С. Ёлкин: Тодӥсько, мар карыны кулэ ӧвӧл…

Удмурт Дунне
By Удмурт Дунне Февраль 18, 2016 11:38
J_RPRoetUCA

С. Ёлкин ас азяз 100 ужпум пуктӥз.

Сергей Ёлкинэз мон нырысьсэ адӟи сцена вылысен 5 ар талэсь азьло — удмурт кылын со кырӟаз рэп но хип-хоп кырӟанъёссэ — таӵеез удмурт эстрадаын ӧй вал на. Нош али Сергей аслэсьтыз ужзэ бергатэ вордӥськем палъёсаз, Татарстанысь Набережные Челны карын.

 Кырӟан гожъян

— Мар бордысен кутски кырӟанъёсын вырыны? 2008-тӥ но 2010-тӥ аръёсы «Шундыкар» лагере ыстылӥ кырӟанъёсме, озьы шедьылӥ  эстрада отрядэ. Рэп амалэн удмурт кырӟанъёсты быдэсъян — со вал мынам хоббие. Шудӥ на гитараен. Со вакытэ гожтӥ 2 удмурт кырӟан — «Мон яратӥсько удмурт hip-hop-ез» но «Зэмос яратон». Берпуметӥзэ ми Алина Антоноваен ӵош быдэстӥськом, туэ ӧдъясько та кырӟанэз студиын гожтыны. 11 ӟуч кырӟанъёс гожтӥ на. Удмурт ужрадъёс дыръя сцена вылэ поталляй. Продюсер Паша Поздеев дэмлаз мыным кушем ним басьтыны — Ури-бери, со мыным туж тупа кадь.

Берло кырӟан гожъянлэсь куштӥськи, малы ке шуоно со мыным кулэ ӧвӧл ни. Малы? Мынам котьку потэ вал пыласькеме трос уксё пӧлын, ваньзылы тодмо луэме потэ. Валай, рэп уз быдэсты мынэсьтым льӧль малпанъёсме — кылзӥськисьёс трос ӧвӧл, озьыен, уксё но ӧжыт. Сыӵе ни мон, уксё понна бырем адями. Озьы малпай дышетсконме Москваын азьланьтыны. Пыри Россиысь социальной кун университетэ, менеджмент факультетэ.

 Тиньковен пумиськон

— Улон вакчи, соин ик кулэ яркыт луыны, адямиослэн тодазы кыльыны. Кылем арын гужем мон ветлӥ шутэтскыны Санкт-Петербурге. Петергофын — шудэ бадӟым, лэся — синйылтӥ тодмо ужбергатӥсез Олег Тиньковез. Кема малпаськыса ӧй улы, лыктӥ дораз: «Умоесь, Олег. Мынам нимы Сергей Ёлкин, мон но ужбергатӥсь, эшшо блогер на. Мон гажасько тӥледыз, яра-а кидэс кырмыны?» Кӧня ке вераськимы, малпай: селфи ӧй лэсьты ке, асме весь со понна йыръё. «Яра-а, мон тӥледын селфи лэсьто?» — «Конечно».

Олег Тиньковен мон пумиськыны малпасько на. Со монэ тодэ на, дыр.

Кондиционеръёсын вырон

— Ужбергатон сярысь малпанъёсы кылдӥзы одӥг учыр бере. Москваын 2013-тӥ арын сӥзьыл мон машинаме шукки. Ачим янгыш вал бере, трос коньдонме кисьтоно луи. Страховкае нош куштэм коньдонэлэсь 30 процентсэ но ӧз берыкты. Быдэс улонме-а, мар-а мон табере пунэмъёсме берыктыны выро? Кулэ уксё поттыны!

Озьы кутски юртъёсы кондиционеръёс но вентиляция пуктылыны. Уже али но азинске, уксё вае. Туэ арлы ас азям ужпум пуктӥ — поттоно 3 но ӝыны миллион манет.

