Студентъёслэн элькун тулыссы: «Мон i 100» группа — устоосыз пӧлын!

Удмурт Дунне
By Удмурт Дунне Апрель 28, 2016 09:30
удгу

Ми — Удмурт кылосбуръя, финно-угроведениея но журналисткая институт.

Пукиськод пеймыт сцена сьӧрын. Куинетӥ пол кутӥськод тюнердэ. Нош но нош гитараедлэсь вылзэ чылкытатӥськод, сиоссэ тупатӥськод. Мынам бас-гитарае, Ксюшае, чиньыосме эн сура!

Сайкаськод ӵукна, мынӥськод душ улэ. Мычиськод туштэ, йырсидэ гелен пуктӥськод. Капчи мылкыдын кутӥськод утюг. Йӧтскиськод бордаз. Сутӥськод чиньыдэ. Ым ачиз усьтӥське, отысь шӧтэм кылъёс пото. Соку гинэ быдэсак сайкаськод.

Сыӵе шулдыр кутскиз мынам та нуналэ. Чай юыса, вуи репетицие. Репетициын звукачъёс шуо: езъёсмы ӧвӧл. Инструментъёсты ӝуатыны ум быгатэ. Нош ик тышкаськон кылъёс. Вайизы УдГУ-ысь езъёсты. Концерт кутскытозь, час кылиз. Кӧшкемаськом — вунэтӥськеммы вайыны флэшка, нош отын — кырӟанмылы барабан гур…

Сюлэмшугъяськеменыд сэрен чиньыостэ ӟус борды вакчи-вакчи чаляк йыгаськод. Тыбыр кузя ваське пӧсям ву, удмурт дэра дэрем уг сёты капчи шоканы. Бирдыоссэ ишкам потэ. Кылиз на кык номер. Ми потӥськом дас сизьыметӥ… Час ӵоже малпаськыны, ваньмыз пӧрмоз-а, уз-а, секыт. Дыр мынэ туж каллен, Интернетын номыр вылез ӧвӧл. Черод вуиз! Султӥськом, ӟыгырскиськом, кеськиськом: «Ваньмыз пӧрмоз!» Но, вань куамын кык пиньёсынымы мыняса, потӥськом сцена вылэ.

«Мон i 100» группа «Калык вокал» номинациын 3-тӥ инты басьтӥз.

«Мон i 100» группа «Калык вокал» номинациын 3-тӥ инты басьтӥз.

Ньыль ар мон дасяськи та ужрадлы, ньыль ар мон потай УдГУ-лэн сцена вылаз «Студентъёслэн тулыссы» фестивале. Нош татын, Удмурт театрлэн сцена вылаз, шудӥсько нырысьсэ. Дышетсконэлэн берпуметӥ араз шуд усиз элькунысь студентъёслэн тулысазы УдГУ-лэсь данзэ утьыны.

Номермы милям — попурри. Тодмо рок-крезьгуръёсты суралтӥм, нош кылъёсыз — удмурт, пӧртэм калык кырӟанъёсысь басьтэмын. Тау вань эшъёсылы, кинэн мон сылӥ со сцена вылын. Ми — Удмурт кылосбуръя, финно-угроведениея но журналисткая институт. Удмурт филологияя но журналистикая факультетъёсты герӟам бере ми луим юнэсьгес. Милям льӧль малпанмы — сюрыны Казане, Россиысь студентъёслэн тулысазы. Но милем ӧзгес удалты, льӧль малпан сылмиз ас понназ, но «Мон i 100» группамы «Калык вокал» номинациын 3-тӥ инты басьтӥз. Котьма ке но Удмурт кун университет утӥз Гран-при — Удмуртиысь вань вылӥ дышетсконниос пӧлын нырысетӥ инты. Ксюша мынэсьтым кылзӥськиз, чиньыосы ӧз эрекчалэ. Фестиваль бере монэ жюриысь пияш ӧтиз аслаз группаяз шудыны.

Алексей Керенский

Удмурт Дунне
By Удмурт Дунне Апрель 28, 2016 09:30