Игорь Семёнов: Ӟӧк исьнерез уд тӥялты

Удмурт Дунне
By Удмурт Дунне Февраль 10, 2016 14:04
_DSC0023

Игорь Семёнов.

Вань удмуртъёслэн 13-тӥ бадӟым ӧтчамзы азьын кенешиськом «Удмурт Кенеш» огазеяськонлэн тӧроеныз Игорь Семёновен.

— Игорь Николаевич, 2012-тӥ арын декабре кыӵе малпанъёсын-мылкыдъёсын кутскиды вал «Удмурт Кенешен» кивалтыны?

— Палэнысь лыктэм, номыре тодӥсьтэм адями мон ӧй вал. Ужея но, улонэя но мон герӟаськемын вал «Удмурт Кенешен». Кун Кенешлэн тӧроез луыса ужакум,  «Удмурт Кенешлэн» соку тӧроеныз Валентин Тубыловен юн кусып возимы, удмурт движенилэсь ужзэ радъяны юрттыны тырши. Соин ик «Удмурт Кенеше» лыктыкум, тодӥсько вал: каньыл уз луы. Калыкен ужаны ноку капчи ӧй вал, туннэ — уката но. Адямиосын огкыл шедьтыны но секыт. Жаляса верано, туннэ огазеяськонлэн Ижкар кенешез луиз дуринчи кар, отчы пырисьёс шекъёсты утчаса гинэ уло. Бышкем интые, одӥг ӝќк котыре пуксьыса, кенешыны уг луы шат, кызьы созэ я тазэ ужпумез сэрттыны луоно? Ижкар кенешысь кивалтӥсьёсты ваче вуттӥ вал Иж городлэн азьвыл йырыныз Александр Ушаковен, «кенешчиос» администрациен валче мед ужалозы шуыса. Ог-огзылы юрттӥськозы шуыса, вераським. Кин люкетӥз отӥяз но администрацилэсь ӧссэ усьтыны? Донгись кулэ шат? Уж гуньдӥз.

Туннэ «Удмурт Кенеш» ёрос кивалтӥсьёсын огазеяськыса ӧз ужа ке, нокыӵе ӝук уз пӧзьы. Угось котькыӵе уж борды кутскы, котьмалы уксё кулэ. Коньдон шедьтыны шуг — предприятиос асьсэос шымырскыса уло, мычем килы шумпотозы шат? Нош котькуд ёрос но город администрациослэн отделъёссы арлы быдэ чаклало пӧртэм ужрадъёс. Отчы «кенешчиос» но пыриськизы ке, кык кужымез огазеяса, уж трослы пайдаё луоз. Кивалтӥсьёс но «кенешчиос» валче мед тыршозы шуыса, мылкыды вал. Куд-ог ёросъёсын та уж ӧзгес пӧрмы. Со туж умой адӟиськиз ёросъёсын быръёнъёслы но йылпумъянъёслы сӥзем конференциос дыръя. Зэм, соиз но вань: куд-ог ёросъёсын кивалтӥсьёс уггес валало «Удмурт Кенешлэсь» ужъёсты радъянъя быдэсак луонлыкъёссэ, кыӵе кужым огазеяськон бордын. «Удмурт Кенешез» адӟемзы потэ быръёнъёслы дасяськон но соосты ортчытон дыръягес. Огшоры нуналэ синйылтэмзы уг поты.

— Кызьы та югдурез тупатыны луоно кадь?

— Туэ интыосысь закон кылдытъян ёзъёсы депутатъёсты быръёнъёс ортчозы. Со уже «кенешчиос» пыриськизы ке, кандидатъёсты ӵектӥзы, депутатъёс пӧлын удмуртъёс тросгес луизы ке, «Удмурт Кенешез» кылыны ӧдъялозы, уж но золгес пӧзьыны кутскоз. Сыӵе дыръя ёрос кивалтӥсь мыдланьгес ужаз ке, «кенешчиослэсь» удыссэс ӧз синйылты ке, депутатъёс сое шонер сюресэ поттыны быгатозы. Соин ик туннэ удмурт депутатъёсты будэтон бордын тыршоно.

— Туннэ шаерысьтымы кивалтӥсьёс «Удмурт Кенешез» кыло-а, солэсь кылзӥсько-а?

