Игорь Семёнов: Али дырын улоно, азьпала учконо

Удмурт Дунне
By Удмурт Дунне Февраль 15, 2016 14:20
семёнов

Игорь Семёнов.

  «Удмурт Кенеш» огазеяськонлэн тӧроезлэн Игорь Семёновлэн докладэз

Быдэс дуннеысь но Россиысь фин-угор калыкъёсты сюлмаськыто анай кылэз дышетон, сямъёсты-йылолъёсты утён, егитъёслы ӟечсэ пыӵатон, кивоштӥсьёсты будэтон но трос мукет ужпумъёс. Котькуд съездын, Пичи кенешын, исполкомын, конференциын асьмеос выльысь но выльысь ӝутӥськомы тужгес ӟырдыт ужпумъёсты. «Удмурт Кенешлэн» исполкомез тыршиз котькыӵе удысэз синйылтыса но чакласа возьыны.

Калыклэн историез но лулчеберетэз азинтӥське анай кылэн ӵош. Соин ик «Удмурт Кенеш» дышетон удыслы нимысьтыз саклык висъяны тыршиз. Кылсярысь, трос шуг-секытъёс сэрттэмын-пертчемын вал, «Дышетон удысысь полномочиосты быдэсъян сярысь» кат ӵектосаз воштонъёс пыртон сярысь ужпумез эскерыку.

Пичи кенешын нимысьтыз эскеремын удмурт кылэн герӟаськем пӧртэм ужпумъёс: профтехучилищеосын, пӧртэм дышетон заведениосын удмурт кыллы но лулчеберетлы дышетон, К. Герд нимо гимназилэн аспӧртэмлыкез, со азьын сылӥсь ужпумъёс но мукет.

Жаляса верано, «Удмурт Кенеш» но асьме Кивалтэт (Правительство) школаосын но нылпи садъёсын удмурт кылэз пыӵатыны сюлмасько ке но, удмурт кылэз дышетӥсь пиналъёслэн лыдзы кулэсме. Татын бадӟым янгышмы асьмелэн но. Котькудӥз анай-атай, песянай-песятай сюлмаськысал ке, солэн нылпи садаз, школаяз удмурт кылэз мед дышетозы шуыса, удмурт кылмы таӵе секыт югдуре ӧй сюрысал. 2002-тӥ но 2010-тӥ аръёсы ортчем лыдъян-чотанъёсъя удмурт кылын вераськисьёслэн лыдзы кулэсмемын 30,7 процентлы. Кун кылъёс сярысь кат республикаысьтымы котькудаз школаын удмурт кылэз но литератураез дышетыны луонлык сётэ. Со понна анай-атайёслэн вазиськонзы гинэ луыны кулэ. Та сярысь вунэтоно ӧвӧл. Угось пиналлэсь анай кылзэ дышетыны правозэ басьтыса, асьмеос сюбегатӥськомы солэсь дунне шоры учконзэ, малпаськон радлыксэ.

Удмурт кылмес азинтон, сое паськыт вӧлмытон но улонэ пыӵатон понна кемалась кулэ вал ини «Удмурт Элькунлэн кун кылъёсыз но Удмурт Элькунысь мукет калыкъёслэн кылъёссы сярысь» катэ воштонъёс пыртыны. 15 ар ортчыса но, та законлэн куд-ог чуръёсыз улонэ ӧз пыӵалэ. Тае лыдэ басьтыса, исполкомын чакламын вал Кун Кенеше ӵектонэн потыны. Сыӵе документ Кун Кенеше сётэмын. Оскон вань, та уж пумаз вуттэмын луоз шуыса.

Удмурт кылъя но литературая кадръёсты дасян ласянь нимысьтыз пусйысал: 2014-тӥ — 2015-тӥ аръёсы Удмурт кун университетын пӧртэм факультетъёсты огазеян мыныку, трос юанъёс вал удмурт кылосбур (филология) факультетлэн азьлань сюресэз сярысь. Та ужпумез сэрттон-пертчон понна трос сюлмаськиз «Удмурт Кенеш». Ужпумез эскеронлы сӥземын вал исполкомлэн нимысьтыз ӧтчамез. «Удмурт Кенешлэн» президентэз но солэн вице-президентъёсыз уно пол пумиськылӥзы университетлэн кивалтӥсьёсыныз. Асьмелэн огъя ужмылы луыса, Удмурт кылосбуръя, финно-угроведениея но журналистикая институт кылдытыса, удмурт факультетлэн статусэз утемын.

