Югдурез тупатоз уждун?

Удмурт Дунне
By Удмурт Дунне Февраль 24, 2016 15:13
0000349

Дышетонъя но наукая министр Алексей Мирошниченко верамъя, туннэ удмурт кылъя дышетӥсе вакансиос ӧвӧл.

Анай кылэз но дышетонэз азинтонъя секция ог 70 адямиез огазеяз.

Кун Думаысь депутат Виктор Шудегов верамъя, берло 20 ар чоже Россиын 25 сюрс школаос пытсаськизы, 19,5 сюрс гуртъёс быризы. Та ик луэ выжы калыкъёслэн кулэсмемзылэн огез мугез. Школаосты утён сярысь сюлмаськоно. Школа луиз ке, удмурт кылын дышетӥсьёслы но уж шедёз.

Дышетонъя но наукая министр Алексей Мирошниченко верамъя, туннэ удмурт кылъя дышетӥсе вакансиос ӧвӧл. Но дасо ар ортчыса, дышетӥсьёс кошкозы пенсие. Соос интые лыктӥсь сюроз-а? Оло, пӧртэм специальностьёсты огазеяны дыр вуэмын? Кылсярысь, удмурт но англи кыллы дышетӥсьёсты поттыны ӧдъямы. Удмурт кылъя дышетӥсь мукет предметъёсты — информатикаез, физкультураез — но нуыны быгатысал, вылды, тодон-валанъёсыз луысалзы ке. Та паймымон кылӥське, дыр, но ужпум вырӟоз кадь потэ, шуэ А. Мирошниченко.

Дэри ёросысь Якшур гурт поселениен кивалтӥсь Николай Мерзляков аслэсьтыз адӟонзэ шараяз:

— Берло 6-7 ар ӵоже ни гуртъёс шӧдскымон ӟучомо. Нылпи садэ пиналъёсмы, удмурт кылын бӧтьыртыса, лыкто, нош отысь ӟуч луыса пото. Озьы медаз луы шуыса, специалистъёсты уже мед кутозы конкурс амалэн, санэ мед басьтозы удмурт кылэз тодэмзэс. Анай кылэз нылпи садын нуисьёслы уждунзы борды ватсаса 15 процент тыриськоз шуыса вераськон мынэ. Но тазьы гинэ дышетӥсьёсты но воспитательёсты уд кыскы. Со понна директоръёслэсь кылзэс юано. Удмурт кылъя урокъёс ӧвӧл ке, уждунзэс кулэстоно. Соку кивалтӥсь ачиз дышетӥсь утчаны кутскоз. Нош вузъёсы удмурт кылэз дышетыны пыремъёслы бадӟыматыса стипендия тыроно, гуртэ вуэмзы бере подъёмной сётоно.

Ӵектонъёсты санэ басьтом, шуиз Алексей Мирошниченко. Но тужгес паймымонэз: таӵе пӧсекъянъёстэк но Татарстанысь Кукмор ёросысь Нӧръя школаын огдыре дышетыны быгато удмурт, бигер но ӟуч кылъёсты.

— Татарстанын 2 кун кыл луэм дырысен урокъёсы бигер кылэз пыртоно луиз, — вера Нӧръя школаысь дышетӥсь Владимир Жуков. — Али бигерзэ 2 час, удмуртсэ 3 час арняяз дышетӥськом вань классъёсын. Удмурт кылэз ум дышетэ шуись ӧй вал на. Соиз но вань: удмуртэзлэсь куштӥськимы ке, со интые эшшо 3 час бигерез дышетоно луомы.

Но дышетӥсьёслы сяна, удмурт кыл воксё мукет удысын бергасьёслы но кулэ ук. Кылсярысь, врачъёслы. Москваын удмурт курсъёсты нуись удмурт нылаш Ольга Урасинова шуэ: удмурт кылэз дышетонъя курсъёс Удмуртиын радъясько. Но соос 3 толэзь кыстӥсько. Та дыр ӵоже мае гинэ дышетыса вуттозы адямиос? Соин ик Интернетын кылдытоно онлайн курсъёс. Та югдурез тупатыны юрттысал.

Елена Сараматова

 

 

Удмурт Дунне
By Удмурт Дунне Февраль 24, 2016 15:13