— Шумпотыса вераме потэ: Удмуртилэн Тӧроез Александр Соловьёв милесьтым уг палэнтӥськы. Юанъёсмы кылдыку, ми соин котьку пумиськиськом. Кышкатэк соизъя яке таизъя ужпумъя кылдэм юанъёсты сётӥсько. Александр Васильевич но соку ик вера, маин быгатэ юрттыны, мае кельтоно ӵуказелы,  «кенешчиосын» пумиськонэ но пыриськылэ. Милемлы та кельше. Котькуд юанъя аслэсьтыз адӟонзэ вера.

Азьвыл Гербер шулдыръяськонэз быдэс шаерысьтымы удмуртъёс понна  ортчытыны ёрос кивалтӥсьёслы туж секытэн сётӥськылӥз. Элькун бюджетысь коньдон ӧз висъяськылы уго. Сое ортчытыны юрттэ вал Нациосын ужан политикая министерство, но уксё ӧз тырмылы. Шаерысьтымы вылӥ кивалтӥсьёс та югдурез валазы, табере законын юнматэмын, Герберез ортчытыны нимысьтыз уксё висъяськоз шуыса. Таин валче Гыронбыдтонлы сӥзем ужрадэз радъян понна ёросъёс вожвылъяськыны кутскизы. Бадӟым ӧтчамез дасян пумысен азьвыл ик вераськемын вал. Сое ортчытонлы табере уксё висъяськылоз бюджетысь.

— Секыт мылкыдды кылиз, дыр, удмурт кылэз дышетонъя законэ воштонъёс пыртыны туж сюлмаськиды, но уж ӧзгес пӧрмы шуыса?

— Со мынам туж бадӟым вӧсе. Удмурт движениен кивалтыны кутскеме бере ик ас азям ужпум пуктӥ: анай кылэз дышетон удысэ вамышъёс лёгоно. Шаерысьтымы вань нылпиос удмурт кылэз мед дышетозы шуыса, чакласькомы вал. Зэм, мон соку ик дась вал депутатъёслэн та ӵектонэз палэнтонзылы. Озьы ик луиз. Но та юан пытьытэк огшоры ӧз ортчы. Гуртъёсын, школаосын, та ужпумен выриськомы шуыса, кылӥзы. Школа кивалтӥсьёс малпаськыны кутскизы: кызьы радъяно дышетонэз. Берло 2 ар ӵоже удмурт кылэз дышетӥсьёс йылӥзы. 2014-тӥ-2015-тӥ аръёсы предмет чот кылэз дышетӥсьёс 600-лы будӥзы. Эшшо 2 сюрс 100 пинал анай кылэз факультатив амалэн дышетыны ӧдъяз. Туэ  школаос реорганизациен валче пытсаськизы ке но, удмурт кылэз дышетӥсь пиналъёслэн лыдзы озьы ик кылемын, нош факультативын но кружокын удмуртэн эшъяськисьёс 1 сюрс 606-лы будӥзы. Собере выримы кун кылъёсъя законэз выльдон пумысен. Проект дасямын, туннэ со Кун Кенешын. Сое эскерон уж мынэ, но каллен. Но со выльдонъёсты кутыны одно ик кулэ. Кун кылъёсъя закон 2001-тӥ арын юнматэмын вал уго. Отын гожтэмын, анай кылэз дышетыны правоез котькудӥзлэн вань шуыса. Озьыен, малпан кылдэ: туннэ та ужез быдэстӥ ке, умой, ӵуказелы кельтӥ ке, номыр уз воштӥськы, воксё ӧй быдэсты ке, эшшо умойгес. Тазьы луыны кулэ ӧвӧл.

Без имени-1

— Куд-огез юа: мар со «Удмурт Кенеш», маин со выре, шулдыръяськон ужрадъёсын сяна? Кызьы учкиськоды тазьы вераськисьёс шоры но кыӵеен адӟиськоды огазеяськонлэсь азьланяз ужамзэ?

