Марий Элысь удмурт егитъёс огазеяськизы «Зоргуре»

Удмурт Дунне
By Удмурт Дунне Апрель 28, 2016 10:00
зоргур

«Мый марла ойлем» («Мон вераськисько пор кылын») акциын.

Марий Элын улӥсь удмурт егитъёс «Зоргур» (vk.com/udmyo) огазеяськон кылдытӥзы.

Марий Элысь удмуртъёсты огазеяны малпаз Карлыган черкогуртысь Веста Андреева. Нылаш дышетске Марий Элысь Поволжьея кун технологической университетын, школа вакытаз ветлӥз Карлыганысь «Ӟардон» ансамбле.

— Милям университетамы котькуд ар ортче «Эшъяськон выж» фестиваль. Отчы пырисько пӧртэм калыкъёс, нош удмуртъёс шаерамы трос ке но, соос уг адӟисько, — вера Веста  Андреева. — «Зоргур» группамы тодматоз Марий Элысь калыкез удмурт культураен.  26-тӥ оштолэзе  асьмемыз возьматӥм «Мый марла ойлем» («Мон вераськисько пор кылын») акциын, удмурт дӥськутэн потыса, кырӟалом пор такмакъёсты.

Марий Элысь удмуртъёсты огазеяны Веста Андреева кемалась малпаське вал ни. Мылкыдзэ эшшо но лӧпкытӥзы Удмуртиысь егитъёс. Таяз арын толшоре «Шунды» огазеяськонысь егитъёс вуылӥзы Марий Элысь Ӟаны (Карлыган) гуртэ, татын улӥсь калыкез тодматӥзы туала удмурт культураен.

Али дырлы «Зоргуре» мылысь-кыдысь пырисько Марий Элысь Ӟаны гуртысь Наташа Кириллова, Света Филиппова, Женя Романов, Настя Лобанова, Маша Андреева, Татарстанысь Настя Камашева, Киров улосвылысь Маша Баширова.

Егитъёс ӵемысь пумиськыло, кырӟало-экто, Марий Элысь тунсыко адямиосын пумиськыло.

Тыпыр-тапыр Олён

Удмурт Дунне
By Удмурт Дунне Апрель 28, 2016 10:00