Муш Нади: мон пичи жанръем адями

Удмурт Дунне
By Удмурт Дунне Февраль 9, 2016 09:20
11093939_10153184779511544_949148461_n

Муш Нади.

Пичи жанръем адями

Кылысь кылэ берыктонлэн ужпумъёсыз

Кылысь кылэ берыкъясь Надежда Пчеловодова Муш Нади нимын тодмо. Солы луыса ми тодматским ни Эстониысь Арво Валтонлэн, Хассо Крулльлэн, Хандо Руннельлэн, Маарья Кангролэн но мукет гожъяськисьёслэн творчествоенызы.

— Нади, ачид тон кытысь?

— Мон Алнаш ёросысь Кадикгуртын вордӥськи. Йылпумъяй Удмурт кун университетысь удмурт кылосбуръя факультетэз. Университет бере ужай Йӧскалык библиотекалэн шаертодонъя но фин-угор литературая ёзэтаз. Зэмзэ ке, уже туж кельше вал. Улон интыен югдур умойгес луысал ке, кин тодэ, оло, Иже ик кыльысал.

— Нош кызьы вуид Эстоние?

— Эстониын дышетскыны стипендия сярысь ивор тодӥ. Вылаз ик, 2002-тӥ арын Ижын ортчиз Фин-угор литератураослэн ассоциацизылэн конгрессэз. Отын тодматски эстон гожъяськисен Арво Валтонэн. Со кошкыны мылкыдме эшшо но лӧпкытӥз. Соку малпамын вал берыктон ужлы дышетскыны мылкыд карисьёс понна проект. Дышетскемзы бере соос эстон литератураез анай кылазы берыктон бордын ужаны кулэ вал. Университетын дышетскыкум, мон берыктӥ вал ни М. Лермонтовлэсь, Ижысь И. Тойдоровалэсь кылбуръёссэс. Озьы мон литератураез берыктон проектъёсъя стипендия басьтӥ но Эстоние ширтӥ. Одӥг ар дышетӥ эстон кылэз, собере пыри Таллин университетысь литературая магистратурае.

— Озьыен, Эстония сюлмаське ас культуразэ мукет калыкъёс пӧлы вӧлмытон сярысь?

— Бен. Татын туж трос фондъёс вань. Тодмоосыз пӧлысь Hõimurahvaste Programm, со 4 кылын гожтэм книгаосме поттыны юрттӥз. Тужгес но бадӟымез — лулчеберетъя министерство бордын ужась «Культуркапитал» фонд. Котькуд аракы ӟенеликысь, тамакысь налогъёс лыкто отчы — со ту-у-уж бадӟым фонд. Отысь араз 4 пол коньдон курыны луэ. Культура удысын вань ужасьёс — писательёс, кырӟасьёс, фольклорез эскерисьёс — та фондысь коньдон вылын уло. Соос малпанзэс проектэн гожто, нош фондысь комиссия собере учке: талы коньдон сётоно-а, ӧвӧл-а, куремез мында яке ӧжытгес-а. Фин-угор литератураез эс-тон кылэ берыктӥсь центръёс 3: Kirjastuskeskus издательствоен ужа Арво Валтон, татын трос книгаос печатласько — удмуртъёсыз но, Юлле Кауксилэн центрез 5 арлы огпол фин-угор антологиос поттыны тырше, Тарту университетысь Пауль Аристэ нимо центр но книга поттылэ.

— Иське, берыктӥсьёс-лэн коньдонэн шуг-секытъёссы уг кылдыло?

— Кылдыло. Фонд куремлы быдэ уксё уг сёты. Берыктон удыслэн шуг-секытэз — ужез радъян но уксё шедьтон бордын, нош кылысь кылэ берыктыны секыт ӧвӧл. Мыным та уже толэзьлы быдэ уждун уг вайы. Литература текстъёсты эстон кылысь гинэ берыктӥсько. Соосты estlit.ee эстон литературалы сӥзем сайтысь шедьтыны луоз. Удмурт кылысь берыктӥськод ке, ужъёстэ мед адӟозы но мед басьтозы шуыса, туж зол тыршоно луэ. Эстониын уго асьсэлэн трос книгаоссы пото. Коньдон ӧвӧлэн уно малпанъёс улонэ уг пыӵало. Али потон дырзэ возьма Микаль Михайловлэн удмурт, эстон, ӟуч, англи кылъёсын кылбур бичетэз.

— Удмуртиын ушъяськыны ярато асьме кылбурчиослэн 4 кылын потэм бичетъёсынызы. Кызьы сыӵе малпан лыктӥз?

— Эстониын кылбур ужрадъёсын ӵемысь удмурт кылбуръёсты лыдӟисько. Нош татын нокин уг вала удмурт кылэз! Та сериын поттӥмы мынэсьтым «Куттэмпыд» (ачим малпай бере, аслам кылбуръёсыным ик нырысь вамыш лэсьтӥм), Лариса Ореховалэсь «Ярдуртэм нюлэс», Арзами Очейлэсь «Эн», Лариса Мардановалэсь «Йыромон», Зинаида Рябининалэсь «12 суред», Люза Бадретдиновалэсь «Мынам сюресэ — сюлэме» но Екатерина Макаровалэсь «Сӥзьыл гуръёс» книгаоссэс. Табере таӵе ик серия потэ Венгриын (удмурт, мадьяр, немец, француз кылъёсын) но Марий Элын (удмурт, пор, мокша яке эрзя но коми кылъёсын).

— Озьыен, пӧртэм фин-угор улосвылъёсысь бе-рыктӥсьёс валче ужало?

