«Удмурт Кенеш» огазеяськонлэн азьланез — егитъёс киын!

Удмурт Дунне
By Удмурт Дунне Февраль 10, 2016 10:15
098345,удмурткенеш

Т. Ишматова

«Удмурт Кенеш» огазеяськонлэн тӧроез Игорь Семёнов ачиз интые дэмла вице-президентэз Татьяна Ишматоваез. Та пумысен калык пӧлын трос вераськонъёс пуромизы.

Одӥгъёсыз шуо, Татьяна Витальевна егит, соин ик таӵе пукон вылэ пуксьыны солы вазь на. Игорь Семёнов таӵе мылкыдъёсты уретэ — Т. Ишматовалэн тыбыр сьӧраз трос вормонъёсыз ни. Алигес со ортчытӥз егитъёслы «Удмурт-а мон?!» форум, уно ужпумъёс быдэстэмын, «Шунды» огазеяськонын тыршыкуз. Мукетъёсыз шуо: Татьяна Витальевна ужа Йӧскалык политикая министерствоын. Мерлыко огазеяськонэз, пе, валтыны уг быгаты кивалтон ёзъёсысь адямиос. Но та сярысь катъёсын номыр верамын ӧвӧл.

— Мон валасько калыклэсь мылкыдъёссэс, — вера Татьяна Витальевна. — И. Семёнов быръёнъёсы уг пыриськы ни шуыса, шуак вераз. Мон уг ӧдъяськы гижысь-пиньысь ожмаськыны, калыклы пумит мыныны. Бырйизы ке — озьыен, оско. Ваньзэ куашкатыны капчи, соин ик мон азьын али сылэ ужпум: утьыны сое, мар та дырлы лэсьтэмын но вамыштыны азьлане. Кулэ кылдытыны тыро-пыдо ужась исполком. Валамон, оген адями ваньзэ  уз вормы, нош ӵошен кариськыса, милям ваньмыз пӧрмоз.

Татьяна Ишматова шуэ, егитъёс дышетскыны кулэ арлыдоослэсь, гажаны дано «кенешчиосты», утьыны сям-йылолъёсты. Огазеяськонлэн азьланез — егитъёс киын.

«Удмурт Кенеш»  огазеяськонлэсь тӧрозэ быръён ортчоз 12-тӥ тулыспалэ, бадӟым ӧтчам дыръя.

Мария Векшина

Туспуктӥз udmfoto.ru

 

 

 

Удмурт Дунне
By Удмурт Дунне Февраль 10, 2016 10:15