Кин, асьмеос ке ӧм?

Удмурт Дунне
By Удмурт Дунне Февраль 17, 2016 16:46
_DSC0055

Егитъёслы сћзем секцие пыриськиз мугорез кыдатон культурая, спортъя но егитъёсын ужан политикая министрлэн воштӥсез М. Сорокин.

Бадӟым ӧтчам азьын Dart газет «ВКонтакте» бамаз вазиськиз вань удмурт егитъёслы: мар висьытэ тӥледыз, мар бордын азьланяз ужано? Нёръяны нёръяськом, нош одӥг дэмлан, одӥг малпан но та вазиськонлы ӧз вуы…

Озьы ке но ӧтчамлэн егитъёслы сӥзем секцияз ӵаш вазиз. Дэри ёросысь Наталья Казакова вераз нылпиослы «Шундысиос» движение кылдытэмез сярысь. Та огазеяськон сярысь тросэз уг тодо на, али дырлы солэн ёзъёсыз кылдытэмын 12 школаосын. Но трос-а со? Юрттӥськысал ке Дышетонъя но наукая министерство, соку дышетӥсьёс но пиналъёсын валче ужаны кутскысалзы.

Татарстанысь Денис Антонов кылем арын ортчытӥз «Гурфест» удмурт рок-фестиваль. Азьланяз но сыӵе фестивальёсты радъян узырмытысал культураез удмурт рок-кырӟанъёсын, выль кужым сётысал егит группаослы.

— Табере рок-фестиваль ортчытыны ми малпаськом вань фин-угор калыкъёс понна, — вера Денис Антонов. — Отын группаос кырӟалозы анай кылынызы. Ми герӟаським ни Карелиысь крезьгурчиосын, шедьтӥм ни инты, кытын ортчытом фестивалез…

Но та малпанэз улонэ пыӵатон, егитъёслэн тросэз дэмланъёссы кадь ик, пыкиське коньдон борды. «Шундыкар» лагерез ортчытон понна гинэ но котькуд ар нимысьтыз проект утёно. «Шунды» огазеяськонысь егитъёс вазиськизы мугорез кыдатон культурая, спортъя но егитъёсын ужан политикая министрлэн воштӥсезлы Максим Сорокинлы: та лагерез ортчытон мед пыроз элькунлэн егитъёсын ужанъя программаяз, соку коньдон шедьтон ласянь сюлмаськонъёс бырозы.

«Шундыкар» лагере вуо егит гожъяськисьёс, суредасьёс, крезьгурен но видеоен вырисьёс. Dart газетэ но гожъясько быгатӥсь нылпиос. Кылдытоно вылэм соослы быдэс ар ӵоже ужась сайт. Пиналъёс отчы пуктылысалзы асьсэ ужъёссэс, верасалзы мылкыдъёссэс. Та дэмланэн потӥз Dart газетлэн активез.

Ёросъёсын ӝожтӥсько, соос доры удмурт азьветлӥсьёс уг вуыло шуыса. Нош пиналъёслы удмурт культура азинске шуыса валан понна кулэ адӟыны, вераськыны, шуом, кырӟасен, кылбурчиен Богдан Анфиногеновен яке «Шунды» огазеяськонлэн тӧроеныз Ольга Тронинаен. Та шоры ас синмыныз учке Киров улосвылысь Андрей Соловьёв:

— Ми улӥськом Светозарево черкогуртын, Кировын со удмуртъёслэн шоркаренызы лыдъяське. Ми доры Удмуртиысь тодмо егитъёс вуыны уг быгато, кыдёкын. Но луэ ук онлайн-пумиськонъёс, лекциос ортчытъяны яке ужрадысь онлайн-трансляциос сётъяны. Туала амалъёсын сое радъяны секыт ӧвӧл.

— Бен, ёросъёсын но учкысалзы! — соглаш луизы мукетъёсыз.

Егитъёсын ужанъя секциын чузъяськем дэмланъёс пыртэмын бадӟым ӧтчамлэн резолюцияз. Ужпумъёсты быдэстон понна егитъёслы ӟырдыт ужано луоз. Кин лэсьтоз на, асьмеос ке ӧм?

Мария Векшина

Туспуктӥз А. Горбунов

Удмурт Дунне
By Удмурт Дунне Февраль 17, 2016 16:46