«Шундыысь» егитъёс вуылӥзы бигер удмуртъёс доры

Удмурт Дунне
By Удмурт Дунне Март 31, 2016 09:45

SONY DSC

«Шунды» огазеяськонлэн тӧроез Ольга Тронина.

Удмуртиысь егитъёс вуылӥзы Татарстанысь Кукмор ёросысь Ошторма Юмья (Улынгурт) гуртэ.  Отын улӥсь удмуртъёсты тодматӥзы туала удмурт культураен.

Кусыпъёсты юнматон

Кукмор ёросын 7 сюрслэсь ятыр удмуртъёс уло, 30 школаос пӧлысь 6-яз дышето удмурт кылэз. Кызьы вера Куйык школалэн директорез Владимир Леонтьевич Михайлов, Кукмор ёросын удмурт школаослэн кусыпъёссы юнэсь, котькуд ужрадэ соос дэмен пырисько.

Та нуналэ школаосысь пиналъёс огдышем сямен урокъёсазы ӧз мынэ, лыктӥзы Ошторма Юмья школае удмурт культуралы сӥзем ужрадэ. Татын тодматскизы «Шунды» огазеяськонлэн проектъёсыныз, удмурт электрон программаосын, Dart газетэн, Богдан Анфиногенов кылбурчилэн творчествоеныз, учкизы «Пузкар» киноез. Пыриськизы журналистикая, дизайнъя, театрын шудонъя, калык эктонъя мастер-классъёсы.

нылпиос

Покчи журналистъёс «Юмьяын куноын» нимо газет лэсьтӥзы.

Покчи журналистъёс «Юмьяын куноын» нимо газет лэсьтӥзы. Кинлэн мар сярысь гожтэмез потэ юанлы соку ик валэктонъёс чузъяськизы. Бигеръёс пӧлын улыса, соос уг тодо, мар со возьдаськон.

— Мон наукаен вырисько, — шуэ 9-тӥ классын дышетскись Коля Германов. — Берло 5 арзэ Юмья палъёсын куазь туж зол воштӥськиз: тол луиз шунытгес, гужем — кезьытгес.

— Нош милям гожтэммы потэ куасэн бызьылӥсьмы Роман Акашкин сярысь, — верало 10-тӥ классын дышетскисьёс Вероника Степанова но Даша Раимова. — Школаямы мукет пиналъёс но, солэсь адӟем карыса, спорт борды кыстӥсько. Туннэ со ӵошатсконъёсын Вятские Поляныын.

Спорт сярысь материалъёс газетын трос луизы. Волейболэн эшъяськемез сярысь гожтӥз Куйык школаысь Таня Петрова, Ош-Юмья школаязы спортлэн азинскемез сярысь — Кирилл Михайлов. Лия Глухова «Шундыкарын» ортчытэм нуналъёссэ тодаз вайиз. Сутэрпочинкаысь Альбина Якимова зарисовказэ сӥзиз удмурт кылъя дышетӥсезлы, кылбурчилы Микаль Михайловлы.

SONY DSC

Ош-Юмья школалэн директорез — Семенов Виталий Геннадьевич.

Газет поттэмын, мукет мастер-классъёсын дышетэмын удмурт эктонъёс, тодматскемын дизайнлэн, сценалэн куронъёсынызы… Но мар азьланяз?

— Ӵемысь таӵе ужрадъёслэн пайдазы туж ӧжыт: пумиськимы, вераськимы, люкиськимы, — вера Нӧръя школаысь дышетӥсь Владимир Жуков. —  Умой луысал, нылпиосын кусып возён азьланьтӥськысалыз ке. Со понна малпано дорысь ужъёс. Шуом, толэзьлы быдэ нылпиос лэзё гожъямъёссэс Dart газетэ, эктӥсьёс — концертъёсысьтызы видеоос. Озьы соос дышетскозы басьтэм тодон-валанъёссэс улонын кутыны.

Вордӥськем нуналлы кузьым

Ӝытсэ ортчиз концерт. Залын пуксён инты ӧй вал!

— Таӵезэ нырысьсэ адӟисько, — вера дышетӥсь М. Танасева. — Берло дыре калык гуртаз пукыны яратэ, концертъёсы но ужрадъёсы шер пота.

— Быгато ке, быгато ни та егитъёс! — ӟырдыт кичабонъёс пыр чузъяське залысь.

Сцена вылын ог-огзэсты вошъяло Анна Образцова, Богдан Анфиногенов, Надя Рысаева, Мария Бочкарева. Нырысьсэ та палъёс адӟизы калык кырӟанъёсты быдэсъясь Dukes, рокез кырӟась Pease Pu группаосты. Асьсэ рок-кырӟанъёсыныз калыкез тодматӥз  Сутэрпочинкаысь Микаль Михайлов но.  Ассэ со Огназ кион нима, кылем арын поттӥз «Мон одӥг пол уг сайка улыны» кылбур бичетсэ.

Концерт бере калык дораз бертыны ӧз дырты — кылиз удмурт эктонъёсты дышетыны. Нуназе мастер-классэ нылъёс-пиос юрттӥськизы «Эктон корка»  студиысь эктӥсьёслы Таня Тихоновалы но Лилия Леонтьевалы.

SONY DSC

Историен дышетӥсь В. Рамазанов пиналъёслы экскурсия ортчытэ.

Нош кызьы уй позыръяськонтэк? Егитъёс пӧлын эктӥзы арлыдоос но, яке арлыдоос пӧлын егитъёс-а…

— Кыӵе усто нунал ортчытӥды, учке ай тани, егитъёс но кӧня потӥллям, — шутэтскыны кыре потӥз Елена Игнатьева. — Егит калык туала вакытэ оломар каре, клубе но уг пота ни. Ми, арлыдоос, ӵемгес, дыр, эктыны потаськом, клубын 1980-тӥ-1990-тӥ аръёслы сӥзем дискотека ортчытъяськом.

Мукет нуналаз Удмуртиысь егитъёслэн автобуссы ширтӥз Куйык гуртэ. Ӵыж-выль клуб пырон дорын «Гажаса ӧтиськом» гожтэм сюлэмез шунтэ. Калык кырӟанъёссэ быдэстӥз Dukes группа, аспал гуръёссэ лэзиз «Зангари» ансамбль. Таос ог-огзылы кырӟанъёссэс асьсэлы кельтӥзы. «Юмшан» эктонзэс (маин ке но «Апай эктонлы» укша) бергазы «Бубылиос» ансамбльысь покчиос.

— Туэ сӥзьыл милям выльдэм школамы усьтӥськоз, — вераз Куйык школалэн директорез Владимир Михайлов. — Ӧтиськом тӥледыз таӵе ик ужрадэн ми доры но!

Мария Векшина

Удмурт Дунне
By Удмурт Дунне Март 31, 2016 09:45