьгес.

Исполком — со ялан ужась ёз, отчы пыре пӧртэм удысъёсысь 30 адями. «Удмурт Кенешлэн» ужаз нуналмысь кылдыло пӧртэм юанъёс, но кыӵе ке одӥг сюбег учыръя кулэлыкез ӧвӧл ваньзэс ӝутканы, со понна ужаны кулэ удысъёсъя нимысьтыз группаос. Кенешемын ужаны 6 группаын: этнополитика но право, дышетон, лулчеберет, семья но тазалыкез утён, егитъёсын ужан, ивор вӧлмытон.

Озьы ик  эскеремын Национальной (Кузебай Герд нимо, Ашальчи Оки нимо, Эрик Батуев нимо) премиос сётъянъя комиссилэн положениез, отысь  куд-ог ёзчиос исполкоме выжемен, интыязы мукет адямиос пыртэмын.

0101405,Киясовский район,деревня Старая Салья,национальность,костюм,удмурты,старики

Ашальчи нимо премиез басьтӥз Марина Морякова

Но тужгес ӟечез ивор —  тодмо луизы 2016-тӥ ар понна Ашальчи Оки нимо премиен пусъем муртъёс. Ӵектэмын вал 6 мурт, ваньзы етӥзэсь, визьмоесь, синмаськымонэсь, но комиссия бырйиз кык устозэ — «Нылкышно кенеш» огазеяськонлэсь кивалтӥсьсэ Надежда Степановаез но Кияса ёросысь удмурт азьветлӥсез Марина Моряковаез. Исполком таин соглаш луиз. Премия сӥё-дано сётэмын луоз туэ 27-тӥ оштолэзе Можга городын — отын ортчозы Ашальчи Окилы сӥзем лыдњонъёс. Ӟечкыласьком та кык йӧно удмурт нылкышноосты таӵе данъетэн!

Исполком эскериз на мукет ужпумъёсты но. Кылсярысь, калыклэн вазиськонъёсызъя воштэмын луыны быгатоз Гербер шулдыръяськонэз ортчытон дыр — туэ со чакламын вал 18-тӥ инвожолы, но ӵап соку  укша Тройча поминка. Та пумысен «Удмурт Кенеш» кивалтэтэ вазиськыны малпа.

Ольга Зорина

Туспуктӥз А. Горбунов

Удмурт Дунне
By Удмурт Дунне Апрель 27, 2016 13:17