Мултан уж, 90 арез пусъён но Лӧпшо Педунь дорын куноын

Удмурт Дунне
By Удмурт Дунне Февраль 29, 2016 13:55

Мултан уж, 90 арез пусъён но Лӧпшо Педунь дорын куноын

Кизнер

 Мултан ужез но тодазы вайизы 

Муниципал кылдытэтъёсын кивалтӥсьёс Короленко черкогуртэ вуылӥзы.

Ёросысь муниципал кылдытэтъёсын кивалтӥсьёс кенешонзэс выль сямен радъяны кутскизы, гуртъёсы потаса. Кылем арня пумын куноос люкаськылћзы Короленкое. Кивалтӥсьёс, ас удыссыя кенешем сяна, тодазы вайизы Мултан ужез, угось мугез вань: та уж йылпумъяськем дырысен 120 ар тырмонлы дасяськон кутскемын. Бӧрысь вань куноос В. Короленко нимо музее пыразы но «Корка пырон» йылолэн тодматскизы. Школаын дышетскись нылпиос но палэнэ ӧз кыле, куноос понна соос тунсыко адӟытон возьматӥзы. Гуртъёсы потаса кенешонлэн пайдаез бадӟымгес, интыысь югдурез ас синъёсынымы адњиськомы, шуиз Кизнер ёрослэн йырыз Александр Плотников.

Дэри

 Ӟеч-а, бур-а, удмурт кыл!

Казмас школаын ёросысь удмурт кылъя дышетӥсьёслэн кенешсы ортчиз.

Удмурт кылэз дышетонын куд-ог шугъяськонъёс кылдэмын. Берло дыре покчи классъёсын ужась дышетӥсьёс удмурт кылэз капчиятэм программая дышето, нош традиционноез куд-ог пичи гуртъёсысь школаосын гинэ кылемын. Соин ик 5-тӥ классэ выжем нылпиосты удмурт кылъя дышетӥсьёс паймо кыӵе программая визьноданы. Ужрадэ люкаськем дышетӥсьёс ӝожомыса веразы, «Ӟеч-а, бур-а, удмурт кыл!» программая дышетскыса, 5-тӥ классэ тросэз пиналъёс ӟучомыса, пе, вуо. Та югдурысь потон амалъёсыныз тодматӥз Казмасысь дышетӥсь Антонина Фёдоровна Веретенникова. Со урокъёсаз пыртэ удмурт литератураез но.

Каракулино

 Тунсыко иворез — альбоме

Ёрос дасяське 90 ар тырмонзэ пусйыны.

Та ужрадлы сӥзьыса, ёрос администрация нимысьтыз кубок но альбом дасяз. Киысь кие вошъяськись арбериос куноялозы котькуд муниципал кылдытэтын. Альбоме гожтозы тужгес тунсыко иворъёссэс, ортчытэм ужрадъёссэс. Кубок но альбом вуылӥз ни «Вятское» муниципал кылдытэтэ, та нуналъёсы со кузёяське «Боярское» кылдытэтын.

Дэбес

 Соглаш яке пумит

Ёросысь егитъёс армие мынон сярысь кенешизы.

Егитъёсын ужанъя «Вертикаль» центрысь специалистъёс Дэбес политехникумын дышетскисьёс пӧлын «Армие ветлонлы соглаш яке пумит» темая кенешон ортчытӥзы. Ужрадэ 35 мурт пыриськиз. Котькуд адями аслэсьтыз малпанъёссэ шара вераз. Люкаськемъёс огымысь кадь веразы: армие ветлон — бадӟым дан, вань пиос Атыкай музъеммес утьыны кулэ.

Эгра

 Куноятоз Лӧпшо Педунь

Кылем арня пумын ёросысь удмурт культурая центрын усьтӥськиз Лӧпшо Педуньлэн кунокуаез.

Ёросысь удмурт культурая центр интыяськемын Сундур гуртэ. Отын ужасьёс тэк пуконэз уг тодо. Куноосты пумитало, удмурт йылол-сямъёсын тодмато, пӧраськонъя мастер-классъёс ортчыто. Нош та нуналъёсы Лӧпшо Педуньлэсь пичи кунокуазэ усьтӥзы. Мылкыд карисьёс табере кӧня ке нунал татын кунояны быгатозы. Тужгес но трос куноосты витё 2-тӥ-5-тӥ мартэ, соку Эграын ортчозы гурт спортсменъёслэн тол шудонъёссы.

Глазов

 Город пытсамын

Кылем арня шорын Глазов городэз карантинэ ворсазы.

Город ульчаысь жуг-жаг куян интыысь ӟичылэн шӧйыз шедьтэмын. Эскеронъёс ортчытэм бере тодмо луиз: кыр пӧйшур урмонэн черламын вылэм. Город огдырлы пытсамын. Пудоен вуз карыны но адӟытонъёс ортчытъяны лэземын ӧвӧл, нош городын улӥсьёслэсь вань пудозэс (гидын но коркан улӥсьёссэ) эскерозы но вакцина пуктылозы. Пусйыны кулэ, туэ ар понна Удмуртиын 23 урмем пӧйшур шедьтэмын ни. Кылем арысь та вакытэн ӵошатыса, со 2 поллы уногес луэ.

Яр

 Устоез библиотека

Ёросысь школа библиотекаос вожвылъясько тужгес устоез ним басьтон понна.

Книга лыдӟись пиналъёслэн лыдзы нуналысь нуналэ ӧжыт кыле шуэмлы уг оско библиотекаын ужасьёс. Нылпиос понна пӧртэм конкурсъёс но викторинаос ортчытъяло но, доразы пырасьёс эшшо но тросгес луо. Ёросысь устоез школа библиотека луон понна ӵошатсконлэн нырысетӥ люкетаз 7 библиотека пыриськиз. Котькинлы адӟем карымон луо Яр каргуртысь 2 номеро школаысь библиотекаын ужасьёс, кивалтӥсьсы Галина Дмитриева.

Юкаменск

 Тулыслы дасяськон

Сӥзьыл бусы ужъёс йылпумъяськем бере ик выль тулыслы дасяськон кутске.

Кылем арез учконо ке, ёросысь гурт но фермер хозяйствоос пӧлысь тужгес чупрес ужаз «Луч» огазеяськон. Сӥзьыл техниказэс липет улэ пыртӥзы, гырон-кизён агрегатъёссы ваньмыз ужало вал. Та вакытэ тулыслы дасяськон азьланьтӥське. Ёросысь вань хозяйствоосын 210 трактор лыдъяське, со пӧлысь 172-ез рос-прос ужа. Фермеръёслэн 32 тракторзы ке, одӥгез гинэ уг ужа. 72 культиватор пӧлысь 55-ез  ужась лыдъяське, 91 сеялка пӧлысь 60-эз тупатъямын, 52 грузовой машина пӧлысь 42-ез бусые потыны дась.

Удмурт Дунне
By Удмурт Дунне Февраль 29, 2016 13:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*