Бадӟым ӧтчам — пусйымон нунал

Удмурт Дунне
By Удмурт Дунне Февраль 10, 2016 13:22
img_8705

Владимир Невоструев.

Удмурт Элькунысь Кун Кенешлэн нимыныз сюлмысьтым ӟечкыласько асьме калыкмы понна тужгес бадӟым ужрадэн!

Котькудӥз ӧтчам — со быдэс дуннеысь удмуртъёслэн историязы пусйымон нунал. Съездлэн ужаз пыриськыны шуд усе тужгес но быгатӥсь, шаермес кужмогес карыны тыршись, удмурт кылмес, культурамес утьыны сюлмаськись адямиослы. Озьы вал 20-тӥ даурлэн кутсконаз, вань удмуртъёслэн нырысетӥ ӧтчамзы ортчыку но, туала вакытэ но.

Съездын котьку ӝутӥськизы удмурт калыкез тужгес шугъяськытӥсь ужпумъёс, вераськон мынӥз соосты быдэстон сярысь. Берло аръёсы та ужез рос-прос радъя вань удмуртъёслэн «Удмурт Кенеш» ассоциацизы. Та огазеяськон Удмурт шаерамы гинэ ӧвӧл, быдэс фин-угор дуннеын одӥгез тужгес бадӟымез но гажамонэз луэ. Туннэ нуналлы «Удмурт Кенешлэн» калыкен ужанъя рос-прос радлыкез кылдытэмын. Котькуд ёросын но городъёсын ужало солэн ёзъёсыз.

Ассоциация быдэстэм ужъёсын гинэ уг буйга, ялан азьлань вамышъяны, выль ужан амалъёсты кутыны тырше. Удмурт Элькунысь кун кылъёс сярысь законэз улонэ пыӵатон ласянь но трос лэсьтэ. «Удмурт Кенешлэн» кичӧлтэмезъя шаерамы но солэн палэназ ортчо яркыт, бадӟым ужрадъёс. Берлоосыз пӧлысь пусйысал удмурт егитъёслы сӥзем «Удмурт-а мон?» форумез. Солэн ужаз пыриськизы Кун Кенешлэн Тӧроез, ялан ужась комиссиослэн кивалтӥсьёссы. Ми егитъёсын ӵош одӥг ӝӧк сьӧрын кенешимы, сюлмаськытӥсь юанъёсты эскеримы.

Кун Кенешысь депутатъёс котьку син азязы возё удмурт культураез, кылэз азинтон ужпумъёсты. Кылдэм югдурез ми пыр-поч эскериськомы, луонлыкъёсты лыдэ басьтыса, кулэ дыръя бюджетэ воштонъёс пыртӥськомы.

Элькунамы вань выжы калыкъёс куспазы эшлыко мылкыдын уло. Со понна ог-огдэ кылыны, валаны быгатоно. Азьланяз но сыӵе быгатонлыкъёсмес дунъяны но кужмоятыны тыршоно. Та ужпумлы «Удмурт Кенеш» огазеяськон али сямен ик бадӟым  саклык мед висъялоз.

Гажано эшъёс, тау тӥледлы анай кылмес гажамды, яратэмды но лулчеберетмес, сямъёсмес утемды, азинтэмды понна. Бадӟым кенеше люкаськем делегатъёслы сӥзисько азьланяз но ог-огдэ гажаса, валаса ужаны.

Вань чаклам ужъёсты мед быдэсмозы!

Удмурт Элькунысь

Кун Кенешлэн Тӧроез

Владимир Невоструев

Удмурт Дунне
By Удмурт Дунне Февраль 10, 2016 13:22