«Удмурт Кенеш» — эш!

Удмурт Дунне
By Удмурт Дунне Февраль 24, 2016 09:16

«Удмурт Кенеш» — эш!

Кылем арня вискын 2 нунал ӵоже радъяськиз вань удмуртъёслэн 13-тӥ ӧтчамзы. Кыӵе мылкыдъёс со кельтӥз?

  Яркыт кутскон

6-19

Т. Ишматова но А. Соловьев ӧтчам пумысен мылкыдъёссэс верало.

Съезд кутскон азьын ик шӧдӥськиз: кивалтӥсьёс но, калык движение пыриськисьёс но ӧтчамлы бадӟым саклык висъяло. Съездэ лыктӥзы республикамылэн кивалтӥсьёсыз, «Удмурт Кенеш» огазеяськонэз пӧртэм аръёсы валтэм адямиос, вань мукет удмурт калык огазеяськонъёслэн азьветлӥсьёссы, министръёс.

Туннэ нуналлы «Удмурт Кенеш» зэмзэ но бадӟым но трос ужъёсты бералтыны быгатӥсь огазеяськонлы пӧрмиз. Шаерамы гинэ ӧвӧл, быдэс фин-угор дуннеын. Асьсэос удмуртъёс сое одӥг-ог пыкыло ке но, малпаське ай: таӵе огазеяськонэз удмурт калыклэн воксё ӧй луысал ке? Ӝутысалзы-а соку пӧртэм министерствоос но ведомствоос анай кылэн, удмурт культураен, этнополитикаен, дышетонэн герӟаськем ужпумъёсты? Быгатысалзы-а нимаз-нимаз удмуртъёс асьсэ сюлмаськонъёссы сярысь ваньмызлы кылымон вераны?

«Удмурт Кенешлэн» бурд улаз ужало ваньзы сямен удмурт калык огазеяськонъёс, огъя  кужымен соос бадӟым уж лэсьто: удмурт фестивальёс, котрес ӝӧк сьӧрын пумиськонъёс, дышетон, культура, егитъёсын ужан удысъёсын проектъёс но трос мукетыз. Но шугъяськонъёстэк уг луы. Съездын асьсэ мылкыдзэс веразы тодосчи Альберт Разин, «Удмурт Кенешлэн» Дэри ёросысь ёзэныз кивалтӥсь Лидия Биянова, «Шунды» огазеяськонлэн кивалтӥсез Ольга Тронина но мукетъёс. Асьсэ удысъёссыя туала югдурен тодматӥзы нациосын ужан политикая министр Лариса Буранова, культурая министр Владимир Соловьёв но дышетонъя но наукая министрлэн воштӥсез Игорь Белозёров. Та докладъёс азьланяз секциосын ужанлы аспӧртэм инъет луизы. Нялтас вераса, ӵапак секциосын тужгес бугырес вал: котькуд делегат аслэсьтыз мылкыдзэ, дэмланзэ вераны быгатӥз.

 Малы ӟучомо Широбоковъёс?  

Съездлэн кыкетӥ нуналаз ӵукна ик шӧдӥськиз:  ӟырдыт луоз. Угось «Удмурт Кенеш» огазеяськонлы выль тӧро быръёно. Но солэсь азьвыл ай ёросъёсысь делегатъёс асьсэлэсь сюлмаськонъёссэс, шумпотонъёссэс шараязы. Тани «Удмурт Кенешлэн» Ува ёросысь ёзэныз кивалтӥсь Геннадий Сидоров данъяське: шаерамы кибашлыослэн юртъёссы кылдэмен, удмурт калыклэсь киужъёссэ, культуразэ паськытгес вӧлмытыны луэ.

0000078

«Удмурт Кенешлэн» бурд улаз ужало ваньзы сямен удмурт калык огазеяськонъёс.

Шаркан ёросысь Быгы гуртысь культурая центрен кивалтӥсь Жанна Ермолаева но вормонъёссэс пусйиз: Быгы гурт лулчеберетъя фин-угор шоркар вал, татын удмурт пӧраськемъёслы сӥзем «Быг-быг» фестивальёс ортчо, нош Шарканысь Тол Бабай доры быдэс дуннеысь туристъёс вуыло…

Можга ёросысь дышетӥсь Олег Чувашов ушъяськыны ӧз дырты. Со нош ик тодэ вайытӥз тужгес вӧсь интымес — анай кылэз дышетон.  Кыл — со инвестиция. Можга ёросэз гинэ но басьтоно ке, тужгес кужмо хозяйствоос — кылзэс, сям-йылолъёссэс утьыны быгатӥсьёсыз.

—  Франциысь тодосчи Ж.-Люк Моро, Ашальчи Окимылэсь кылбуръёссэ мургес валамез потыса, удмурт кылэз дышетыны кутске, — шуэ Чувашов. — Италиысь, Германиысь студентъёс, асьме доры лыктыса, удмурт кылмес дышето, огшоры поляк студент Пётр Палган удмурт кылын фильмъёс лэсьтэ, 15 ар талэсь азьло Парижын 10 адями удмурт кылэз дышетэ ни вал!  Нош Глазовысь кыӵе ке Широбоков но Корепанов анай кылзэс кемалась вунэтӥзы ни, вылды…

Олег Чувашов бӧрсьы трибуна сьӧры потӥз ӵапак Глазов пединститутысь дышетӥсь Ольга Никифорова. Со пусйиз, али ёросазы 16 школаын удмурт кылэз дышето ке но, оглом кыл бырон калэ вуэмын. Угось, шуом, 5-тӥ-6-тӥ классъёсын арняяз 1 час ӵоже гинэ удмурт кылэз дышето, нош англизэ — 3 час. Ольга Петровналэн малпамезъя, югдурез тупатыны юрттысал Глазовын удмурт гимназия усьтон. Со понна, пе, инъет но вань ини.

