Куд-ог юанъёслы дыр вуымтэ? Мар лэсьтыны пӧрмиз, мар — ӧз

Удмурт Дунне
By Удмурт Дунне Февраль 10, 2016 14:24
Ӝоген та юрт вылын гожтэмын луоз «Айкай» театр».

Ӝоген та юрт вылын гожтэмын луоз «Айкай» театр».

Ӧтчамлы быдэ одӥг выллем юанъёс ӝутӥсько: кылмес азинтон, удмуртлыкмес ӝутон, лыдмес утён. 2012-тӥ арын кутэм резолюциын но таос чузъяськизы. Тросэз ужпумъёс вормемын вал ке но, тужгес лэчытъёсыз озьы ик интыязы кылизы. Мар люкетэ соосты вормыны?

Ку дась луомы?

Резолюциысь: удмурт кылэз дышетон радъямын мед луоз шаерысьтымы ваньмаз школаосын, удмурт кылъя курсъёсты паськытатоно.

Валэктэ нациосын ужан политикая министр Лариса Буранова:

— Валаны кулэ: удмурт кылэз одно ик ваньмаз школаосын дышетонэн дыртоно ӧвӧл. Кужмысь карон кытчы вуттоз? Талы адямиос но, кивалтӥсьёс но дась луыны кулэ. Нырысь ик кылдытыны кулэ луонлыкъёс.

20-тӥ даурлэн 90-тӥ арозяз вань мылкыд карисьёслэн удмурт но бигер кылъёсты дышетэмзы ӧз луы — городын улӥсьёслэн сыӵе луонлыкъёссы ик ӧй вал. Удмурт кылъя курсъёс но ӧй вал. Кема дыр ӵоже удмурт пиналъёс понна ӝӧк выл шудонъёс, книгаос, аудиодискъёс гинэ но ӧй вал. Соин ик уно аръёсын люкаськем юанъёсты  шуак бералтыны луонлык но ӧвӧл. Но анай кылъя законэ воштонъёс пыртон ласянь ум вунэтӥське. Правительстволэн Тӧроезлэн бурд улаз та ужез эскеронъя но радъянъя нимысьтыз кенеш кылдытэмын. Татын ик чаклало, мар эшшо кароно на удмурт кылэз дышетон но вӧлмытон понна.

Нялтас вераса, удмурт кылэз дышетонъя курсъёслэн данзы будӥз. Кылем арын 14 группа кылдытэмын вал, 9-эз ужаз Ижын. Туэ талэсь но трос луыны кулэ.

Ватсаса юрттэт сётӥськоз?

Резолюциысь: нылпи садъёсысь анай кылэз дышетон бордын ужась воспитательёслы уждунзы вӧзы ватсаса уксё тыронэз чаклано.

Валэктэ Дышетонъя но наукая министерствоысь анай кылъёсъя ёзэн  кивалтӥсь Валентина Корепанова:

— Школаосын анай кылъя но литературая дышетӥсьёслы уждунзы борды 15 процент тыриське. Со пумысен уждун тыронъя нимысьтыз документын гожтэмын. Нош сад ачиз быгатэ  анай кылэз дышетон  бордын ужась воспитательёслы уждунзы борды ватсаса процент тырыны. Ужасьсэс тазьы дунъяны алэмын ӧвӧл.

Анай кылэз садъёсын дышетӥсьёс пумысен юанэз министерство син азяз возе. Кылем арлэн пумаз Россия Федерациысь Дышетонъя но наукая министерствое келямы йӧскалык кылъёсты дышетон но азинтон  вылысь федерал катъёсы  воштонъёс но тупатонъёс ласянь ӵектонъёсты. Уно юанъёс но дэмланъёс пӧлын ватсаса уждун тырон но вал. Со ӵектонэз умоен лыдъязы ке, малпаськомы, азьланяз садъёсысь анай кылын вераськыны дышетӥсьёс но уждунзы борды 15 процент ватсаса уксё басьтыны быгатозы.

Котькудӥныз нимысьтыз ужано?

Резолюциысь: шаерамы ужась К. Герд нимо удмурт гимназия борды ватсаса гимназиос усьтоно Ижын но Можга городын.

 Валэктэ Дышетонъя но наукая министерствоысь анай кылъёсъя ёзэн  кивалтӥсь Валентина Корепанова:

—  Нылпилэн удмурт кылэз ӟеч-ӟеч дышетэмез потэ ке, коть 1, коть 3 пинал со пумысен мед вазиськоз, школа солэсь куронзэ санэ басьтыны кулэ. Туала вакытэ уго котькуд пиналлы индивидуальной программа кылдытыны луэ. Малпасько, таӵе программаосты быдэстыны умой луысал чылкак удмурт луись ёросъёсын: Шаркан, Алнаш. Ижын но Можгалан гинэ кужымез огазеянлэн сокем пайдаез уз луы, дыр.

Кужмо школаос анай кылэз дышетонъя ресурсной центр луыны быгато. Вакчияк верано ке, та центръёсты кылдытонлэн валтӥсь мугез — пиналъёсын, анай-атайёсын, дышетӥсьёсын удмурт кылэз дышетонэз азинтон, муромытон, кужмоятон но быдэс шаерамы вӧлмытон. Азьланяз та центръёслы элькун ласянь юрттэт сётыны тыршомы. Ресурсной центр кариськыны мылкыд карисьёслы сайтамы ивор вань.

Кытын удмуртлыклэн шорсюлмыз?

Резолюциысь: Ижын усьтыны кулэ удмурт культурая центр.