029193,УДГУ,университет,образование,город Ижевск

Удмурт кун университетын удмурт факультетлэн нимыз но данэз утемын.

* * *

«Удмурт Кенешлэн» кужымез аслаз ёзъёсыз бордын. Тодӥсько: калыкен ужаны капчи ӧвӧл, трос дырез, кужымез но быгатэмез кулэ каре. Ёросъёсын «оптимизация» шуон улсын трос удмурт школаос ворсасько, нылпиосты потто ӟучомем школаосы, отын соос верасько ини ӟуч кылын, анай кылзы ыше. Кытын та учыръёсы ёрос но гурт кенешъёс?

Озьы ке но, пусъеме потэ, «Удмурт Кенешлэн» тросэз ёзъёсыз, выль амалъёс утчаса, ужазы. Ортчем конференциос возьматӥзы: ваньмаз каръёсын но, ёросъёсын но асьме калыкмы понна сюлмаськисьёс туж трос. Огазеяськыса, муниципал кивалтӥсьёсын тупаса-кенешыса, ужамы ке, одно ик луозы азинсконъёс, вормонъёс.

Уката но умой луысал, котькудаз ёросын но карын удмурт кылэз, лулчеберетэз, йылолъёсмес утёнъя но азинтонъя нимысьтыз программаос луысалзы ке, со-осты быдэсъяны бюджетысь уксё висъяськысал ке. Котьку пайдаё луо «Удмурт Кенешлэн» ёрос но кар ёзъёсыныз кивалтӥсьёсын ортчытъям семинаръёс.

* * *

«Удмурт Кенеш» огазеяськон рос-прос басьтӥськиз проектъёсын ужан борды. Элькунамы но, Москваын но гурт семьяослы сӥзем проектъёсмес умоен лыдъязы, коньдон висъязы. Семьялы сӥзем нырысетӥ проектмы быдэсъяськиз Вавож но Грак ёросын. Кыкетӥез — «Тангыра» — шуге-леке сюрем семьяослы юрттӥз, 25 нылпиос «Ласточка» санаторийын тазалыксэс юнматӥзы. Милям куронмы вал: нылпиос пӧлысь 70 процентэз одно ик удмуртъёс мед луозы.

Будӥсь егитъёслы ӟеч сямъёс пыӵатыны тыршим. «Удмурт дунне», «Ӟечбур!» газетъёсын ӵош трос конкурсъёс радъяськизы: «Чибориё кышет», «Анай кыл мынам улонам», «Азвесь сарва», «Ныпъет», «Быдӟым Паска» но мукет.

«Удмурт Кенеш» поттэ «Герд» газет, со потэ «Удмурт дунне» газетлэн номерез луыса. Но туж потэ вылэм: «Герд» газетмы мед вуысал котькуд удмурт гуртэ, котькуд семьяе. Лыдӟиськон дышетэ малпаськыны, вераськыны, гожъяськыны.

Туала егитъёс ог-огенызы кусып возё Интернет пыр. Со паськыт луонлыкъёс кылдытэ удмурт кылэз вӧлмытонлы но. Интернетысь «ВКонтакте» вотэсын азинлыко ужа «Удмуртлык» группа. Ваньмыз та умой. Но куд-огезлы вазиськеме потэ: эн кисьталэ ог-огдэс пож вуэн! Кызьы шуо калыкын: кырсезлы дышетскем кулэ ӧвӧл, со ачиз лякиське, дышетсконо умоезлы.

Асьме удмурт калыкмылэсь улонзэ чебертэ яратоно Гербер праздникмы. Сое дасяку, котьку кылдо уксёен шуг-секытъёс, уката ик муниципал кылдытэтъёслэн. Тазэ но ужпумез сэрттӥм-пертчим, табере Герберлы коньдон чакламын элькун бюджетын.