— Мар ужаськоды шуыны быгатэ вормонъёсмес воксё тодӥсьтэмез гинэ. Огзэ исполкомез ортчытӥмы Вотка ёросысь чорыг вордонъя «Пихтовка» хозяйствоын. Отчы ӧтемын вал ёросысь дышетӥсьёс, кивалтӥсьёс, удмуртлыкез ӝутонэ пыриськисьёс. Соку ёрос кивалтӥсьёслэсь люкаськем калык азьын меӵак юай: малы уд радъяське удмурт кылэз дышетонэз школаосын но нылпи садъёсын? Исполком ортчем бере уноез юаз: ваньмыз исполкомъёс таӵе лэчыт ортчо шат? Шулдыръяськыны, кырӟаны-вераны гинэ пумиськиськомы шуыса, малпаськоды шат, шуи. Кызьы югдурез тупатыны сюрес утчаськом. Ум, пе, тодӥське вал.

Мон «кенешчиослы» ялан верасько: асьмелэн, оло, ужмес радъяны тыршыса, кымесмы лыз-вож луоз, но тӥ калыкен ӧд ужалэ ке, вормонъёсынымы ӧд тодматэ ке, калык шулдыръяськиськомы гинэ шуыса малпалоз.

— Берло дыре «Удмурт Кенешлэн» бурд улаз ужась огазеяськонъёс нимазгес кариськыны тыршо кадь. Кызьы та шоры учкиськоды?

— Зэм, туннэ Иван Крыловлэн «Лебедь, Рак и Щука» басняяз сямен куддыр луэ. Но сыӵе мылкыдзы вань ке, «Удмурт Кенешлэсь» палэнтӥськыса, мар пӧрмытозы? Исьнерез басьтэ ай. Ваен-ваен сое тӥяны туж капчи, но быдэсак кутӥд ке, куасалтыны но уд вормы. Асьмелы номыре люкыны. Огазеяськыса гинэ секыт ужпумъёсты вормомы. Тазэ ми лэсьтӥмы, созэ соос, шуимы ке, мар толыкез. Одӥг кыткетын ужаны пумитъяськисьёсты воштомы.

— Бадӟым ӧтчамлы быдэ резолюция кутӥськомы. Но отын арлы быдэ огкадь юанъёс ӝутӥсько. Мар люкетэ соосты быдэстыны?

— Мукет юанъёс отчы уз но потэ. Отын асьме пӧськыосмы возьматэмын. Мукет калыкъёслэн но — коми, пор, мордва — сыӵе ик висьытӥсь юанъёссы: сям-йылолъёс, анай кыл, телевидение. Но берлояз съездын кутэм резолюциысь тросэз ужпумъёс быдэстэмын. Тужгес но культурая, сям-йылолъёсъя зэмос вамышъёс лэсьтэмын. Со сяна, ас удысаз Нациосын ужан политикая министерство умой ужаз. анай кылэз дышетон лябгес радъяськиз. Но соизъя одно ик ужез азинтом.

— Асьтэос валтоно биньгозыдэс куштыны малпаськоды, лэся. Малы сыӵе малпанэ вуиды?

— Мон, кивалтыны кутскыкум ик, шуи вал: кивалто вуоно бадӟым ӧтчамозь. Можгаын улӥсько бере, нуналлы быдэ Иже вуылыны секыт. Арняяз кык пол тырши ик вуылыны. Нош калык возьма, вераськыны мылкыдъёссы вань. Уйпал ёросъёсы вуылыны ӧз кылды. Та пумысен, меӵак синмам учкыса, вожпотэмзэс но веразы. «Удмурт Кенешен» кивалтӥсь луыны кулэ Ижысь. Адямиос сое котьку мед шедьтозы.

Ас азям пуктэм ужпумъёсты быдэстӥ кадь потӥсько. Но мон уг палэнтӥськиськы движенилэсь. Выль кивалтӥсь кулэ кариз ке, мылкыдме верало исполкомын ужаны. 2017-тӥ арозь Россиысь фин-угор калыкъёслэн ассоциацизылэн президиумаз но кенешаз ужало на. Сюресме чутрак воштыны мылкыды ӧвӧл.

Ас интыям воргорон кандидатураез утчамы. Но туннэ кужмозэ ӧм синйылтэ, нош синйылтэмез ачиз ужезъя движениез валтыны уг быгаты. Мынам воштӥсе Татьяна Ишматова удмуртлыкез ӝутон удысын туж кемалась ужа ни. Пиналгес ке но, со котьмалэсь эсэпсэ шӧдэ, ужез вала. Мон солы оскисько.

Елена Сараматова

Туспуктӥз А. Горбунов

 

 

Удмурт Дунне
By Удмурт Дунне Февраль 10, 2016 14:04