 Валэктэ культурая но туризмъя министр Владимир Соловьёв:

— Туннэ удмуртъёсты огазеясь инты луэ Удмурт театр. Аслаз кужымез Ижысь Егитъёслэн юртсылэн. Ижысь К. Маркс ульчаысь њуч театрлэн вуж юртэз та нуналъёсы быдэсак выжиз   эктонъя но кырӟанъя «Айкай» кун театрлы. Отын ик усьтӥськоз удмурт  кафе. Проектэз улонэ пыӵатыны кутскон понна туэ 25 миллион манет висъямын. Туэ вылтуссэ ке но лэсьтыны-выльдыны быгатом шуыса, оскисько. Ӵапак та театрлэн юртэз удмурт центр луыны быгатысалыз. Воксё нимаз удмурт культурая центр кулэ-а — мар шуыны ик паймисько. Нимысьтыз центр кылдытыны но возьыны республикалэн бюджетэзлы туннэ вормонтэмгес луоз, дыр. Кыӵе ке ужбергатӥсь со борды басьтӥськыны дась ке, нокин пумит уз луы.

Вуоз-а котькуд корка газет?

Резолюциысь: Культурая, печатья но иворъёсъя министерствоез куроно, шаерысьтымы ваньмаз ёросъёсын удмурт кылын газетъёс мед потозы, радиоверанъёс мед чузъяськозы шуыса.

Валэктэ Печатья но ивор вӧлмытонъя агентствоен кивалтӥсь Алексей Воронцов:

— Туннэ шаерамы удмурт кылын потэ 17 газет. Соос пӧлын «Удмурт дунне»,  «Ӟечбур!» газетъёс, «Кенеш», «Инвожо», «Кизили», «Вордскем кыл» журналъёс. «Иднакар» газет чакламын Балезино, Глазов, Красногорск, Яр ёросъёс понна. 9 ёросъёсын газетъёслэн приложениоссы удмурт кылын пото.

8 ёросъёсын удмурт но ӟуч радиоверанъёс чузъясько. Со сяна, арняяз 35 час удмуртъёс понна ужа «Мынам Удмуртие» радио.

Уксёен югдур секыт луэмен но кадръёс тырмымтэен валче вань ёросъёсын удмурт кылын газет поттыны, радиопередачаос лэсьтыны луонлык ӧвӧл.

Вормонъёс вань!

Куд-ог ужпумъёсты дэмен вормыны луиз.

Резолюциысь: Правительстволы ӵектоно Нациосын ужан политикая министерствоын кылысь кылэ берыктонъя ёз кылдытыны.

Министерствоын 2015-тӥ арын 1-тӥ январе удмурт кылэ берыктонэн вырись нимысьтыз специалист юнматэмын — Елизавета Ложкина. Кылысь кылэ берыктонэн вырем сяна, Елизавета Владимировна чакласа возе кыллэсь азинтӥськемзэ, кылмес утёнын пӧртэм программаослэсь, концепциослэсь ужын кутӥськемзэс эскере, Нимкылъёсъя но шонер гожъяськонъя комиссилэсь ужзэ радъя.

Резолюциысь: Удмуртилэн Президентэзлы вазиськоно удмурт кылэз азинтонъя нимысьтыз кенеш кылдытон сярысь.

Сыӵе кенеш ужа Правительстволэн Тӧроезлэн чакламез улсын. Татын котыр ласянь эскеро, мар выльзэ улонэ пыӵатыны луоз кылэз азинтон понна, кыӵе воштонъёсты пыртоно законэ.

Резолюциысь: Удмуртилэн палэназ улӥсьёсын кусыпъёсты юнматоно.

«Удмурт Кенеш», Нациосын ужан политикая министерство но Ижысь Эшъяськон юрт ӵемгес потаны ӧдъязы шаермылэн палэназ. Соин сэрен выль эшъёс кылдӥзы — Санкт-Петербургысь, Свердловск улосысь, Нижневартовскысь удмуртъёсын кусыпъёс юнмазы. Табере таос дӥне удмурт культуралы сӥзем ужрадъёс ортчытъяны куно чот гинэ ум вуылћське. Сюлмаськытӥсь ужпумъёссэс но сэрттыны-пертчыны выриськомы. Со сяна, пӧртэм конференциос но фестивальёс радъяськыло. Палэнысь удмуртъёс но шаерамы вуыло.

Резолюциысь: «Удмурт Кенешлы» удмурт семьяосын ужано.

Та ужпумез «Удмурт нылкышно кенеш» син шораз возе. Со сяна, кык арзэ ни «Удмурт Кенеш» Вавож но Грак ёросъёсысь  котькуд семья дорозь сузьтӥськыны турттӥз. Юристъёс, психологъёс, логопедъёс анай-атайёсын гинэ ӧз ужалэ, нылпиослы но шуг-секытъёссэс вормыны юрттӥзы.

Резолюциысь: «Удмуртия» телеканал цифровой форматэ мед выжоз, сое уен-нуналэн адӟыны мед луоз.

Печатья но ивор вӧлмытонъя агентствоен кивалтӥсь Алексей Воронцов верамъя, 2015-тӥ арын октябрь толэзе шаерамы ужаны ӧдъяз 24 часъем «Удмуртия» телеканал. Таин валче луонлык кылдӥз удмурт передачаосты 2 поллы ӵемгес возьматыны.

Елена Сараматова

 

 

 

Удмурт Дунне
By Удмурт Дунне Февраль 10, 2016 14:24