Аспӧртэмлыкез утёно!

Удмурт Дунне
By Удмурт Дунне Февраль 24, 2016 12:10
0000248

Секциын огкылэ вуэмын: мыло-кыдогес пыриськоно быръёнъёсы — йӧно удмуртъёсты кивалтон ёзъёсы, депутатэ кандидатэ ӵектонэ.

«Этнополитика но право» секцие тужгес но трос калык люкаськиз.

Секцилэсь ужзэ усьтӥз Историяя, кылъя но литературая Удмурт институтлэн кивалтӥсез Алексей Загребин:

— Совето дыръёсы Америка асьмеды лушкем пачкатыны выриз ке, туала вакытэ со шара вера Россиез ултӥян мылкыдыз сярысь. Кызьы та югдурын Россилы, кунамы улӥсь калыкъёслы асьсэлэсь туссэс, аспӧртэмлыксэс утёно? Кызьы удмуртъёслы возиськоно та дуннеын? Та секыт ужез ас вылаз басьтыны кулэ «Удмурт Кенеш».

Сюлэмшуг вань нылпи садъёс пумысен. Пинал удмурт семьяын вордске, удмурт сямен вераське, нош детсадэ мынэ но воксё ӟуч луэ.

— Дышетскымтэ анай-атайёсмы удмурт кылмес утьыны, асьмелы пыӵатыны быгатӥллям, нош табере асьмеос, дышетскем муртъёс, анай кылмес быдтыны лэзёмы-а? — сюлмыз вӧсь луыса шуэ тодосчи Михаил Атаманов.

Со борды итӥськиз тодосчи Василий Ванюшев:

— Вуылӥ Казаньысь кун университетэ конференцие, доклад лыдӟыны ӧтизы. Мон борды соку ик кылысь кылэ берыктӥсез юнматӥзы. Залын 80 процентэз бигеръёс вал. Бигер кылын веранъёсты со мыным соку ик ӟуче берыктылӥз. Нош маин пӧртэм асьмеос? Кӧня удмурт филологъёсты дасяськомы, малы дышетонтэм удмуртысь ӟуче, ӟучысь удмуртэ берыктӥсь синхронной переводчикъёсты? Тае но быдэстоно ужъёс пќлы пыртоно.

Секциын огкылэ вуэмын: мыло-кыдогес пыриськоно быръёнъёсы — йӧно удмуртъёсты кивалтон ёзъёсы, депутатэ кандидатэ ӵектонэ. Чакласа возёно гуртъёсын оптимизация ортчытонэз. Нош интыосысь кивалтонъя ёзъёс мед дасялозы удмурт культураез азинтонъя проектъёс.

Елена Тугашова

Туспуктӥз А. Горбунов

Удмурт Дунне
By Удмурт Дунне Февраль 24, 2016 12:10