Визьдыр — Инмарлэн кузьымез

Удмурт Дунне
By Удмурт Дунне Март 9, 2016 16:19

ОсконшкляевЮжтолэзе кутске Быдӟым визьдыр. Паскалы сӥзем кӧсутёнэз мытомы 14-тӥ мартэ. Со кыстӥськоз 30-тӥ апрелёзь, нош 1-тӥ мае оскись калык пусъёз тужгес сайкыт но шумпоттӥсь черк праздникез — Быдӟымнуналэз.

Дэрие усем пинал

7-тӥ-13-тӥ южтолэзе Вӧйдыр арня луэ. Огшоры калык сое шулдыръяськонэн, тулысэз пумитанэн лыдъя. Нош христиан адямиос тодо, та арня Быдӟым визьдырлы дасяськон луэ шуыса. Та нуналъёсы йӧл, вӧй, пыжиськем сиыны яра, нош сӥль — уг. Ческыт но шулдыр Вӧйдыр луонлык сётэ адямиослы капчи мылкыдын но, ог-огедлэсь прощение курыса, Быдӟым визьдырез мытыны.

Но солэсь азьло ай, 5-тӥ южтолэзе, улонысь кошкем адямиосты буре ваён кӧснунал луэ. Соку вань православной калык тодаз вае но вӧсяське кулэм христианъёс понна. Быдӟым визьдыр азьын эшшо огпол ваньмы прощение курыны кулэ та дуннеысь кошкем ӵыжы-выжыосмылэсь но. Асьмеос туж чаляк вунэтӥськомы югыт дуннеен люкиськем бӧлякъёсмес но асьмелы та улонын ӟеч лэсьтэм муртъёсты. Нош буре вайиськом ке но, мыдлань яке уродэн вераса. Ӵыжы-выжымы кулэ ке, асьмеос солэсь туспуктэмъёссэ, арбериоссэ утиськомы, медам вунэтэ яке сюлэмлы дуно шуыса. Шайгуэз вылэ бадӟым синпелет пуктӥськомы, сяська мерттӥськомы. Кулэ-а со кулэм муртлы?

Малпаське ай, кӧня ке нунал сиськымтэ адямилы тӥ, нянь шорем интые, сяська кузьмаськоды… Мар зэмзэ но кулэ югыт дуннеысь кошкем луллы — сюлмысь верам молитва, куке тӥ Инмар азьын куриськоды, улонысь кошкем ӵыжы-выжыдылэсь, тодмодылэсь, эштылэсь валаса но валатэк, тодыса но тодытэк лэсьтэм сьӧлыкъёссэ мед куштоз шуыса. Пуктэ син азяды таӵе суредэз: пичи пинал дэрие усем но, солэн уг луы аслаз отысь потэмез. Тӥ шуге-леке шедем тэшкылилы кидэс сётоды ук, нылпи султыны мед быгатоз шуыса. Озьы ик кулэм муртъёсын но.

Сьӧлыко но пеймыт интыын курадӟон дыръязы соослэн уг луы ни асьсэлэн мозмытскемзы урод ужъёссылэсь, уг луы ни чылкытатӥськемзы, малы ке шуоно кулэм бере уг луы ни ӧкыныны, ӧпкельыны. Кин соослы юрттыны быгатэ? Асьмеос гинэ, улэпъёс, соослэн лулзы понна вӧсяськыса. Вераны кулэ, кулэм ӵыжы-выжыосмы понна Инмарлы вӧсяськыкумы, Иисус Христос асьмелы бакельзэ сётэ, улонысь кошкем христианъёсты ум вунэтӥське шуыса. Тодамы возёно сое но: кин вӧсяське кулэмъёс понна, со понна но азьланяз вӧсяськисьёс луозы.

Трос пол гожъямы ини, малы кулэ Визьдыр, мар со сётэ адямилы. Кин ке малпа, кӧсутьыны секыт. Нош визян — со Утисьмылэн асьмелы сётэм дуно кузьымез, малы ке шуоно кӧсвозьыса асьмеос чылкытатӥськомы, асьмемыз асьмеос вормыны дышетскиськомы но Святой Духез матамы лэзиськомы. Басьтэ огшоры кагазэз, кӧс дыръяз со капчи, шораз пельтӥмы ке, омырын бергалоз, нош котме ке, секыт луэ но сач усе. Озьы ик асьмелэн лулмы но. Соин ик сое туж зол утёно урод ужъёслэсь-малпанъёслэсь, ялан чылкытатоно. Маин эшшо ӵошатыны луоно визян вакытэз? Ревизиен. Кӧсутьыкуз адями малпаське: мар валтӥсез луэ, нош мар кулэтэм, куштӥське урод сямъёсызлэсь, кулэтэмезлэсь. Визьдыр — зэмос дышетӥсь, малы ке шуоно валэктэ но юрттэ асьмелы алдаськонмес, супыльтонмес, вылтӥяськонмес но мукет шекъёсмес вормыны.

 Нянь колды

13-тӥ южтолэзе, Быдӟым визьдыр кутскон азьын, луэ прощение курон арнянунал. Соку адямиос, черкын вӧсяськыса, тодазы ваё Райысь Адамез уллян учырез. Со ӧй вал пунэмзэ берыктон. Но нырысетӥ адямиос, Инмарлэсь ӟечсэ гинэ адӟем муртъёс, тодӥзы, мар со сыӵе лек луон. Нош урод, йӧнтэм адямиослы Ин Эксэйлыкын инты ӧвӧл. Со учыр бере но Инмысь Атаймы соослы кулонлэсь утиськон сётӥз. Та сярысь вералляз протоиерей Георгий Флоровский: «Мария Нылмуртлэн востэм но кылзӥськись луэмез веслэн мукет палаз пуксиз, Евалэн кылзӥськымтэезлы пумит. Ева нырысьсэ йыруж лэсьтӥз, со пыр адямилэн улоназ кулон вуиз, но чидась но Инмарлэн косон-куронъёсызъя улӥсь Мария адямилы бырисьтэм улон вайиз».

