«Удмурт кенеш» сьӧрын — удмурт калык

Удмурт Дунне
By Удмурт Дунне Февраль 10, 2016 13:28

 

020613_011474467250

Пётр Тултаев.

Россиысь фин-угор калыкъёслэн ассоциациенызы кивалтыны мыным оскизы ини кыкетӥ ползэ — озьы фин-угор движениын бергасько ни 7 арлэсь ятыр. Но удмурт калыкен кусыпъёсы кылдӥзы ни кемалась: ай студент вакытам, ог 30 ар талэсь азьло.

Мордовиысь Н. Огарёв нимо университетын тодон-валан люкакум, уно пӧртэм ужрадъёсы пыриськылӥмы бускель Удмуртиысь удмурт студентъёсын ӵош. Сарансклэн мэрез луыса тыршыкум но, бадӟым саклык висъяны тыршылӥ Россиын улӥсь фин-угор калыкъёслэн ужпумъёссылы, бӧрысь соослэн ассоциациенызы (АФУН) кивалтыны оскизы. Малы мон веранме та бордысен кутски? Удмурт калык борды мон егитысен бурмемын, туж ӟеч тодӥсько солэсь сямъёссэ, мылкыдъёссэ, малпанъёссэ.

Тазьы шуысал: Россиысь огъя фин-угор движениын «Удмурт Кенеш» огазеяськонлэн куараез туж кужмо. АФУН-лэн кичӧлтэмезъя ортчо пӧртэм ужрадъёс, отчы мыло-кыдо пыриське удмуртъёслэн валтӥсь огазеяськонзы. Тужгес но пус-йысал президентсэ Игорь Семёновез, вице-президентсэ Татьяна Ишматоваез, азьвыл кивалтӥсьсэ Николай Мусалимовез, исполкомезлэсь ёзчизэ Сергей Касаткинэз.

Удмуртъёс нырысь ваньзэ рос-прос кылзозы, валаны тыршозы, собере гинэ мылкыдзэс шараялозы. Меӵак, шонер, валамон но чеберъяськытэк. Удмуртъёсты востэмесь шуиськомы, но со бордысь потэ рос-прос малпаськыны быгатон, ужез валаса радъян.

Асьмеос, Россиысь фин-угор калыкъёс, кунгож сьӧрысь фин-угоръёсын ӵошатыса, золгес утьыны быгатӥмы вашкалаосмылэсь сям-йылолъёссэс. Басьтомы калык дӥсьмес, кырӟан-веранъёсмес, сям-йылолъёсмес: финъёс я венгеръёс таӵе шыкысэнызы ушъяськыны уз пӧрмытэ. Соин ик асьмеос ваньмы ӵош утьыны кулэ выжыосмылэсь узырлыксэс. Ӵапак та ласянь бадӟым уж нуэ «Удмурт Кенеш» огазеяськон. Азьланяз но сӥзисько: калыктэс тазьы ик кылыны но кылзыны быгатэ! Солэсь мылкыдъёссэ улонэ пыӵатыны тырше. Эн вунэтэ: «Удмурт Кенеш» сьӧрын сылэ удмурт калык.

Пётр Тултаев,

Россиысь фин-угор калыкъёслэн

ассоциациенызы кивалтӥсь

Удмурт Дунне
By Удмурт Дунне Февраль 10, 2016 13:28