Калыклэн асваланэз ӝутӥське

Удмурт Дунне
By Удмурт Дунне Февраль 10, 2016 15:33

Удмурт движениез валтонын трос кужымзэс сёто «Удмурт Кенешлэн» вице-президентъёсыз Татьяна Ишматова но Валерий Хохряков. Кыӵе инты басьтэ  соослэн улоназы огазеяськон?

_DSC0045Татьяна Ишматова:

— Егит дыръям «Удмурт Кенешлэсь» кӧня ке кышкаськогес вал, отын арлыдоос гинэ ужало, малпалляй.  Но «Шундыен» кивалтыны оскемзы бере «Удмурт Кенеш» огазеяськонлэн тӧроеныз Валентин Тубыловен нырысетӥ вераськонмы туж лякыт пӧрмиз, ог-огмес кылӥмы. Со дырысен каллен кыстӥськи «Удмурт Кенеш» борды. Туннэ мон уг люкиськы, кытын «Шунды», кытын «Дэмен», кытын «Удмурт Кенеш» — ваньзы удмурт движениез лэсьто.

Тодмо-дано арлыдо адямиослэн куддыръя осконзы ӧвӧл кадь йӧтэ: татчы егит адями лыктӥз, мар ке пырске — тазьы верамзы потэ шуыса шӧдӥсько. Но мон котькудзылэсь дышетскыны турттӥсько. Кытын ке огкылысь луисько, куддыръя эчешисько но. Югдур шоры пӧртэм синмын учкыны быгатон — со кужым: ляб но умой палъёсты адӟиськод.

Берло дыре «Удмурт Кенеш» огазеяськон шоры кыӵе ке ведомство шоры кадь учкыны ӧдъязы — кыӵе но ужпумъёсын адямиос дорамы уг лыкто. Озьы бере,  вань удысъёсты кутыны тыршоно, адямиосты котырамы кысконо. Кылсярысь, огазеяме потэ шаерысьтымы удмурт врачъёсты. Эмъян учреждениос оптимизациен валче пытсасько, йӧнатӥськон ялан дуноя, калыклэн тазалыкез лябӟе. Эмчиосты, валче кариськыса, калыке поттыны, нацилэсь тазалыксэ юнматыны луысал. Туж потэ нимысьтыз огазеяме тодосчиосты. Таослэн но асьсэ йыр висёнъёссы уго, уката но асьсэ удысазы кадръёс будэтон ласянь. Туж трос удмуртъёс кивалто гурт хозяйствоосын. Пӧртэм ӧръёсты басьтыса, валче кенешыса но ужаса гинэ, удмурт калыклэсь сюлмаськонъёссэ шараяны, соосты сэрттыны-пертчыны зэмос луонлык кылдоз. Котькуд гуртэ но ёросэ вуттӥськыны кулэ. Адямиос мед валалозы: «Удмурт Кенеш» — со 2-3 адями гинэ ӧвӧл, со тон но,  мон но, ми но. Огазеяськыса калыкен но ужаны луоз: кивалтӥсь-а тон, тодосчи-а, аслад удысад специалист-а — эн вунэты удмурт луэмдэ.

_DSC0059Валерий Хохряков:

— «Удмурт Кенешен» мон  кылдэмез дырысен герӟаськемын. Нырысетӥ ӧтчамаз но пыриськи. Кытын гинэ ӧй ужа, огазеяськонлэсь ноку ӧй палэнскылы. «Удмурт Кенеш» ӧй луысал ке, удмурт кылын таӵе вольыт но ӧй вераськысал.

Берло дыре ӵем поталляй Киров, Башкирия, Пермь улосвылъёсысь удмуртъёс доры. Палэнысь удмуртъёс но уго котьку витё асьмемыз. Соослэн шӧдэмзы потэ Удмуртиен герӟаськемзэс, соос сыӵе ик удмуртъёс шуыса. Юрттэтмес возьмало. Кылсярысь, удмурт кылэз азинтыны методической пособиоссы уг тырмо.

Удмурт шаерысь удмуртъёс но сюлмаськонъёстэк уг уло. Соин ик татын но ёросъёсты котыръятэк, адямиосын пумиськылытэк уг луы. Огез сюлмаськытэ: ёрос кивалтӥсьёслэн туж трос чаклано удысъёссы. Котькуд управленилэн аслаз ужпумъёсыз. Но одӥгаз но ёросын но карын ӧвӧл удмуртлыкез утьыны но возьыны тыршись ёз. Со ужен выро «Удмурт Кенеш» огазеяськонлэн ёросъёсысь ёзъёсыз гинэ. «Кенешчиосмы» вань ужпумъёсты адӟо, соосты сэрттыны-пертчыны тыршо. Администрациосын «кенешчиос» шоры огъя кужым шоры кадь учкыны мед кутскысалзы.

Ужъёс трос. Ваньзэ йырын возьыны тыршиськод, оломае но лэсьтэм потэ, но дыр уг окмы. Дыр тырмымтэен ваньмаз уд вуиськы шуыса, сюлэм шуг луэ.

Берло аръёсы «Удмурт Кенешлэн» данэз ӝутӥськиз. Сое адӟыны луэ дорамы лэчытэсь юанъёсын пырисьёсъя но. Зэм, азьвыл но адямиос сюлэмшугъёссэс вераллязы. Но берло дыре малпанъёссы-учконъёссы эшшо но паськытало. Кылсярысь, адямиосты туж сюлмаськытэ таӵе ужпум: ёрос но город администрациосын туннэ ӧвӧл удмурт кылэз, йылолъёсмес азинтонэн вырись программаоссы. Калыкез та сюлмаськытэ бере, озьыен, удмуртъёслэн арысь аре асваланзы ӝутӥське. Со нырысь ик «Удмурт Кенешлэн» тыршемезлэн емышез.

Елена Сараматова

Удмурт Дунне
By Удмурт Дунне Февраль 10, 2016 15:33