Удмурт шаерысь уйпал удмуртъёс гимназия сярысь малпасько гинэ ай, нош Башкириысь удмуртъёслэн со туэ усьтӥське ни. Та сярысь данъяськыса съездын вераз Башкортостанысь дышетӥсь Татьяна Шайбакова.

— Башкириын али 22 школаын но 21 филиалъёсазы удмурт кылэз дышето, — пусйиз Татьяна Николаевна. — Удмурт кылзэс ватӥсь, анай кылынызы вераськыны быгатӥсьтэм удмуртъёсты Башкириысь туж шер пумиталод…

 Выль тӧро но выль инвисъёс

0000091

Удмуртилэн Тӧроез Александр Соловьев: Татьяна Ишматовалэн общественной огазеяськонъёсын но, кивалтон ёзъёсын но ужан опытэз бадӟым.

Огъя докладъёс бӧрсьы съездын секциослэн ужамзылы йылпумъянъёс лэсьтэмын вал. Ваньмыз ӝот-ӝот, мултэс нуйтытэк. Вань дэмланъёс пыризы ӧтчамлэн резолюцияз. Табере кылиз тужгес сюлмаськытӥсез — тӧро быръён. Та интые ӵектэмын «Удмурт Кенешлэн» вице-президентэз Татьяна Ишматова.

— Мон валасько: оген номыр уд кары. Тужгес но бадӟым сюлмаськонэ: валче, одӥг командаен ужаны быгатон. Нокинэ ултӥятэк, вӧсь карытэк, азьлань мынэм потэ, — пусйиз Татьяна Витальевна.

«Удмурт Кенешен» кивал-тӥсе ассэ ӵектӥз на Дэри ёросысь Хохряки миниципал кылдытэтлэн йырыз Николай Суворов. Но тросэз, 317 адями, куаразэ сётӥз Т. Ишматова понна. Н. Суворов понна дурбасьтӥз 3 адями. Озьы «Удмурт Кенешлы» выль кивалтӥсь быръемын вал.

— Озьы пӧрмиз ни, «Удмурт Кенешлэн» городъёсысь но ёросъёсысь ёзъёсыныз кивалтӥсьёс пӧлын 4 гинэ воргорон, удмуртлык нылкышноос киын, — лад-лад вераз ас вакытаз «Удмурт  Кенешен» кивалтэм Валентин Тубылов. — Мон туж гажасько Татьяна Ишматоваез но шумпотӥсько сое юнматэмды понна. Одӥгзэ вераме потэ: огъя ужмес валаса лэсьтоно. Вал вакытъёс: «Удмурт Кенешлэсь» ужзэ ӧз валаллялэ, кинлы кулэ со, шуылӥзы. Али республикамылэн кивалтӥсьёсыз милемыз валало. Соин, малпасько, ужаны секыт уз луы.

Выль кивалтӥсез ӟечкыласа, Удмуртилэн Тӧроез Александр Соловьев пусйиз:

— Татьяна Ишматовалэн общественной огазеяськонъёсын но, кивалтон ёзъёсын но ужан опытэз бадӟым. Огинтыяз сылӥсьтэм, пӧртэм выль малпанъёс ӵектыны быгатӥсь, сётэм кылзэ быдэстӥсь. «Удмурт Кенешын» со ужаз 7 ар ӵоже. Вань сюлмаськонъёссэ тодэ. Вала, мар кароно удмурт калыклэсь лулпуш узырлыксэ утён понна.

Одӥг кыткетын

Кыӵе мылкыдын «Удмурт Кенешлэн» выль кивалтӥсез басьтӥське уж борды?

— Та нуналъёсы мыным трос ӟеч кылъёс верало. Туж потэ со осконъёссэс улонэ пыӵатэме. Но, валасько, секыт луоз, — шуэ Татьяна Ишматова. — Нырысь ик кылдытоно юн команда. Со одӥг кыткетын мед ужалоз. Та бордысь ик потоз ни, азьлань вамышъялом-а, отчы-татчы кыстаськыса улом-а.

Кыкетӥез, «Удмурт Кенеш» котырын пӧртэм удысъёсысь адямиос луыны кулэ. Ёросъёсын, каръёсын ужез золгес бугыртоно, со понна пумиськонъёс ортчытъяно интыосысь правлениосын, ёрос йыръёсын ӵош. Али тросэз ёрос но кар кивалтӥсьёс  малпало, «Удмурт Кенеш» удмурт  культураен гинэ выре шуыса. Возьматоно: со озьы ӧвӧл.

Егитъёстэк азьлань уд мыны. Соин ик тросгес егитъёсты бордамы кыскомы. Но со сяна, туж потэ «Удмурт Кенеш» бордын совет старейшин выллем кылдытэме. Удмурт движениысь мӧйы эшъёсмы визь-кенешен юрттыны быгато ук. Ваньмы ӵош, огъя кужымен ужаны мед пӧрмытом.

Елена Миннигараева

 

 

 

 

 

Удмурт Дунне
By Удмурт Дунне Февраль 24, 2016 09:16