Калык огазеяськон калык понна ужаны кулэ

Удмурт Дунне
By Удмурт Дунне Февраль 10, 2016 14:44

Со понна калыклэсь сюлмаськонъёссэ но кылоно. Кыӵе ужпумъёс луыны кулэ валтӥсь интыын?

кин

М. Крылов.

Михаил Крылов, Алнаш ёросысь «Молодая гвардия» хозяйствоен кивалтӥсь:

— Берло дыре котькуд ужрадын ушъяськыны дышимы ни, созэ-тазэ лэсьтӥмы шуыса. Нош куддыр докладъёсын чебересь кылъёс гинэ луо, зэмлыкез вато. Монэ туж сюлмаськытэ гурт улон. Учконо ке, шаерысьтымы ваньмыз сямен хозяйствоос возисько удмурт гуртъёсын, хозяйствоосын уноез кивалтӥсьёс — удмуртъёс. Но пиналъёс туннэ юрист, менеджер луыны тыршо, гурт удысэ кылён сярысь уг малпасько. Фермае мыныны нокинлы. Школаосын ӵош та ласянь кызьы ке валэктон уж нуоно.  Школа ачиз но берло дыре гурт улонэ уг пыриськы ни. Азьвыл дышетскисьёс арлыдоослы но, колхозлы но юртто вал. Али дышетӥсьёс час понна вожмасько. Уксё дуннее выйимы кадь. Клубъёс гинэ но ӝытъёсы ворсаськемын луо. Нуназеосы кружокъёс ортчыло ик ай. Ярам ай, гуртамы спортзал возьыны быгатӥськом. Егитъёс отын бер уйинозь теннисэн, волейболэн шудо. Али бильярд, тренажёръёс басьтыны малпаськомы.

Н.Емельянов

Н.Емельянов

Николай Емельянов, Можга ёросысь Удмурт Пычас гуртысь шаерчи, «Удмурт Кенешлэн» 7-тӥ-10-тӥ ӧтчамъёсаз пыриськем мурт:

— Отын но татын ортчо удмурт кылэз дышетонъя курсъёс. Мылкыд карисьёс отчы, эсьмаса, кунгож сьӧрысь но вуо. Мон малпамъя, дыр вуиз ини Кун Кенешлэсь сессизэ но огпол ке но удмурт кылын ортчытыны. Удмурт кылысь берыктӥсез шедьтыны секыт уз лу.

Удмурт Республикаын кун кылъёс сярысь закон кутэмын бере, озьыен, депутатъёс мед кылзозы но мед кылозы удмурт кыллэсь чеберзэ. Бӧрысь соослэсь адӟем карысалзы министерствоос но ёросъёсысь кивалтӥсьёс. Вань удмуртъёслэн ӧтчамзы азьын мон таӵе ӵектонэн потӥсько.

 

 

Т. Захарова

Т. Захарова

Татьяна Захарова, Балезино ёросысь Исак гуртысь удмурт кылъя дышетӥсь:

— Берло дыре городын но райцентръёсын улӥсьёслэн культуразы ӝутӥськыны ӧдъяз. Удмурт кылэз но городын ӵемгес кылоно ни. Нош гуртоос котыр ласянь улӥегес усё. Удмурт кылзэс поттылыны ик возьдасько. Эшшо ке, свалкаосты пытсамен, ӧдъязы ошмесъёс дуре жуг-жагзэс куяны.  Таиз «Удмурт Кенешлэн», оло, ужез но ӧвӧл. Но жаг куштон бордысен кутске культурамы. Дышетӥсь огназ калыклэсь сюлэмзэ бералтыны уз быгаты. Солы юрттӥсь кулэ. Культурая юртъёс гинэ но гуртын пытсасько ук. Милям Исак гуртамы ик клубмы ӧвӧл. Вань ужрадъёс школаын ортчо. Но татчы трос-а концертэн кинэ ке ӧтёд? Адямиез чеберлык борды кысконэн мед вырысалыз «Удмурт Кенеш».

богдан

Б. Анфиногенов

Богдан Анфиногенов, егит кылбурчи:

— Малпасько, ужано удмурт кылмес вӧлмытон, удмуртлыкез азинтон, туалагес карон,  зэмос удмурт СМИ лэсьтон бордын. «Удмурт дунне» газет али со ласянь адӟем карымон луэ радиолы но телевиденилы… Валасько: шаерамы мукет выжыысь калыкъёс но уло, соин ик быдэс вещаниез удмурт карыны нокызьы но уз луы. Но лэсьтоно ни «Вань удмуртъёслэн телеканалзы но радиозы» проект, соку иворъёс быдэсак удмурт кылын чузъяськозы. Со сяна, удмурт теле- но радиоархивез Интернетэ, калыке поттон понна нюръяськоно. Ивор вӧлмытон — валтӥсь инструмент, нош со милям ныжгес, шуыны луоз. Соин ик сое шерыны кулэ.

Дасяз Елена Фёдорова

Удмурт Дунне
By Удмурт Дунне Февраль 10, 2016 14:44