Ӟуч режиссёрлэн Анна Меликянлэн «PRO любовь» киноез сярысь

Удмурт Дунне
By Удмурт Дунне Декабрь 24, 2015 08:14
kinopoisk.ru

kinopoisk.ru

All you need is love

«Ваньмыз, мар кулэ тыныд — со яратон» — Д. Леннонлэн таӵе кылъёсыныз бадӟым экранъёс вылэ потӥз туала ӟуч режиссёрлэн Анна Меликянлэн «PRO любовь» киноез (18+). Кылпумысь, таяз гужеме со «Кинотаврын» вормиз.

А. Меликян ужа огшоры адямиосын, выль кизилиосын (А. Бортич, М. Шалаева, Р. Куркова) но кемалась тодмо актёръёсын (М. Ефремов, В. Машков, Е. Цыганов).

Та капчи но мусо кино кылдэ пичи новеллаослэсь, кудъёссэ герӟа Рената Литвиновалэн яратон сярысь лекциез (лекциез кылзыны лыктӥзы огшоры адямиос). Со, нейробиология вылэ пыкиськыса, маде, кызьы кылдэ яратон, малы адями быръе мукет адямиез.  Яке бырйыны уг быгаты, кызьы уг быгаты бырйыны Боря (та героез шудӥсь Евгений Цыгановлы Боря ним воксё уг тупа, потӥз мыным) — скейтер но стрит-артэн вырись воргорон — со йыромиз кык пӧртэм нылашъёс вискын но, огъя улоназ но.

Серемес кусыпъёс кылдо косплеерша но полицейской вискын, бизнесмен но секретарша вискын, люкиськем кузпалъёс вискын —  та сю пол пумиськылэм кусыпъёсты кыӵе паймымон возьматыны луэ!

Та альманах, адями кусыпъёсты сяна, суреда Москваез — куанер коммуналкаоссэ, йӧспӧртэм клубъёссэ, ӝужыт коркаоссэ, шуныт ульчаоссэ — огкылын, синмаськытэ солы озьы, кызьы синмаськемын шоркармылы татчы «паймымон ӟуч лулэз» утчаса вуэм япон нылаш.

Та киноысь крезьгур тодэ вайытэ совето вакытысь киноосты, кылсярысь, «Служебный роман» яке «Ирония судьбы…». Та киноосын крезьгур кылдытэ кинолэсь пуш дуннезэ: «PRO любовь» фильмын урамын шудӥсь крезьгурчиос пӧлысь адӟыны луэ Noize MC-ез, Ёлкаез. Япон нылаш А. Розенбаумлэсь «Гоп-стоп» кырӟанзэ быдэстэ, нош валтӥсь, ваньзэ герӟась но валэктӥсь кылъёс пумисько В. Высоцкийлэн «Баллада о любви» но Сплинлэн «Ай лав ю» кырӟанъёсазы.

Вера Штыкова

Удмурт Дунне
By Удмурт Дунне Декабрь 24, 2015 08:14