Кристина Ярская яркыт воректӥз быдэс Россия тыр

Удмурт Дунне
By Удмурт Дунне Январь 11, 2016 13:21

Туэ Россиысь сцена вылын яркыт воректӥз Кристина Ярская. Ярын будэм 22 аресъем удмурт нылаш пыриськиз Нырысетӥ каналысь «Голос» но «Россия 1» каналысь «Главная сцена» конкурсъёсы.

Ярская 5Кристиналэн жингрес куараез нырысь чузъяськиз шаерамы. 2012-тӥ арын «Элькуновидение» вожвылъяськонын нылаш быдэстӥз «Чоръялоз атасэд» удмурт кырӟанэз. Но отын вормон солы ӧз кырмышты — учкисьёс но дунъясьёс 9 балл сяна ӧз сётэ. Но таин сэрен Кристина нырзэ ӧз ошы. Аслыз шуиз: вамыштоно азьлань!

Ярысь 2 номеро школаез йылпумъяса, нылаш быгатонлыкъёссэ волятӥз Ижысь искусствоосъя

П. Чайковский нимо школаын. Со бӧрсьы улыны выжиз Москвае. Дышетскыны пыриз Гнесинъёс нимо колледже. Улонэз вуберганлы укшаны ӧдъя: калык кырӟанъя «Матрёхи» проектэ, Vanya band кавер-группае пыриське. Пӧзись-уртчись мылкыдыз таин гинэ уг буйга. Кристина малпа «Голос» ӵошатсконэ мыныны. Отын быдэстэ «Птица» кырӟанэз. Но тулкымъяськеменыз куараез дыректӥз, нылашлы вормыны ӧз удалты.

Та бӧрсьы но Кристина бурдъёссэ уг лэзьы. Эшшо но мургес вые крезьгур дуннее. Ас бордаз 2 поллы золгес ужаны кутске.

— Зэмзэ вераса, — шуэ Кристина, — конкурсын вормисе потод яке уд — сокем дуно ӧвӧл. Ӟечгес соиз — отын кылдо выль тодмоос. Соос ӵекто пӧртэм проектъёсы пыриськыны. Визь-нод сёто: шуом, кыӵе кырӟанъёс тупало куараедлы, кызьы астэ сцена вылын возёно.

Пичияк удалтӥз, шуыны луоз, Кристиналы «Главная сцена» вожвылъяськонын. Нырысетӥ турын быдэстӥз «Ярмарка» кырӟанэз. Озьы потӥз кыкетӥ туре. Таязын кырӟаз «Ищу тебя». Шӧдӥськиз: нылаш калык азьын уг куалекъя ни, куараез вольыт чузъяське.

— Тӥ кыӵе выжыысь? — конкурс дыръя шуак юаз дунъясьёс пӧлысь огез — Елена Ваенга.

— Мон — удмурт! — валэктӥз Ярская.

— Кыӵе усто! — вазе Ваенга. — Яр каргурттэс тодӥсько. Отӥ чугун сюрес пыр ортчылэме вань. Мон егит дыръям тӥ кадь ик вал. Конкурсъёсы пыриськылыкум, ялан шуылӥзы: кырӟаны удгес пӧрмытӥськы. Озьы тӥледлы но азинсконо. Удмурт гуръёсты тодӥськоды-а?

Кристина ӧз куалекты — жин-жин быдэстӥз удмурт калык сюан гурез. Жаляса верано, со ӧз юртты ни, нылаш финалэ ӧз сюры.

— Яраз мыным, кызьы «Главная сцена» бордын ужасьёс ми котырын бергазы, — вера Ярская. — Кызьы ымнырез буяно, йырсиез тупатоно, кыӵе дӥсь быръёно — ваньзэ отысь профессионалъёс ӵекто-возьмато. Мыным яра яркыт луыны. Соин кушем ним но апаеным Наталья Хачироваен сыӵе ик малпамы — Ярская (паспортэя мон Данилова). Одӥг ласянь, со возьматэ мынэсьтым вордӥськем палъёсме, мукет ласянь — яркыт шунды сиосты.

Туннэ Кристина вань дырзэ но кужымзэ сётэ аслэсьтыз репертуарзэ дасянлы. Со одно ик тунсыко но удмурт шӧмо, пе, луыны кулэ. Со понна нылаш одӥг-ог бертылэ вордӥськем палъёсаз. Ярын, шуэ со, яркыт малпанъёс йыре асьсэос лыкто.

К. Ярская вордӥськиз 1993-тӥ арын 19-тӥ сентябре. Кырӟа 4 аресысен. 2011-тӥ арын Россиысь улосъёс пӧлын «Поющий корабль» конкурсын 2-тӥ степенё лауреат луиз. 2012-тӥ арын «Роза мира» калыккуспо вожвылъяськонын Гран-при утӥз. 2013-тӥ арын эстрада искусстволы сӥзем «Зарни пилем» ӵошатсконын 1-тӥ степенё лауреат луиз.

Ольга Корепанова

 

Удмурт Дунне
By Удмурт Дунне Январь 11, 2016 13:21