Оскон: Кин яратэ, со курадӟе…

Удмурт Дунне
By Удмурт Дунне Апрель 21, 2016 15:30

шкляевАли мынэ Быдӟым визьдыр. Оскись калык кӧсутёнэз луллэн тулысэныз ӵошатэ.

Визян вакытлэн мур пуштросэз. Куд-огез шуо: сӥль-йӧл, кӧй-вӧй ум сиське, озьыен, сьӧлыкъёсмылэсь куштӥськиськом. Тодамы возёно валтӥсьсэ: асьмеос сӥль ум сииське, нош матысьёсмес вузаськом ке, со визьдырез серем карон луэ.

Соин ик йырысьтымы, мугорысьтымы но сюлмысьтымы вань кулэтэмзэ, юрӟымзэ, гочатӥсьсэ палэнтыса, шекъёсмес, ляб луэммес вормыны тыршоно но лулмес чылкытатыны дышетсконо. Инмарлы оскись калык чида вань шуг-секытъёсты, Иисус Христослэсь адямиослэн сьӧлыкъёссы понна курадӟемъёссэ тодаз вайыса. Преподобной Силуан Афонский гожтӥз: «Утисьмес киросэ кортӵогакузы, Инмар Анай вӧзаз сылӥз. Солэн вӧсез номырин ӵошатонтэм бадӟым вал, малы ке шуоно Пизэ яратонэз бадӟым вал. Асьмеос тодӥськом, кин золгес яратэ, со ик золгес курадӟе но… Инмар Анай ӧй быгатысал та быдӟа кайгуэз вормыны, Святой Дух но Кузё-Инмар кужым ке ӧй сётысалзы. Дун-чылкыт Мария Нылмурт соин гинэ улэп кылиз, Кузё-Инмарлэн потӥз: Со мед адӟоз Пиезлэсь кулыса улӟемзэ, Иисус Христослэн инме ӝутскемез бере музъем вылэ апостолъёслы но выль христиан калыклы шумпотонлы но буйгатонлы мед кылёз шуыса». Юнме-а меда Инмар Анайлэсь, Иоанн Богословлэсь сямен ик, кулэмзы бере шайгуысьтызы мугорзэс ӧз шедьтэ? Тодӥськом ук: вань шуг-секытъёсты пумозяз чидамъёс вуоно вапумазы бырисьтэм улон басьто.

Визьдыръя, черке ӵем ветлэм, исповеде пырам, причастие басьтэм сяна, ӟеч ужъёс лэсьтыны тыршоно.

Визьдыръя, черке ӵем ветлэм, исповеде пырам, причастие басьтэм сяна, ӟеч ужъёс лэсьтыны тыршоно.

Толон, 7-тӥ оштолэзе, бадӟым черк праздник — Благовещение — вал, куке Дун-сьӧлыктэм Мария Нылмурт тодӥз, со Инмарез вордоз шуыса.

Инмар Анай туала улонын но уг кушты асьмемыз. Тани одӥгез гинэ учыр: 1995-тӥ арын машинаям юнматӥ Инмар Анайлэсь оброссэ. Кытчы ке мынон азям аслам кылъёсыным гинэ вазиськисько вал Инмарлы но Дун-чылкыт Мария Нылмуртлы. Куазь зорем бере асфальт гылыт вал, пумитам сюрес кожонысь потӥз мукет машина, ми шуккиським. Монэ поттэмзы бере гинэ адӟи, машинаелэн быдэс кылиллям мышкысьтыз кык питранъёсыз но одӥг ӧсэз. Мынам пукем интыелэн бервылыз ик уг адскы вал. Мон зол ӧй сӧсырмы, нош кырымме усьтӥ но отысь Инмар Анайлэсь пичи оброссэ адӟи. Адямиос вылӥ визез, шӧдонэз утчаны-усьтыны выро инсьӧрысь яке мукет планетаосысь, нош вань-а со музъем вылын, малы ке уг малпасько. Инмарлы оскисьтэм луон калыкез сӧре, улонлэн пыдсаз уськытэ но быдэс цивилизациосты быдтэ.

«Инмарез тодымтэ-кылымтэ кариськон быронэ вуттэ, — шуылӥз преподобной Паисий Святогорец. — Инмарлы оскон — бадӟым уж. Адями Инмарлы служить каре, собере ни яратэ анай-атайзэ, корказэ, вордскем шаерзэ. Кин уг яраты Инмарез, со нокинэ но, номыре но уг яраты. Туала вакытэ валтӥсь интые потӥз коньдон, адями уг шумпоты мукет адямиослэн ӟеч ужъёссылы, уг жаля-уг юртты шуге-леке шедемъёслы, калык лек, чурыт, кезьыт. Нош сьӧд кужымъёсын, улонысь уродэныз ӧд ке нюръяськы, со эшшо бадӟым луоз. Вашкала дыръя калык, Инмарлы оскыса, улӥз, соин ик Кузё-Инмар но святойёс бакельзэс сёто вал. Соин ик асьмеос вормылӥм трослы кужмо тушмонъёсмес. Нош али асьмеос шуиськом: ми — православной адямиос, но со кыл вылын гинэ, Инмарлэн курон-косонъёсызъя улӥсьёс ичи. Ческыт кылъёслэн дунзы соку гинэ вань — соос потэмын ке пӧяськисьтэм ымысь».

Алигес Патриарх Кирилл проповедез дыръя шуиз: «Асьмеос утьыны кулэ православиез. Россия туннэ быдэс дуннеысь христианъёсты возись кужым луэ. Россиез утён ик луэ православной осконэз утён. Туала улонлэн одӥгез бадӟымез кышкытлыкез — христиан калыкез ултӥян». Дуннеын котькуд вить минутэ одӥг христианэз виё, сутка ӵоже — 300 пала, нош араз — 100 сюрс котыр. Нош асьмеос тодымтэ-адӟымтэ улсы кариськиськом, милемды уг ултӥяло ук. Туала адями кышкась но возьыттэм луэмын. Сомында книгаос, сомында выль кылъёс, нош кытчы луиз улонэз валанмы, зэмлыкез дунъяммы? Шонер улыны турттӥсь муртлы туала улонын инты уг шедьы. Вашкала дыръя уродэз вые вал трос ӟечез пӧлы, нош али мукет югдур: котырамы сомында кырсез, лекез, ӟечлык отчы ыше.

Туала улонэз Инмар кык киыныз утьыны выре, азьло одӥг киыныз гинэ кутэ вал. Дыр вуэмын ини асьмелы малпаськыны но, сьӧлыкъёслэсь куштӥськыса, ӟеч ужъёс лэсьтыса, утиськон сюрес вылэ султыны.

Иисус Христослэсь Иерусалиме Пыронзэ, асьмеос сое Пучыарня шуиськом, пусъёмы 24-тӥ оштолэзе. Соку Инмар сӥё-дано но ас мылкыд каремезъя пыриз Иерусалиме, тодӥз ке но, татын со трос курадӟоз но адямиослэн сьӧлыкъёссы понна кортӵогамын луоз шуыса.

 

Удмурт Дунне
By Удмурт Дунне Апрель 21, 2016 15:30