2015-тӥ арын Набережные Челныын усьтӥ Бизнесъя школа. Отчы ветлыса, кутскись ужбергатӥсьёс асьсэлэсь удыссэс усьтыны быгатозы, нош тодӥсь-валасьёсыз выль амалъёсын тодматскозы. Та проект азинске, но трос уксё уг вайы. Сое мон радъясько сюлэмы куремъя.

Клиентъёсты вузан

— Руслан юлтошеным тодматски «Бизнес молодости» пумиськонъёсын. Милям потэ вал бизнес сярысь тросгес тодэммы: Русланлэн трос уксёез вал, нош мынам — берпум манетъёсы.

Ми кутским утчаны чагыр эстӥськонэз лыдъясь-чотась арбериосты коркаосы пуктылӥсь компаниосты. Казаньысь шедьтӥм 2-сэ. Соос милемлы одӥг адями клиент шедьтэммы понна 1500 манет тырыны соглаш луизы. Ваньмыз умой кутске вал. Но ужмы ӧз пӧрмы. Компаниос таӵе амалэн ужаны дышемын ӧй вал на. Руслан кошкиз Сочие, отын выль бизнес усьтӥз. Мон кондиционеръёсын выронме азьланьтӥ. Выль малпанъёс борды нырысь ӟырдыт мылкыдын кутсконо, собере шуг-секытъёс кылдо но, тросэзлэн ужбергатӥсьёслэн кужымзы уг тырмы соосты вормыны.

Кылем арын коньывуонэ вуылӥ Москвае. Татын мон азинтӥ клиентъёсты утчан но вузан ужме. Бырйи эмъян удысэз. Эскери татысь рынокез но валай: тросэз компаниос Интернетэ реклама тыро ке но, мерлыко вотэсбамъёсты лыдэ уггес басьто. Озьы мон кутски кыскалляны вотэсбамын пукись адямиосты, дэмлалляй эмъяськыны сояз яке таяз клиникаын… Москваын аслэсьтыд уждэ усьтон понна кулэ туж трос коньдон. Берен берытски Набережные Челныям, нош ик кондиционеръёсы борды кутски. Но Москва сярысь малпанъёсылэсь ӧй куштӥськы.

Мон асме уг лыдъяськы на азинлыко ужбергатӥсен. Угось уг тодӥськы на, мар кароно, ужед умой мед мыноз шуыса. Но тодӥсько, мар карыны кулэ ӧвӧл. Нырысь ик, одӥг уж борды кутскид ке, вань кужымдэ солы гинэ сётоно, одӥг малпанэд вылысь мукетаз тэтчано ӧвӧл. Кулэ ӧвӧл киостэ лэзьыны, шуг-секытъёсын нюръяськоно. Таяз радэ ӧз пӧрмы ке, удалтоз мукет дыръя. Озьы ик кулэ ӧвӧл уродъяськыны но йыркуръяськыны адямиос вылэ. Соослы осконо, со дыре ик эскериськоно. Кулэ ӧвӧл ужаны эшъёсыныд, юись муртъёсын. Шедьтӥд ке сюлмысь ужась адямиез — озьыен, тынад командаед луоз зол.

* * *

Сергей Ёлкин аслаз блогаз гожтӥз туэ арлы пуктэм 100 ужпумъёссэ. Соос пӧлысь куд-огъёсыз:

— анай-атаез шутэтскыны лэзёно;

— воздушной шарен лобано, парашютэн тэтчоно;

— вуылоно дуннеысь 10 кунъёсы но Россиысь 10 каръёсы;

— лыдӟоно 12 книга но кузьмано соосты эшъёслы;

— 3 но ӝыны миллион манет поттоно;

— гожтоно книга, кырӟан;

— кырмоно В. Путинлэсь кизэ…

Мария Векшина

 

 

Удмурт Дунне
By Удмурт Дунне Февраль 18, 2016 11:38