Калыклэн сюлмаз — кыл но оскон

Удмурт Дунне
By Удмурт Дунне Февраль 15, 2016 15:17

Калыклэн сюлмаз — кыл но оскон

Мар возьма удмурт калык 13-тӥ ӧтчамлэсь? Кыӵе ужпумъёс сярысь сюлмаське но малы оске?

0000002Геннадий Сидоров, «Удмурт Кенеш» огазеяськонлэн Ува ёросысь ёзэныз кивалтӥсь:

— Удмуртлык сцена вылын гинэ медаз луы. Удмурт луэмезлэсь калык медаз возьдаськы. Та бордын ужано. Со понна кылмес утён сярысь сюлмаськоно. Удмурт кылэз вань школаосын мед дышетозы шуыса, кун кылъёсъя законэ воштонъёс пыртыны луысал ке, туж бадӟым вормон басьтысалмы. Удмуртлыкез утьыны юрттоз удмурт вӧсез ӝутон но. Асьмеос сое Гербер шулдыръяськонъёсын тодамы вайылӥськом, но со шудон кадь гинэ луэ. Удмурт вӧсез уставен юнматоно. Ми ёрос газетамы сям-йылолъёсмес, вӧсяськон интыосмес но кызьы вӧсяськеммес ялан печатласьком. Вань люкам материалъёсты нимаз бичетэн поттыны малпаськом.

 

0000004Галина Перевозчикова, Воткаысь 44 номеро нылпи садысь воспитатель:

— Берло дыре малы ке юн шӧдӥськыны кутскиз — удмурт движениын валамтэос кылдо, нимаз кариськыны турттӥсьёс уно луизы. «Дэмен», «Удмурт нылкышно кенеш», «Шунды» ужало ке но «Удмурт Кенеш» огазеяськонлэн бурд улаз, одӥг возэз пӧртэм пала кыскыны выро кадь. Милям Вотка городамы вань удмурт огазеяськонъёс валче ужало. Милемлы номыре люкыны. Мон ачим ёросысь «Удмурт нылкышно кенешен» кивалтӥсько. Валче ӧй ужасалмы ке, оло, городысь 44 номеро садын удмурт группа но усьтыны ӧй быгатысалмы.

 

0000012Евгения Наговицына, Ярысь культура юртын ужась:

— Уйпал ёросъёслы секыт луиз удмурт кыллы дышетскыны. Мон Глазовысь пединститутэ пыри вал, удмурт кылын дышетӥсь луо шуыса. Но группамес визь люкан вискын ворсазы, ӟучъёсын огазеязы, лыдмы ичи шуыса. Озьы мон ӟуч кылъя дышетӥсь луи. Та югдурез но азьланяз «Удмурт Кенеш» син азяз мед возёз вылэм. Огез шумпоттэ: Яр ёросын берло дыре удмуртлык пала кыстӥськыны ӧдъязы ӟучъёс. Мон «Ибырвесь» фольклор ансамблен кивалтӥсько. Пӧламы ӟучъёс но куриськыны ӧдъязы, кырӟанъёстэс-эктонъёстэс дышетэммы, пе, потэ.

 

0000018Николай Зайцев, Пичи Пурга ёросысь Норъя гурт поселениен кивалтӥсь:

— Котькуд гуртлэн аслаз аспӧртэмлыкез вань. Туж умой луысал со аспӧртэмлыкъёсын калыкез тодматыны, котькуд гуртэ туристъёсты вайылыны. Соку, оло, гуртъёс но чылкытгес улыны кутскысалзы, ужан интыос но кылдысалзы. Со сяна, «Удмурт Кенеш» огазеяськон мед тыршысал удмурт егитъёсты пӧртэм удысъёсы кыскыны. Кылсярысь, кадръёслы юн ёрмо гурт хозяйствоос. Милям гурт поселениямы хозяйство ӧвӧл ни — банкрот кылиз. Но фермер кариськыны мылкыд карисьёс вань. Сыӵе дӥсьтӥсьёслы визь-кенешен но, субсидиосын но юрттэт кулэ. Удмуртъёслы шаплыгес кариськоно.

Дасяз Елена Сараматова

Удмурт Дунне
By Удмурт Дунне Февраль 15, 2016 15:17