«Одӥгез Инмарлэсь куронзэ пеляз ӧз поны ке, мукетыз Утисьмылэсь кылзӥськиз, озьы Мария Нылмурт дурбасьтӥз Ева понна. Огез нылкышно асьмелы кулон вайиз, но нылкышно ик пумтэм вапумъёсы улон но кузьмаз», — шуэ мукетыз святой Иреней Лионский.

Визьдыръя, черке ӵем ветлэм, исповеде пырам, причастие басьтэм сяна, ӟеч ужъёс лэсьтыны тыршоно.

Визьдыръя, черке ӵем ветлэм, исповеде пырам, причастие басьтэм сяна, ӟеч ужъёс лэсьтыны тыршоно.

Соин ик ноку но вунэтоно но осконэз ыштоно ӧвӧл, Инмар Анай асьмелы юрттэ шуыса. Схиархимандрит Макарий аслэсьтыз учырзэ вералляз. 1943-тӥ арын соослэн атайзы фронтын ожмаськем, анайзы туж, пе, секыт висе вал. Семья сярысь сюлмаськон усем 10 аресъем Макарий вылэ. Огпол воксё няньзы бырем, пыры но кыльымтэ ини. Соку пияш сузэръёсыныз вӧсяськыны кутскиллям Инмар Анайлэн «Скоропослушница» обросэз азьын. Макарий молитва лыдӟе, покчиосыз нылпиос кирос, пе, тыро. 4 аресъем Раиса сузэрез сюлмысьтыз ик курем: «Инмар Анай, сёт милемлы тӧдьы няньдэ». Со ӝытэ пиналъёс сютэм ик изьыны выдӥллям. Нош ӵуказеяз корказь выжыын, ӵушкон вылын, пӧсь нянь колды понэмын, пе, вал. Пиналъёс паймиллям, урамын тол, одӥг пытьы но ӧвӧл, нош ӧс азьын бадӟым тӧдьы нянь колды…

Черк оскытэ, Дун-чылкыт Инмар Анай асьмемыз уз кушты Христослэн Кышкыт Судэз дыръя но. Инмар возьматӥз аслаз дышетскисезлы Иоанн Богословлы, мар луоз, Иисус Христос кыкетӥзэ музъем вылэ лыктыку. Кужмо чилекъям, гудыръям, музъем зуркам но излэсь, йӧлэсь зор усем сяна, инбамын шунды кадь кылдоз Инмар Анай. Со гинэ курадӟись калыкез Пиезлэн зэмлыко лекезлэсь утёз, молитваеныз, шобретэн сямен, бинялтоз ӧпкелись адямиосты.

Ӵапак та толэзе ик, 20-тӥ южтолэзе, асьмеос сӥлы кариськом Инмар Анайлэсь «Споручница грешных» оброссэ.

 Вуж кышет

Визьдыръя, черке ӵем ветлэм, исповеде пырам, причастие басьтэм сяна, ӟеч ужъёс лэсьтыны тыршоно. Юрттыны кулэ сюлмысь. Монах Паисий Святогорец шуиз: «Адями, та дуннеын ӟеч лэсьтыса, вуоно даурын улыны аслыз луонлыкъёс дася».

Одӥг мурт юаз преподобной Амвросий Оптинскийлэсь:

— Баӵко, мар каром, мыным жаль потэ мае ке муртъёслы сётыны!

Святой шуиз:

— Нырысь кутскы сётканы сое, мар аслыд кулэ ӧвӧл, собере жаль уз поты ни люкиськыны соин, мар та дырозь тыныд дуно потэ вал. Вуоз сыӵе нунал, ку тон дась луод ваньзэ сётыны.

Амвросий Оптинский таӵе учырез вераз на: «Одӥг пыдйылчи, кыӵе ке гуртэ вуыса, коркась корка кураськыса ветлӥз. Юаз, кин но маин солы юрттыны быгатоз. Нырысь ик вазиськиз одӥг кышномуртлы. Чурыт сямо нылкышно пиосмурт азе вуж кышетсэ гинэ куштӥз. Нош мукет коркан улӥсь жаляз сое но трос ӟеч дӥськутсэ, сиён-юонзэ сётӥз. Кураськись кошкыса гинэ вуттӥз, та гуртын бадӟым тылпу потӥз. Горд атас пень вылэ кельтӥз уно адямиосты, пӧлазы вал со кык нылкышноос но. Шудтэм учыр сярысь тодэмез бере пиосмурт выльысь вуиз та гуртэ но берыктӥз ваньзэ, мае солы сётӥзы вал. Кин трос юрттӥз, солы трос берыктӥз, нош чурыт кышномуртлы вуж кышетсэ гинэ сётӥз».

2 сюрс ар талэсь азьло апостол Павел шуиз: «Иисус Христос вал но луоз сыӵе ик, кыӵе со вань. Со асьмеды бордаз басьтоз, адямиос ӧпкельыса Инмарлы вазиськизы, востэм но чидась луизы ке. Быдӟымъяськись муртъёслы Со пумитъяське. Адями вӧсяськыкуз но вылтӥяськон сямзэ уг ке вунэты, служба дыръя ассэ мукетъёсызлэсь вылэ пуктэ ке, сыӵе куриськон сьӧлык гинэ вае.

Туспуктӥз А. Горбунов

Удмурт Дунне
By Удмурт Дунне Март 9, 2016 16:19