Ымусьтонысен Йӧвылэсултонозь — дун-чылкыт нунуалъёс

Удмурт Дунне
By Удмурт Дунне Январь 15, 2016 14:25

шкляевТолшор толэзез ӵошатыны луоно Паска нуналъёсын. Соку но, али но трос черк праздникъёс. Валтӥсьёсыз — Ымусьтон (Иисус Христослэн Вордӥськонэз), со вал 7-тӥ январе, но Йӧвылэсултон (Инмарез Пылатон), тазэ пусйиськомы 19-тӥ толшоре.

Нырысетӥ ӧс

Ымусьтонысен Йӧвылэсултонозь дун-чылкыт нуналъёс кыстӥсько. Та нуналъёсы адямиос уг визяло, ог-огзы доры куное ветло, Инмарез данъяло. Та вакытэ тросэз Инмарлы оскисьтэмъёс тунасько. Преподобной Амвросий Оптинский та пумысен шуиз вал: «Вашкала дырысен адямиослэн тодэмзы потӥз, мар вите соосты азьланяз. Кызьы гинэ соос ӧз тунаськылэ. Но тунаськон вуонозэ но уг усьты, Инмарлэсь курон-косонъёссэ но тӥя. Тодады возе: тунаськись адямиос дьявол вылэ ужало. Утисьмы номыре но уг усьты таӵе амалэн азьлань улонзэс тодыны тыршисьёслы».

Инмарез Пылатон азьын, Ымусьтон азьын сямен ик, сочельник луэ. Та нуналэ адямиос юн визяло. Оскись калык 18-тӥ толшоре воксё уг сиськы яке пӧзьтэм бакча сиёнъёсын гинэ гусъяське. Визясь адямиос тодо ини: кӧсдырысь каньылля потыны кулэ. Преподобной Серафим Саровский дэмла вал: «Сиськоно сомында, мугорыд лулыдлы ӟеч ужъёс лэсьтыны кужым мед сётоз, мед юрттоз. Нуназе сиськы кӧттыр, нош ӝытазе возиськы. Визяны астэ пичиен дышеты. Кӧсутён — шер сиськон ӧвӧл, со ӧжыт сиськон».

 

Серафим Саровскиез оскись калык сӥлы каре ӵапак туннэ, 15-тӥ январе, со ӵем лыдӟыны косӥз Евангелиез. Адями Инмарлэсь Законзэ мед валалоз но улонзэ Утисьмылэн эрикезъя мед радъялоз шуыса. Визяны косылӥз мукетыз святой но. Дун-чылкыт Василий Великий шуылӥз: «Визяны кулэ котькыӵе вакытэ, уго кӧсутись адямиос вылэ шайтанъёс но мукет сьӧд кужымъёс урдскыны уг дӥсьто. Нош кылчинъёс визясь адямиос понна шумпото но котькудзэ гожтыса кельто. Соин ик кӧттэ тырон котырад со гожтэмлэсь усьыса эн кыльы. Мултэс сиськон кӧтлы (мугорлы) изъян вае, нош кӧсутён луллы — пайда».

Йӧвылэсултон чылкытатэ но дун-чылкыт каре быдэс музъемез, вуэн гылтӥсько асьмелэн сьӧлыкъёсмы но.

Адямилы одно ик пылатӥськыны кулэ. Чукынӥськыкуз адями куинь пол куштӥське сатаналэсь но Инмарлы оскемзэ, солэн курон-косонъёсызъя улыны дась луэмзэ вера. Крещение — со Православной черклэн 7 таинствоосыз пӧлысь нырысетӥез, кудзэ пумита адями. Черке лыктон, лулдэ утён но Ин Эксэйлыке шедён понна котькудӥз та таинствоос пыр потыны кулэ. Чукынӥськон нырысетӥез ӧс выллем луэ. Со асьмеды сьӧлыкъёсмылэсь мозмытэ, выльдэ. Кин ке малпа, адямиос пылатӥсько, медаз висе шуыса, удалтӥсь но шудо луон понна. Зэмзэ ке, Крещение пыр потоно Инмарен валче улон понна но Ин Эксэйлыке, шудо улӥсьёс пӧлы, шедён вылысь.

rozhdestvo vu

Вуэн гылтӥсько сьӧлыкъёсмы.

Яратоно святой

20-тӥ толшоре асьмеос буре вайиськом Иисус Христосэз пылатэм святоез, пророкез но апостолэз Иоанн Предтечаез. Иоанн Креститель сярысь Инмар шуиз: со музъем вылын вордӥськемъёс пӧлысь тужгес бадӟымез. Иоанн Креститель Инмар Анай бере тужгес но яратоноез святой луэ. Со кадь зол вӧсяськись но визясь адями ӧй вал. Нырысь ик Иоанн Креститель калыклы вераз Иисус Христос сярысь, та апостол ик — Выль Сӥзёнысь нырысетӥез оскон понна курадӟытэм святой. Дун-чылкыт Иоанн, Инмарлэсь курон-косонъёссэ, дышетэмъёссэ калыклы верам-валэктэм сяна, кышкатэк шараялляз но возьытэ вуттылӥз сьӧлыкась муртъёсты, огшоры адямиосты но кивалтӥсьёсты.

19-тӥ толшоре Йӧвылэсултонэн валче пыласькыны луоз таӵе интыосын:

Ижын: Киров ульчаысь но Металлургысь Важнин ключ ошмесъёсын, Иж тымет вылын, Воложка, Югдон посёлокъёс дорын, Чекерилын, Лось шормуӵын (Якшур-Бӧдья сюреслэн 7-тӥ иськемаз).

Дэри ёросын: Ягулысь, Италмасысь, Соколысь, Якшурысь, Вожойылысь, Гольянысь, Хохрякиысь тыметъёсын но Ожмосысь ошмесын, озьы ик Дэриысь Молдаванской прудын но Лудорвай музей-заповедниклэн тыметаз.

Пичи Пурга ёросын: Аксакшурысь, Норъяысь, Итэшпочинкаысь, Улынгуртысь, Пуныгуртысь, Аксакпочинкаысь, Кузьминкаысь, Яган-Докьяысь, Брангуртысь тыметъёсын но Пичи Пурга черкогуртысь прудын.

Ува ёросын: Сям-Можгаысь но Выль Мултанысь тыметъёсын, Нылга шурын, Поршурысь но Удугуӵинысь ошмесъёсын но Уваысь санаторийлэн прудаз.

Вуэз вӧсялозы шаерысьтымы вань храмъёсын. Черкын ужасьёс верамъя, люкмесэ одно ик зымылоно ӧвӧл. Юоно черкын вӧсям вуэз. Нош шурысь, люкмесысь ваеменыз коркаез, юртъер котырез пазяно.

Туспуктӥз А. Горбунов

 

 

 

 

Удмурт Дунне
By Удмурт Дунне Январь 15, 2016 14:25