Ужмы пайдаё мед луоз!

Удмурт Дунне
By Удмурт Дунне Февраль 12, 2016 09:20
WtBs79rQNJE

Ӧтчам кутскиз «Удмурт Кенешлэсь» гимнзэ быдэстон бордысен.

«Удмурт Кенеш» огазеяськонлэн 13-тӥ ӧтчамез 11-тӥ феврале усьтӥськиз Удмурт театрын. Шаерысьтымы но Россилэн пӧртэм сэрегъёсысьтыз вуэмын 41 делегация — 378 делегат.

Ӧтчаме пыриськизы Удмуртилэн Тӧроез А. Соловьев, Кун Кенешлэн Тӧроез В. Невоструев, Россиысь Кун Думаысь депутатъёс Н. Мусалимов но В. Шудегов, Федерация Кенешлэн ёзчиез А. Волков, Фин-угор калыкъёслэн Консультативной комитетсылэн кивалтӥсез В. Марков но мукет бадњым куноос.

— Вань сюлмысьтым ӟечкыласько тӥледыз та бадӟым нуналэн, — калыклы вазиськиз Удмуртилэн Тќроез А. Соловьев. — Вань удмуртъёслэн «Удмурт Кенеш» огазеяськонзы быдэс фин-угор дуннеын луэ тужгес даноез но бадӟымез. Со ӟеч уж лэсьтэ удмурт калык понна: азинтэ удмурт культураез, кылэз, уте калыклэсь сям-йылолъёссэ, будэтэ азьветлӥсь егитъёсты. Элькунмылэн кивалтэтэз но палэнэ уг кыльы. Кылем арын Москваын ортчытэмын Удмуртилы сӥзем ужрадъёс. Туэ но Москваын Гербер ортчоз. Али ми кун кылъёсъя законэ воштонъёс пыртон бордын ужаськом.

Кун Кенешлэн Тӧроез В. Невоструев но удмурт калыклы тау карон кылъёссэ вераз:

— Туэ «Удмурт Кенеш» огазеяськонлы 25 ар тырме, та огазеяськон тыршемен, вордӥсько выль проектъёс, шаерамы но солэн палэназ радъясько удмурт культуралы сӥзем нуналъёс, мукет бадӟым ужрадъёс. Берлоосыз пӧлысь пусйысал «Удмурт-а мон?!» форумез. Кун Кенешысь депутатъёс котьку син азязы возё удмурт культуралэсь азинскемзэ. Кивалтонын удмуртъёс ӧжыт шуыса весь вераськом, со бордын чырмытгес асьмелы ик, удмуртъёслы, ужано. Матысь дыре вань кивалтон ёзъёсы быръёнъёс ортчозы. Отчы удмуртъёс мыло-кыдогес мед пыриськысалзы.

«Удмурт Кенешлэн» кылем съезд дырысен туннэ нуналозь ужамезлы йылпумъянъёс лэсьтӥз огазеяськонлэн тӧроез И. Семёнов. Та дыр ӵоже трос лэсьтэмын культура удысын, чырмыт ужамын семьяосын но удмурт егитъёсын. Но тырмымтэос но вань. Кылсярысь, ёрос администрациосын но муниципал кивалтэтъёсын кусып возёно, удмурт культураез, кылэз азинтонъя нимысьтыз программаос лэсьтоно.

Нуназе бере вань делегатъёс мынӥзы «Берёзка» лагере. Отын соос чырмыт ужазы пӧртэм секциосын, сэрттӥзы удмурт культураен, семьяен, этнополитикаен герӟаськем лэчыт ужпумъёсты.

Туннэ, 12-тӥ феврале, быръемын луозы «Удмурт Кенеш» огазеяськонлэн тӧроез, секциосын ужамлы йылпумъян лэсьтӥськоз. Ӧтчаме вуэмъёс пумиськозы Удмуртилэн Тӧроеныз А. Соловьевен.

Мария Векшина

Туспуктӥз А. Горбунов

 

 

Удмурт Дунне
By Удмурт Дунне Февраль 12, 2016 09:20