Ижысь Полина Белоусова — сюрс пӧлысь яркытэз!

Удмурт Дунне
By Удмурт Дунне Апрель 29, 2016 12:27

Кемалась ик ӧвӧл Москваын ортчиз «Шоркарлэн буёлъёсыз но куараосыз» 7-тӥ калыккуспо фестиваль. Отчы пыриськизы сюрслэсь уно пинал усточиос.  Та  конкурсын Гран-при басьтӥз Ижысь Полина Белоусова.

белоусова

Гран-при басьтӥз Ижысь Полина Белоусова.

Ижысь искусствоосъя 2 номеро П. Чайковский нимо нылпи школаын пиналъёсты чеберлыкез валаны дышетэ Елена Ажгибицева. Елена Анатольевна — Удмуртиысь культура удысысь дано ужась, ачиз та школаез йылпумъямын, татын ик со тырше ини 35-тӥ арзэ. Ӵапак солэн дышетскисез, 13 аресъем Полина Белоусова, Москваысь бадӟым вормонэн бертӥз. Та фестивале пыриськизы Россиысь, Абхазиысь но  Белоруссиысь сюрслэсь ятыр пинал кырӟасьёс, эктӥсьёс, крезьгуро инструментъёсын шудӥсьёс.

— Полинамылэн вормонъёсыз шумпотто. Со 6 аресысеныз фортепианоен шудэ. Каникулъёс, праздникъёс шоры учкытэк, волятэ аслэсьтыз быгатонлыкъёссэ. Кык ар талэсь азьло Франциын но Испаниын крезьгуро фестивальёсын лауреат луылӥз. Ижын, Пермьын, Санкт-Петербургын, Москваын ортчылэм конкурсъёсын вормылӥз. Полина туж зол тулкымъяське сцена вылэ потон азяз. Та пумысен мон солы шуисько: бадӟым артистъёс но калык азе сюлмаськыса пото, отын номыр уродэз ӧвӧл. Сцена вылэ вамыштыкуд, тынад мылкыдыд огшоры луиз ке, тон шудод но огшоры, уд быгаты возьматыны сое, мае усьтэмед но калыклы вуттэмед потэ крезьгур пыр, — шуэ Елена Анатольевна.

«Шоркарлэн буёлъёсыз но куараосыз» конкурсын «Устоез дышетӥсь» номинациын пусъемын вал ачиз Елена Ажгибицева. Педагог верамъя, одӥг вормон но тыршытэк уг лыкты. Нылпилэн талантэз но тыршемез, дышетӥсьлэн тодон-валанэз, анай-атайёслэн сюлмаськемзы но юрттӥськемзы бордысь пото пиналлэн вормонъёсыз.

— Нылпиос одно ик шудыны кулэ ӟеч инструментъёсын. Усточиосмы Удмурт филармониын «Стейнвей» роялен шудо ке, соослэн, умой  инструментлэсь чылкыт но жингрес чузъяськемзэ кылыса ик,  мылкыдзы бурдъяське ини. Жаль, тросэз кунгож сьӧрын ортчылӥсь конкурсъёсы пыриськыны уг быгато — ваньмыз со туж дуно. Полина Белоусовалэн вормонъёсыз понна тау карыны кулэ анаезлы Елена Константиновналы но. Та кышномурт урокъёсам нылыныз ӵош пукылӥз. Котькуд конкурсэ, фестивале  ачиз ветлэ. Туэ гужем Полина нош ик кузь сюрес вылэ дасяське, Прагаын ортчоно крезьгуро конкурсэ пыриськыны малпа, — шуэ Елена Ажгибицева.

Галина Семёнова

Туспуктэм: ТО «Триумф»

Удмурт Дунне
By Удмурт Дунне Апрель 29, 2016 12:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*