Лыдӟись пытсаське…

Удмурт Дунне
By Удмурт Дунне Февраль 24, 2016 12:08
0000177

Шаерамы, ёрос газетъёсты но вераса, 16 удмурт издание потэ!

Ӧтчам азьын мон, зэмзэ вераса,  малпаськи: кулэ меда «Ивор вӧлмытон»  секциез нимысьтыз ортчытыны, угось удмурт ивор бусыез учкиськод ке, оглом ваньмыз вань кадь.

Печатья но ивор вӧлмытонъя агентствоен кивалтӥсьлэн воштӥсез Сергей Васильев мадиз: шаерамы, ёрос газетъёсты но вераса, 16 удмурт издание потэ! Со тырмытлэсь но тырмыт. Но лыдӟисез ичи. Печатья таин вераськонэз йылпумъяны луэ ни вал кадь, но «пӧськыос» потӥзы ик — кылсярысь, алнашъёслэн потэ удмурт газетсэс паськытатэмзы, но амалзы ӧвӧл, пургаос совето вакытъёсысен потто ӟуч кылысь берыктэм газет! Асьсэ вераськон манерен удмурт газет лыдӟемзы потэ бигер шаерысь удмуртъёслэн. Егит журналистъёс шуо: ми дась нимысьтыз удмурт газет поттыны, лэзе гинэ! Дышетэ!

Дышетон сярысь  вераськиз Удмурт кун университетысь тодосчи Александр Шкляев. Удмурт филологияя, финно-угроведениея но журналистикая институтын, пе, али одӥг инты но уг висъяськы нимысьтыз удмурт журналистъёсты дасяны! Та бен университетысь кивалтӥсьёслэн мылкыдзы бордысь гинэ уг поты, люкето дышетон сярысь федерал законъёс, кылсярысь, ЕГЭ-ез удмурт кылын сётыны уг луы.

Троссэ ужпумъёсты сэрттыны-пертчыны луэ асьме куспын но. Ёросъёсысь удмурт газетъёсын ужасьёслэн дышетскемзы потэ элькун изданиосын ужасьёслэсь — таиз, малпасько, чик секыт ӧвӧл. Алигес ужаны кутскемъёс  ӵектӥзы  Егит журналистъёслэсь коллегизэс кылдытыны.

Азинскыны кулэ Интернетын. Сотэк асьмеос асьмелы гинэ гожъяськиськом пӧрме, инвисъёсты паськытатон понна уже кутоно  туала амалъёсты — мед тодозы удмуртлык сярысь быдэс дуннеын. Тани али шаерамы 121 электрон СМИ, удмуртэз одӥг но ӧвӧл. Асьмеос малы ке ум валаське на солэсь кулэлыксэ — нуналлы быдэ  удмурт иворъёс Интернетэ потта «Мынам Удмуртие» телекомпанилэн ялан ужась «Иворъёс» группаез но «Удмурт дунне» газет гинэ, но со но кулэезъя радъямтэ на. Мукетъёсызлы но шаплыгес кариськоно, угось кӧня ке ар улыса,  асьмеос быдэсак  пеймыт гуэ усьыны — ивортэк кыльыны — быгатом, угось газетъёслэн, котьма ке но, вазь-а, бер-а, вакытсы быроз, нош Интернет бусые потыса ум вуэ…

Ваньмыз та сюлмаськонъёс арысь аре кыстӥсько, резолюциысь резолюцие выжо, соин та рад  Печатья но ивор вӧлмытонъя агентстволы дэмламын анай кылын потӥсь изданиосты азинтонъя нимысьтыз концепция дасяны, отын котькуд ужпумъя ужрадъёс чакланы.

Зинаида Рябинина

Туспуктӥз А. Горбунов

Удмурт Дунне
By Удмурт Дунне Февраль 24, 2016 12:08