— Бен. Марий Элын таин выре Альбертина Иванова. Солы юрттӥськыса, мон ӟуч кыл пыр коми Нина Обрезковалэсь, мокша Рая Орловалэсь, пор Альбертина Ивановалэсь кылбуръёссэс удмурт кылэ берыктылӥ. Англи кылэ берыктӥсь утчало асьсэос авторъёс, таоссэ берыктэмъёсты тупатъя на издательствоын англи текстъёсын ужась редактор. Мадьяр кылэ берыктэ Янош Пустаи, французэ — Себастьян Каньоли но Эва Тулуз, немец кылэ — Рая Бартенс, эстон кылэ — Арво Валтон. Майре Иро но, Лайни Лиепа эстон кылэ «Узы-боры» киноез берыктыны юрттӥзы. «Пузкар» фильмын текстэз трос ӧй вал бере, таиз бордын огнам тырши ни.

— Авторлэсь анай кылзэ уд тодӥськы ке, шугомоно ук. Подстрочникъёс пыр берыктыку, текстлэн пуштросэз уг воштӥськы-а?

— Мон њуч кыл пыр ужаны  дышемын ӧвӧл. Та ужпумен пумиськи, куке берыктӥ пор Альбертина Ивановалэсь но мокша Рая Орловалэсь кылбуръёссэс. Вот со секыт! Тани коми кылэз мон ӧжыт дышетэмын но, коми Нина Обрезковалэсь кылбуръёссэ берыктыны туж капчи потӥз. Сыӵе дыръя кулэ луэ авторен герӟаськылыны: коть телефон, коть скайп но вотэс пыр. Тодыны кулэ калыклэсь фольклорзэ, сям-йылолъёссэ но валаны малпаськон ӧрзэ. Кылсярысь, туала эстон поэзиез берыктыку, туж умой тодоно вань литературазэс, угось туала кылбурчиоссы туж трос цитатаос кутыло классикалы пӧрмем книгаосысь. Удмурт кылчиос фин-угор кылъёсты тодо бере, подстрочникъёсын уг ужало. Венгер литератураез берыктӥсьёс пӧлын — Алёна Родионова, Лариса Широбокова, Ольга Игнатьева, Анастасия Петрова-Деметер. Эстон кылысь, мон сяна — Ирина Решетникова но Анатолий Мурзин. Фин кылысь берыкто Виктор Шибанов, Леонид Ившин. Кулэ ини утчаны испан, немец но мукет кылъёсысь меӵак берыктӥсьёсты.

— Нош кин удмурт литератураез мукет кылъёсы берыктоз?

— Умой луысал шуыны: тани, Ӝузеппе, тыныд коньдон, берыктом та удмурт романэз испан кылэ! Но удмуртъёслэн сыӵе луонлыксы ӧвӧл.

Удмурт литератураез асьсэ кылэ берыктӥсьёс — зарни чот,  соосты утёно!  Эса-Юсси Салминен  фин кылэ удмурт «Дорвыжы» эпосэз берыктӥз, мынам но кылбуръёсыным выре! Себастьян Каньоли коми кылын вераське. Малы удмурт кылысь берыктыны курыса вазиськонтэмез? Мон эстон кылэз валасько ке но, берыктыны та кылэ, шуом, Виктор Шибановлэсь кылбуръёссэ огнам уг дӥсьты. Эстон кылын подстрочникъёс гинэ лэсьтылӥсько.

— Берыктон — со туж секыт уж. Кыӵе жанръёс тыныд кельшо?

— Мон пичи жанръем адями, соин ик бадӟым прозаез берыктыны уг кутскы. Нош веросъёс, миниатюраос — со тунсыко! Кылбурез берыктон — мон понна котьку но дышетскон но авторез валан. Кылбурез берыктыны секыт, но мон сое ик бырйисько. Кылбурын мылкыд туж вакчи формаен но пӧртэм пумо амалъёсын верамын. Та бордын ик берыктонлэн шуг-секытъёсыз.

— Котькытын сюро дунъясьёсыз но, курласьёсыз но. Кыӵе мылкыдъёсын пумиськылэмед вань?

— Лыдӟисьёслэсь мынам уно ӟеч кылъёс верамзэс кылэме вань, куддыръя тышкаськемзэс но. Туала эстон поэзиын нокыӵе табу ӧвӧл, соин сэрен сюро пӧртэм гожъяськон амалъёс. Маарья Кангролэн но Индрек Коффлэн книгаосазы ораськон кылъёс пумиськыло, берыктыку соосты кельтыны кулэ. Котькӧня мед курлалозы, но мар кароз берыктӥсь, со берыктэ гинэ ук. Котькуд авторлэн кылтӥрлыкез аслаз — берыктӥсьлы сое котьку чакланы кулэ. Со тодматэ адямиосты мукет культураосын.

Муш Надилэн эстон кылысь берыктэм куд-ог книгаосыз:

Арво Валтон «Тынад нимыд вошъяськылэ».

Карл Ристикиви «Адямилэн улон сюресэз».

Кристиан Яак Петерсон «Та музъемлэн кылыз: кылбуръёс но дневникысь чуръёс».

Эно Рауд «Зэмос учыр».

Индрек Кофф «Удмуртлыклэн улон кужмыз сярысь».

Эдгар Вальтер «Покъёс сярысь лыдӟет».

Бетти Альвер «Инвис усьтӥськон вакыт».

Эрнст Энно «Сюресчилэн ӝыт кырӟанэз».

Юхан Лийв «Тонэн но тонтэк».

Хандо Руннель «Чебер музъем».

Маарья Кангро «Эврика».

Хассо Крулль «Крезьгур лабиринтын уйлы быдэ».

Вераськиз Мария Векшина

 

Удмурт Дунне
By Удмурт Дунне Февраль 9, 2016 09:20