Съезд дыръя кылдэм малпанъёс

Удмурт Дунне
By Удмурт Дунне Февраль 15, 2016 14:34

рябининаЗинаида Рябинина, валтӥсь редактор:

12-тӥ тулыспалэ, 13-тӥ ӧтчам йылпумъяз ужзэ. Та сярысь ми трос гожъялом на ӧтчам бере но, угось удмуртлык но азинлык асьме понна одӥг кыл выллем луо.

Удмуртлыкъя югдурез учконо ке, оглом, асьмелэн котькуд удысын азинскыны луонлыкъёсмы вань кадь. Нош кытын сюлэмшугъёс, тырмымтэос вань — ӵапак дырыз но интыез соосты съездын эскерыны, бадӟым кивалтӥсьёс доры вуттыны. Но, мон адӟемъя, вань асьмелэн одӥг валтӥсь тырмымтэмы: огазеяськонмы вань ке но, уж вылын асьмеос чик но огазеяськемын ӧвӧл! Тани чаклалэ ай, кыӵе ужпумез бералтылӥм асьмеос берло дыре огазеяськыса? Культура уг шугъяськы удмурт учебникъёс поттон пумысен, дышетон уг бӧрды гуртъёсын медпунктъёсты пытсам понна, эмчилы маке шат, вань-а солэн участоказ удмурт школа, ӧвӧл-а, егитъёслы тунсыко ӧвӧл, кӧня удмурт депутат парламентын, артист удмурт газетэз лыдӟоз, со сярысь отын гожтэмын ке… Сыӵе ик учкон элита нимаськисьёс пӧлын. Малы ке но ваньзэс ӵош адӟылыны уг кылды премьераосысь но, адӟытонъёсысь но, презентациосысь но, туала праймеризъёсысь но. «Удмурт Кенеш» аслаз исполкомаз удмурт азьветлӥсьёсты но кивалтӥсьёсты ќй люкаллясал яке Гербер ӧй ортчытъясал ке, мукет дыръя соос кытын ке ӵош учыраллясалзы на меда?

Съезд — бадӟым ужрад, со арня ӵоже гинэ уг дасяськы, соин кӧня ке толэзь талэсь азьло ни ми калыклы газет пыр луонлык сётӥм асьсэлэсь малпанзэс шараяны. Но котьку сямен шыпыт вал. Интернет но, паймоно кадь, удмурт темаен ӧз вотэсаськы. Отысь сюриз съездлы сӥзем чылкак кык гинэ сӥньыс нюжа. Куд-огзэ туж сюлмаськытэ, малы гужем Финляндиын ортчоно фин-угор калыкъёслэн конгрессазы, 20 мурт интые, 5 гинэ мыноз, кыкетӥез — «Удмурт Кенеш» огазеяськонлы тӧрое кандидатъёсын тодматон. Егит бигер пияш сюлмаське: кин валтоз удмуртъёсты: Яковлев яке Ишматова? Тонэ, Рустам, тодӥсько, нош Яковлевез уг, ма каром? — исаса юасько бигер азьветлӥсьлэсь. Соку, пе, сюлмыныд бырйы… Сюлэмын мукет учыръёсы быръёно кадь, нош татын йырын ик малпаськоно, дыр. Зэм, та рад сое тӥяно уз луы.

 

Удмурт Дунне
By Удмурт Дунне Февраль 15, 2016 14:34