Слонэз миськи!

Удмурт Дунне
By Удмурт Дунне Февраль 16, 2016 12:44

Dart газетлэн кылем номераз гожтӥм вал, Ижысь Андрей Исаев «Бадӟым тур» проект малпаз шуыса.

Андрей Исаев усьтӥз аслэсьтыз сайтсэ — isaevtravel.ru. Отчы со гожъя нуналъёсыз сярысь. Андрейлэн видеоосыз но туспуктэмъёсыз пыр адямиос адӟо, кызьы улэ Индиын калык, кызьы соос шудо крикетэн, кызьы пыласько слонъёс. Ачиз Андрей шуэ, сайтаз улонэзлэсь 5-10 процентсэ гинэ гожтэ. Интернет Индиын туж дуно, нош Wi-Fi-ез шедьтыны шуг.

img_1199

Удмуртиысь пиос машиназэс вешаса мисько, нош индусъёс — слонзэс.

 Индия

Гавартхана кар

Ӵукна мынӥм храме. Пырон понна 30 рупий сётоно. Храмлы уксё бичасьёс 5 пол дорам лыктылӥзы. Парикрама ортчытон (вӧсяськон арбери котыртӥ берган) интыын  адямиос пол вылын  чурен пуко но киосын сисько. Маймылъёсты татчы пырыны уг лэзё, соос кечат-вамат борддор сьӧрын, сиён возьмаса, пуко. Мынӥм храме, татын уен-нуналэн кырӟало дугдылытэк. Индусъёс но ярато селфи лэсьтыны. Монэ нуналаз олокӧня пол ёртыло.

Вриндаван кар

Монэ чортӥзы зэмос хинди сюанэ, мон экто индусъёсын. Мылкыды пачылаз, татысь адямиосын вераськыса. Соос сюлмоесь, капчи мылкыдоесь, улонлы шумпотӥсесь. Быдэс семья, кензы, солэн сузэръёсыз, анай-атайёсыз монэ ӧтизы ресторанэ. Нош кошкыкум бадӟым куноез кадь келязы. Мынам синкылиосы ик потӥзы.

Шри-Ланка

Канди кар

Усьтӥ картаез. Мыным кулэ вал нюлэс. Бырйи буддийской храм сьӧрысь интыез. Гурезь йылэ тубыкум, пумитай нылпиен кышномуртэз. Кытчы мынӥськод шуыса, юаз. Мон верай: нюлэскы палаткаын изьыны. Соку котырам трос адямиос люкаськизы: пиналъёс, бадӟымъёс. Соос мыным дэмлазы душе ветлыны, сиськыны. Мон, кулэ ӧвӧл, шуи. Соос ик мыным возьматӥзы умой интыез. Мукет интыосын, пе, кышкытгес. Озьы ке но татын но кырпарсьёс бызьыло, кыйёс нюжтӥсько. Изён азьын мон доры ветлӥз одӥг адями, возьматӥз пӧйшурась пуныоссэ. Изьыкум монэ нокин ӧз иса. Али котырме бичало но мыно Буддалэн пиньыз нимаськись храме.

Хабарана кар

Мон али Хабарана городын. Тодӥсько вал: татын слонъёсын пумисько. Но ӧй оскы, сыӵе матын адӟо шуыса. Мон палаткаме пуктӥ ты дуре, татысен слонъёс дорозь 10 метр — пыласько.

Андрей Исаевлэн ветлэмез сярысь ми азьланяз но гожъялом. Вуоно номерын лыдӟе соин интервью.

Мария Векшина

 

 

Удмурт Дунне
By Удмурт Дунне Февраль 16, 2016 12:44