Венгер мультфильмъёсты валалозы удмуртъёс

Удмурт Дунне
By Удмурт Дунне Декабрь 8, 2015 10:00

венгер мульт100 ар талэсь азьло Венгриын кылдытэмын вал нырысетӥ мультфильм. Солы сӥзьыса Россиысь пӧртэм улосвылъёсын ортче  HUNimation фестиваль. Та нуналъёсы со вуэ Иже но.

Озьы 10-тӥ-11-тӥ толсуре 19 часэ «Ижсталь» кинокуаын возьматозы 10 венгер мультфильмъёсты. Соос удмурт но ӟуч титръёсын мынозы. Удмурт титръёсынзэ учкыны луоз фестивальлэн нырысетӥ нуналаз ик.

Венгер анимациез Ижын нырысьсэ возьмато. Эшшо ке на удмурт кылын. Мультфильмъёсты удмурт кылэ берыктӥз  Удмурт кун университет бордын ужась «Берыктон луд» клуб. Азьвыл соослэн тыршеменызы удмурт кылын учкыны кылдӥз американ «Апокалипсис», швед «Тӧдьы кырымпыдэсъёс», немец «Бызь, Лола, бызь» но дуннелы тодмо мукет  киноосты.

Учкисьёс 10 мультфильмъёс пыр валаны быгатозы туала венгер анимацилэсь шӧмзэ, тодматскозы аспӧртэмлыко мультфильм лэсьтӥсьёсын, адӟозы, ма сюлмасьытэ туала дыре огшоры венгер адямиез.

Кылсярысь, Петер Вацлэн «Лудкеч но Косуля» мультфильмаз 2 эшъёслэн кусыпъёссы таркасько но, но Косуля улонлэсь 3-тӥ палзэ (измерение) утчаны кошке. Со оске, отын Шуд улэ шуыса. Матяш Кунгл «Ныпъетэн ныл» мультфильмаз адӟытэ, кызьы нылэз мышлань кыско ортчем улонэз, шуг-секытъёс сярысь тодэ ваёнъёсыз. Озьы со пельпум сьӧраз бадӟым но секыт ныпъет нуллэ. 1993-тӥ арысь нуналъёс возьматэмын Кристиан Кирайлэн «Мазё ульча, 1-тӥ корка» киноын. Соку Венгриын ужамысь дугдэ «Эрико Европа» радио, нош пичи городын валантэм учыръёс луыны кутско.

Вань мультфильмъёс бадӟым экран вылэ потэмын берло 3 ар ӵоже, пыриськемын дано фестивальёсы, куд-огез «Оскар» премиен но пусъемын.

«УД»

Удмурт Дунне
By Удмурт Дунне Декабрь 8, 2015 10:00