Спорт кужмо каре

Удмурт Дунне
By Удмурт Дунне Февраль 16, 2016 12:59
А. Самсонов колледжысь нылъёсты шахматной турнире дасяз.

А. Самсонов колледжысь нылъёсты шахматной турнире дасяз.

Алексей Самсонов элькунысьтымы культурая колледжын физкультура урокъёсты нуэ. Пичи дырысеныз спортэн эшъяське, УдГУ-ысь физкультурая но спортъя бакалавриатэз йылпумъяз. Лякыт сямо, востэм, зӥбыт пиосмурт 9-тӥ арзэ пиналъёслы спортэз яратон мылкыд пыӵатэ.

 — Алексей Юрьевич, малы тӥ бырйиды дышетон удысэз?

— Тодӥсько на: Алнаш ёросысь байтэрек школаысь 5-тӥ классэ выжыса, школаысь мастерское лыктӥ. Синмаськи технологияя дышетӥсьмылы, кибашлылы Валерий Алексеевич Казаковлы! Кыӵе гинэ киужъёсын ӧм выре ми! Шор классъёсын дышетскыкум, ветлыны кутски волейболъя секцие, соин кивалтӥз Анатолий Анатольевич Волков. Ӝӧк выл теннисэн шудыны дышетӥз Виктор Трофимович Шахтин, куасэн бызьылыны — Сергей Геннадьевич Шулаков. Соос ик мыным пыӵатӥзы дышетӥсьлэсь ужзэ яратон мылкыд.

Та удысъёсъя мон пӧртэм ӵошатсконъёсы пыриськылӥ. Бадӟым классъёсын кылдытӥм асьмелэсь волейбол командамес: Алексей Пестов, Миша но Иван Шахтинъёс, Руслан Векшин, Андрей Красильников, Миша Лобанов, Коля но Андрей Даниловъёс но мукетъёсыз. Кӧня вормонъёсмы вал!

Удмурт кун университетын дышетски технологияя но физкультурая дышетӥсьлы. Труд но физкультура ог-огзылы туж матын луо.

— Дышетӥсьлэн ужез секыт. Уд жаляське-а, улондэс та удысэн герӟады шуыса?

— Ма, кызьы жалялод? Удысме сюлэмыя бырйи. Ужед нырысь ик аслыд шумпотон вайыны кулэ. Алнаш ёросысь Байтэрек школаям но Ижкарысь Октябрь ёросысь нылпи творчествоя юртын ужам аръёсты шумпотыса тодам вайисько. Егит адями вӧзын валась, юрттӥсь, визь-кенеш сётӥсь адямиос вань ке, профессие сюрес лёгыны капчи.

Мон яратӥсько улонэз. Пӧртэм пумо адямиосын пумиськылӥсько, гажасько шулдыр мылкыдооссэ — соосын каньыл вераськыны. Шедьыло ваньзэ пожаса куштӥсьёсыз но. Кельше спортэн эшъяськись студентъёсын вырыны — соос котьку егитэсь но чебересь.

Котькуд дышетӥсьлэн данъяськонэз — дышетэм пиналъёсыз.

— Пиналъёсы элькун ӵошатсконъёсы ӵемысь пыриськыло — котьку вормисьёс пӧлын луо. Туэ ортчем спартакиадаын 10 ӧръёсъя быгатэмзэс возьматӥзы, огъя командамы элькунын 2-тӥ луиз. Нылпиос куасэн, пыдын бызьылӥзы, ӝӧк выл теннисэн, футболэн, волейболэн, баскетболэн шудӥзы.

Ижысь культурая колледже вуо гуртысь пиналъёс. Валамон, соос пӧлын ӧвӧл дась спортсменъёс, но Алнаш, Шаркан ёросъёсысь пиналъёс спортын кужмо луо. Культура но спорт валче улыны кулэ. Колледжын пӧртэм секциос ужало: волейболэн, шашкиен, теннисэн шудон. Пиналъёслэн ваньмон дырзы пайдаё мед ортчоз. Тросэз ӝӧк выл теннисэ гожтӥсько. Вормонъёссы но вань. Валля арын нылъёслэн командазы элькун ӵошатсконъёсын 1-тӥ инты басьтӥз. Уноез студентъёс волейболэн мыло-кыдо шудо. Кылем арын элькун ӵошатсконъёсын 1-тӥ инты утӥзы.

Колледжамы но пӧртэм ӵошатсконъёс ортчытъясько. Соослы луыса егитъёс спортэз яратыны кутско.

Котькуд пиналлэсь маке умойзэ шедьтӥськод. Соиз урод, таиз умой шуыса, люконо ӧвӧл. Студентъёслы быгатэмея котьку юрттыны тыршисько. Нылпи дышетӥсьлэсь осконзэ шӧдэ ке, со ӟечгес но, визьмогес но, умойгес но луыны тырше. Пиналъёслы улонын шонер сюрес кузя мыныны юрттон — со дышетӥсьлэн одӥгез валтӥсь ужез.

Спортэн эшъяськись нылъёс но пиос чебересь, кужмоесь луо, тазалыксы юнма!

Мария Дмитриева

 

 

Удмурт Дунне
By Удмурт Дунне Февраль 16, 2016 12:59