Шумпотӥськом, берло дыре «Удмурт Кенешлэн» тусыз егитоме. Удмуртлыкез ӝутонэ егитъёс мылысь-кыдысь пырисько. Азьветлӥсь егитъёсты огазеяса, кылем арын декабре «Удмурт Кенеш» ортчытӥз «Удмурт-а мон?!» форум. Егитъёс кык нунал ужазы, дышетскизы, тодматскизы, малпанъёссэс шараязы, пумиськылӥзы элькун кивалтӥсьёсын.

Удмурт калык ас кожаз улыны уг быгаты, кулэ но ӧвӧл. Сое чакласа, «Удмурт Кенеш» эшлыко кусып возе элькунысь вань калык огазеяськонъёсын, огъя ужрадъёсы пыриське. 2014-тӥ арын гудырикошкон толэзе исполком умоен лыдъяз «Удмурт Кенеш» огазеяськонлэсь Удмуртиысь калыкъёслэсь ассамблеязэс кылдытонэ учредитель луыса пыриськемзэ но.

Ӟеч сямлы пӧрмиз ини палэнын улӥсь удмуртъёс понна удмурт культуралы сӥзем нуналъёс ортчытъяны. Нациосын ужан политикая министерствоен но интыосысь удмурт культурая центръёсын ӵош берлоосыз ортчытэмын Кировын, Вятской Поляныын, Нижневартовскын, Татарстанын, Башкириын, Пермь но Свердловск улосвылъёсын. Та ужрадъёсы одно ик пырисько кивалтӥсьёс, тодосчиос, писательёс, фольклор коллективъёс но вань мылкыд карисьёс. Улосъёсысь удмурт культурая центръёсын кивалтӥсь эшъёсмы, нокыӵе шуг-секытъёс шоры учкытэк, калыкез бугырто, азьлань нуо.

Куатетӥ арзэ ортчиз ини «Чакара» фестиваль, отчы пыриськизы 8 улосысь 25 коллективъёс. Кылем арын со нырысьсэ ортчиз палэнын — Башкириысь Калтаса ёросын. Таӵе ужрадъёс палэнысь удмуртъёслы удмуртлыкез азинтыны мылкыд сёто. 2007-тӥ арын Башкортостанын улӟытэмын вашкала удмурт куриськон — Элен вӧсь. Пермь улосын Куеда ёросысь Кирга гуртын Тол вӧсь ортче. Киров улосын Слободаын арлы быдэ, удмурт сямъёсты утьыса, Выль ӝук пӧзьто.

* * *

2016-тӥ арын асьмеос быръёмы Кун Думае, ёрос кенешъёсы но поселениосы депутатъёсты. Али ёросъёсын удмурт депутатъёс туж ичи. Соин ик депутатэ кандидатъёсты дасян борды ӝегатскытэк басьтӥськоно.

«Удмурт Кенешлэсь» ӵектонъёссэ лыдэ басьтыса, ёзчиосмы быръемын но ужало Россия Федерациысь Общественной палатаын (Н. Стрелков), Ижкарлэн общественной палатаяз (Л. Шубин). Соос пыр асьмеос малпанъёсмес, куронъёсмес вераны быгатӥськомы.

Жаль соиз, куд-огез ялан ӝожтӥсько: азьло озьы вал, тазьы ӧй вал, кылмы быре, калыкмы ӟучоме… Соиз но вань, дыр. Но ортчемзэ берыктыны уг луы, кошкисьсэ дугдытыны ум быгатӥське. Соин ик али дырын улоно, азьпала сайкыт синъёсын, чылкыт сюлэмын мыноно. Ог-огмес саптаса, вӧсь карыса, кыдёке ум вуэ, кужыммы но трослы уз тырмы. Кызьы шуо калыкын: ӝуаз — быриз. Озьы медаз луы шуыса, тросгес ӟеч ужъёс лэсьтоно. Умой ужъёсын адямилэн пуш дуннеез узырме!

Сётэмын вакчиятыса.

Удмурт Дунне
By Удмурт Дунне Февраль 15, 2016 14:20